|
Fevralın 18-də Azərbaycan Respublikasının Prezidenti
yanında Dövlət İdarəçilik Akademiyasının (DİA) və
"Azərbaycan Respublikası Dağlıq Qarabağ Bölgəsinin
Azərbaycanlı İcması" İctimai Birliyinin birgə təsis
etdikləri Qarabağ Araşdırmalar Mərkəzində ali məktəb
tələbələri üçün "Ermənistan-Azərbaycan, Dağlıq Qarabağ
münaqişəsi: tarixi kökləri, mərhələləri və həlli
perspektivləri" proqramı üzrə qısamüddətli kursların
açılışı olmuşdur.
"Azərbaycan Respublikası Dağlıq Qarabağ Bölgəsinin
Azərbaycanlı İcması" İctimai Birliyinin mətbuat
xidmətindən AzərTAc-a bildirmişlər ki, mərasimdə DİA-nın
rektoru, akademik Urxan Ələkbərov kursların
keçirilməsinin məqsədlərindən danışmışdır. Rektor qeyd
etmişdir ki, məqsədimiz son iki əsrdə ermənilər
tərəfindən xalqımıza qarşı həyata keçirilən etnik
təmizləmə, soyqırımı siyasəti haqqında indiki və gələcək
nəsillərdə möhkəm milli yaddaş formalaşdırmaq, bu
faciələrə bütün dünyada siyasi və hüquqi qiymət
verilməsinə nail olmaq, onun ağır nəticələrinin aradan
qaldırılmasına və bir daha belə halların təkrar
olunmamasına çalışmaqdır.
Bu kursların keçirilməsinin ideyası gənclərin
maarifləndirilməsi və onlarda vətənpərvərlik ruhunun
yüksəlməsinə kömək göstərməklə yanaşı, həm də Qarabağ
həqiqətləri haqqında dünya ictimaiyyətinin daha çox
məlumatlandırılması istiqamətində Azərbaycan dövlətinin
apardığı mühüm işlərə töhfə verməkdir.
Kurslarda ilk olaraq İctimai Birliyin Qarabağ
Araşdırmalar Mərkəzinin rəhbəri, DİA-nın dosenti Elçin
Əhmədov "Ermənistanın Azərbaycana qarşı ərazi iddiaları
və təcavüzkarlıq siyasətinin tarixi kökləri və
mərhələləri", tarix elmləri doktoru, professor Kərim
Şükürov isə "Ermənilərin Azərbaycan torpaqlarına
köçürülməsi və nəticələri" mövzusunda mühazirələr
oxumuşlar.
Kurslarda "XX əsrin əvvəllərində ermənilərin
azərbaycanlılara qarşı təcavüzü (1905-1906)",
"Azərbaycanlıların soyqırımı (1918-1920-ci illər)",
"Ermənistanın Azərbaycana qarşı ərazi iddiaları
(1918-1923-cü illər). DQMV-nin yaradılması və
nəticələri", "Sovet dövründə Ermənistanın
azərbaycanlılara qarşı etnik təmizləmə siyasəti və onun
nəticələri", "XX əsrin 80-ci illərinin sonunda
Ermənistanın Azərbaycana təcavüzü və onun nəticələri.
Xocalı soyqırımı; Ermənistan-Azərbaycan, Dağlıq Qarabağ
münaqişəsi beynəlxalq təşkilatlarda", "Münaqişənin
nizama salınması istiqamətində aparılan danışıqlar
prosesində Azərbaycan dövlətinin mövqeyi" və s.
mövzularda proqram üzrə ayrı-ayrı mütəxəssislər və bu
sahənin tədqiqatçıları tərəfindən mühazirələr
oxunacaqdır.
Kursların sonunda dinləyicilərə müvafiq sertifikatların
verilməsi nəzərdə tutulmuşdur.
Fevralın 18-dən 28-dək davam edəcək kursların ilk
dinləyiciləri Azərbaycan Respublikasının Prezidenti
yanında Dövlət İdarəçilik Akademiyasının tələbələri
olacaqlar. |
