|
Yanvarın 12-18 tarixləri arasında Qazaxıstanın Almatı
şəhərində məktəblilərin X Beynəlxalq Jautıkov
fizika-riyaziyyat və informatika olimpiadası keçirilib.
Olimpiadada Rusiya, İndoneziya, Bolqarıstan, Serbiya,
Hindistan olmaqla ümumilikdə 16 ölkədən 57 komanda
iştirak edib.
"Çağ" Öyrətim İşlətmələri Azərbaycan-Türkiyə Özəl
Liseyləri olimpiada koordinatoru F.Qarayevdən aldığımız
məlumata görə, 390 şagirdin iştirak etdiyi bu
olimpiadada Azərbaycan məktəbliləri də öz biliklərini
sınayıblar. Nəticədə təmsilçilərimiz 1 gümüş, 4 bürünc
olmaqla 5 medal və 3 həvəsləndirici sertifikat əldə
ediblər. Fizika fənni üzrə "Dədə Qorqud" Özəl Türk
Liseyinin 10-cu sinif şagirdi Tural Əliyev gümüş, Gəncə
Özəl Türk Liseyinin 11-ci sinif şagirdi Nurlan Avazlı,
Şirvan Özəl Türk Liseyinin 10-cu sinif şagirdi Nurlan
Rzayev, riyaziyyat fənni üzrə Mingəçevir Özəl Türk
Liseyinin 10-cu sinif şagirdi Fərid Həsənli və
informatika fənni üzrə Bakı Özəl Türk Liseyinin 10-cu
sinif şagirdi Sənan Paşayev bürünc medal alıblar. Bundan
başqa, riyaziyyat fənni üzrə Şirvan Özəl Türk Liseyinin
11-ci sinif şagirdi Mehdi Məhərrəmov, Sumqayıt Özəl Türk
Liseyinin 11-ci sinif şagirdi İsa Bayramov və Gəncə Özəl
Türk Liseyinin 10-cu sinif şagirdi Fərman Dumanov
həvəsləndirici IV yerə layiq görülməklə sertifikatla
mükafatlandırılıblar.
Rəşad RAMAZANOĞLU,
"Azərbaycan müəllimi" |
