|
 Yanvarın
29-da BSU Məktəb-lisey kompleksində Leninqradın
blokadadan azad olunmasının 70 illiyinə həsr olunmuş
inteqrativ dərs təşkil olunmuşdur. Rus bölməsinin 10-cu
sinfində baş tutmuş bu dərsdə digər siniflərin də
şagirdləri iştirak edirdilər.
Dərsi tarix müəllimi, "Ən yaxşı müəllim" müsabiqəsinin
qalibi Arzu Haciyeva və ədəbiyyat müəllimi Naibə
Kərimova aparırdılar. Rus və Azərbaycan tarixi və
ədəbiyyatı materialları əsasında hazırlanmış bu
multimedia komponentli dərsə həm də respublikamızda
fəaliyyət göstərən "Leninqrad Blokadası İştirakçıları
İctimai Birliyi"nin üzvləri, blokadanın canlı şahidləri
- Bakı Slavyan Universitetində fəaliyyət göstərən
"Sankt-Peterburq tədris-mədəniyyət" mərkəzinin əməkdaşı,
dosent İrina İvanovna Kadımova və Nona Anatolyevna
Əfəndiyeva dəvət olunmuşdular.
Böyük Vətən müharibəsi, 900 günlük Leninqrad blokadası
barədə fotovideo görüntülər, arxiv materiallarını təqdim
etdikdən sonra tarix müəllimi sözü ədəbiyyat müəlliminə
verdi. Şagirdlər blokada şəraitində yaşayan və yaradan
şair və yazıçıların əsərlərindən parçaları əzbər
söylədilər və onlar haqqında məlumat verdilər. Tarix
müəllimi alman faşizminin törətdiyi əməllərlə
ermənilərin Xocalı və digər yaşayış məskənlərimizdə
törətdikləri vəhşiliklər arasında müqayisələr apardı.
Kompleksin direktoru Telman Cəfərov qonaqları təqdim
etdi. Leninqradın blokadasının canlı şahidləri İrina
İvanovna Kadımova və Nona Anatolyevna Əfəndiyeva o
dəhşətli, lakin şərəfli tarixlə bağlı təəssüratlarını
söyləməklə yanaşı, yüksək səviyyədə hazırlanmış
inteqrativ dərsə görə kompleksə və Rusiya
Mədəniyyət-İnformasiya Mərkəzinə minnətdarlıqlarını
bildirdilər. |
