|
Bakıdakı fizika-riyaziyyat və informatika təmayüllü
liseydə Xocalı soyqırımının 22-ci ildönümünə həsr
olunmuş tədbir keçirildi. Öncə Azərbaycanın milli
müstəqilliyi uğrunda qurban gedən şəhidlərin əziz
xatirəsi bir dəqiqəlik sükutla yad edildi. Məktəbin
direktor müavini Valeh Bəyalıyev 1992-ci il fevralın
25-dən 26-na keçən gecə XX əsrin ən ağır
cinayətlərindən biri azğın ermənilərin Xocalıda
törətdikləri qırğını, xocalılara tutulan divanı tarixdə
misli-bərabəri olmayan faciə kimi xatırlatdı. Bildirdi
ki, həmin gecə erməni quldurları tərəfindən heç bir
günahı olmayan insanların, o cümlədən qocaların,
qadınların və körpələrin məruz qaldıqları işgəncə, zülm
hər birimizin qəlbini göynədir. Erməni daşnakları bu
faciəni 366-cı alaya məxsus çoxsaylı ağır texnikanın
köməyi ilə həyata keçirdilər və şəhər tamamilə
dağıdıldı, yandırıldı və darmadağın edildi. Bildirildi
ki, xalqımız öz dövlətinin suverenliyi və ərazi
bütövlüyü uğrunda mübarizədə sıx birləşdi, mətinlik və
qəhrəmanlıq nümayiş etdirdi.
Sonra aparıcılar Orxan Miriyev, Nuray Kərimzadə
tarixdə analoqu olmayan bu vəhşilikdən söz açdılar.
Məktəbin şagirdləri- Nuray, Rəna, Solmaz, Xədicə,
Sevinc, Şəhla, Orxan "Layla, Xocalım layla", "Xocalının
milli qəhrəmanları", "Xocalı harayı" kompozisiyalarını
nümayiş etdirdilər. "Dəfn edin məni", "Şəhid qardaşım",
"Ana fəryadı", "Qalx ayağa, Azərbaycan" və s.
vətənpərvərlik mövzusunda şeirlər söylədilər, mahnılar
səsləndirdilər, onlar yaratdıqları obrazlarla ürəklərdə
qaysaqlanmış yaraları sızıldatdılar.
Məktəbin direktoru Tariyel Talıbov "Xocalı soyqırımı
zəmanəmizin ən dəhşətli faciəsidir" mövzusunda məruzə
edərək faciənin başvermə səbəblərini danılmaz
faktlarla, sübutlarla iştirakçılara bir daha
xatırlatdı. Vurğuladı ki, ümummilli lider Heydər Əliyev
ölkəyə rəhbərlik etməyə başladıqdan sonra Xocalı
faciəsinə siyasi qiymət verilməsinə nail oldu. Bu
faciənin dünya ictimaiyyəti tərəfindən soyqırımı kimi
tanınması üçün bir sıra mühüm addımlar atıldı və
hazırda ölkə rəhbəri İlham Əliyev həmin siyasəti uğurla
davam etdirir.
Müəllimlər- Aləmzar Mirzəyeva, Xəyalə Mədətova, Sərfinaz
Əkbərova, Allahverdi Məmmədov və Südabə Hüseynova
həmin müdhiş gecədə erməni quldurlarına havadarlıq edən
rus zabitlərini, dünyanın cılız, oğru, vandal, insanlıq
simasını itirən, azərbaycanlıları xüsusi amansızlıqlarla
qətlə yetirən erməni daşnaklarını pislədilər. Xocalı
soyqırımının xalqımızın qan yaddaşında sağalmaz bir yara
olaraq qalacağını, xalqımız tərəfindən heç vaxt
unudulmayacağını söylədilər.
Sonda Milli Qəhrəman Çingiz Mustafayevin lentə aldığı
Xocalı soyqırımı, erməni daşnaklarının vəhşiliklərini
əks etdirən videogörüntülər nümayiş olundu.
Sifai SƏFƏROVA,
"Azərbaycan müəllimi" |
