Yanvarın
29-da Azərbaycan Respublikasının Prezidenti yanında
Dövlət İdarəçilik Akademiyasında Məhəmməd Əmin
Rəsulzadənin 130 illik yubileyinə həsr edilmiş
elmi-praktik konfrans keçirilib. Tədbir başlanmazdan
əvvəl Məhəmməd Əmin Rəsulzadə haqqında sənədli film
nümayiş etdirilib.
Elmi-praktik konfransı akademiyanın rektoru, akademik
Urxan Ələkbərov açaraq Məhəmməd Əmin Rəsulzadənin 130
illik yubileyinin keçirilməsi haqqında Prezident İlham
Əliyevin sərəncamını xatırladıb, ölkə başçısının
xalqımızın tarixi şəxsiyyətlərinin xatirəsinin uca
tutulmasına xüsusi diqqət göstərdiyini bildirib. Rektor
Azərbaycanın görkəmli dövlət və ictimai xadimlərindən
biri olan Məhəmməd Əmin Rəsulzadənin həyat və fəaliyyəti
haqqında fikirlərini bölüşüb. Qeyd olunub ki, Məhəmməd
Əmin Rəsulzadə, Əlimərdan bəy Topçubaşov, Fətəli xan
Xoyski, Nəsib bəy Yusifbəyli, Həsən bəy Ağayev, Məmməd
Yusif Cəfərov, Xəlil bəy Xasməmmədov kimi şəxsiyyətlər
Azərbaycan Xalq Cümhuriyyətini elan etməklə dövlətçilik
tariximizin ən şanlı səhifələrindən birini yazıblar.
Natiq daha sonra cəmi 23 ay yaşamasına baxmayaraq
Azərbaycan Xalq Cümhuriyyəti dövründə mühüm tədbirlərin
həyata keçirildiyini qeyd edərək müsəlman Şərqində ilk
demokratik parlament formalaşmış, insanların demokratik
hüquq və azadlıqları bərqərar olmuş həmin tarixi dövrdə
ilk dəfə olaraq qadınlara kişilərlə bərabər seçki
hüququnun verilməsi, 1918-ci il mayın 28-də Azərbaycan
Xalq Cümhuriyyətinin İstiqlaliyyət Bəyannaməsinin qəbul
edilməsi ilə bağlı tarixi faktları konfrans
iştirakçılarının diqqətinə çatdırıb.
Elmi-praktik konfransda DİA-nın professoru Etibar
Nəcəfov "Azərbaycanın ictimai-siyasi fikrində Məhəmməd
Əmin Rəsulzadənin yeri", professor Musa Quliyev
"Azərbaycan istiqlal hərəkatı və Məhəmməd Əmin
Rəsulzadə", dosent Rahib Əkbərov "Milli-hüquqi dövlət
quruculuğunda Məhəmməd Əmin Rəsulzadənin rolu", dosent
Rəna Bayramova "Məhəmməd Əmin Rəsulzadənin mühacirət
dövrü fəaliyyəti" mövzularında məruzələrlə çıxış
ediblər.
Samirə KƏRİMOVA,
"Azərbaycan müəllimi" |