Javascript DHTML Drop Down Menu Powered by dhtml-menu-builder.com

ARXİV

28 Fevral 2014 - №08

 

"Rəngli həyat" sərgisinin açılışı olub

 

Böyütmək üçün şəkili seçinBu günlərdə "1969" qalereyasında   "Da-ART"  Təsviri  İncəsənət Mərkəzinin  rəhbəri,  əməkdar mədəniyyət  işçisi Dilarə Atakişiyevanın yaradıcılıq fəaliyyətinin 40 illiyinə həsr olunmuş  "Rəngli həyat" sərgisi açılıb. Sərginin ekspozisiyasında  Dilarə xanımın   yetirmələri olan rəssamların və  bugünkü  şagirdlərinin rəsm, qrafika, keramika, kukla və batik əsərləri nümayiş olunub.  Rəssamlar İttifaqının üzvü  Dilarə Atakişiyeva ömrünü bütünlüklə rəssamlıq sənətinə həsr edən rəngkarlardandır.

Sərginin açılış mərasimində  Azərbaycan Rəssamlar İttifaqının katibi,  xalq rəssamı Ağəli İbrahimov,  Mədəniyyət və Turizm Nazirliyinin şöbə müdiri Yaşar  Əliyev,  xalq rəssamı Arif  Hüseynov  çıxış ediblər. Natiqlərin əksəriyyəti öz nitqlərində  bu nüansı xüsusilə vurğulayıblar ki,  Dilarə Atakişiyevanın fəaliyyəti onun  yaxşı rəssam olmağı ilə bitmir, o, həm də çox bacarıqlı, özünəməxsus fərdi xüsusiyyətləri ilə seçilən  yaxşı  bir  müəllimdir. Vaxtının çox  hissəsini  şagirdlərinə həsr etmək, onlarla işləməkdən zövq almaq,  öyrətdiyi uşaqların istedadını üzə çıxarmağa nail olmaq  Dilarə Atakişiyevanı fərqləndirən xüsusiyyətlərdəndir.

Eldar Xalıqov - qalereyanın direktoru:  " Qalereya -1969"  əməkdar mədəniyyət işçisi Elçin Orucov tərəfindən təsis edilib. Gördüyünüz bu məkan  qalereyanın  nümayiş zalıdır. Bugünkü möhtəşəm sərgi də Elçin müəllimin təşkilatçılığı ilə baş tutub.

Dilarə xanıma  2013-cü ilin mart ayının 4-də cənab Prezidentimizin sərəncamı ilə əməkdar  mədəniyyət işçisi fəxri adı verilib. Dilarə xanım bütün həyatını uşaqlara həsr edib. Çox gözəl yaradıcı nəsil yetişdirib. O, fitri istedad sahibi, yüksək yaradıcı zövqə malik bir qadındır. Bir rəssam kimi o, yeri gələndə öz yaradıcılığını bir kənara qoyur. Amma gənc nəslə olan diqqət və qayğısı həmişə birinci plandadır.  Biz  Dilarə xanımla həm həmkar, həm də tələbə  yoldaşıyıq. Əzim Əzimzadə adına rəssamlıq məktəbində mən Dilarə xanımdan bir kurs yuxarıda oxumuşam. Sərginin ekspozisiyasında nümayiş olunan əsərlər ömrünün  40 ilini  rəssamlığın sirlərini uşaqlara öyrətməyə həsr etmiş  Dilarə Atakişiyevanın  illərlə çəkdiyi  zəhmətinin, istedadının bəhrəsi,  nəticəsidir. Tanınmış rəssamın  şagirdləri  dünyanın müxtəlif ölkələrində keçirilən beynəlxalq müsabiqələrdə Azərbaycan mədəniyyətini hər zaman uğurla təmsil edirlər. 

Sərgidə  rəsmi qonaqlarla  yanaşı, rəssamın  şagirdlərinin valideynləri də  öz ürək sözlərini deyərək, Dilarə Atakişiyevanın  ustad-müəllim fəaliyyətini yüksək  dəyərləndirdilər, onu  ürəkdən təbrik edərək  yarım əsrə yaxınlaşan yaradıcılıq ömründə  daha möhtəşəm sənət  uğurları arzuladılar.

Nigar Əhmədova: Oğlum Cavidan Əhmədov yeddi yaşından bu günədək Dilarə xanımın rəhbərlik etdiyi "Da-ART" studiyasında  rəssamlığın sirlərini öyrənir. 2013-cü ildə Yaponiyada təşkil olunan sərgidən Azərbaycandan 2 məktəbli rəssam qızıl medalla qayıtdı. Onlardan biri bizim  Cavidan idi. Mən bir valideyn kimi oğlumun uğurlarına görə Dilarə xanıma təşəkkür edirəm. Bugünkü yaradıcılıq sərgisi Dilarə xanımın bir rəssam kimi nələrə qadir olduğunun əyani nümayişidir.

Dilarə xanım da öz çıxışında sərgisinin açıldığı bu günün bir  bayram olduğunu söyləyərək  iştirakçılara və bu işin təşkilinə dəstək olanlara öz dərin  minnətdarlığını bildirdi:  

- "Da-ART" təsviri incəsənət mərkəzində artıq 13 ildir ki, rəssamlıq sənətinin sirlərini qabiliyyəti olan uşaqlara  və bacarığı, həvəsi olan böyük yaşlı insanlara  öyrədirik.  Bu mərkəzdə qrafika və kompozisiya ilə yanaşı, gil və müxtəlif  materiallardan kukla hazırlanması  da öyrədilir.  Bugünkü sərgidə həm özümün, həm də  "Da-ART" mərkəzindəki  tələbələrimin əl işləri nümayiş etdirilir.

Mən tələbələrimlə məşğul olarkən çalışıram ki, uşaqlar özlərini evdəki kimi hiss etsinlər. Mərkəzdə elə mühit yaratmışıq ki, uşaqlar burada çay içir, yemək yeyir, musiqi dinləyir, öz ideyalarını bölüşür və ya... rəsm çəkmək istəməyəndə çəkmirlər. Bizim kukla ustalarımız  Bakı, Moskva, Koreya, Yaponiyada  keçirilən beynəlxalq sərgilərdə iştirak ediblər.

Uşaq yaşlarından bizim mərkəzdə məşğul olan tələbələrimin əksəriyyəti Rəssamlıq Akademiyasını bitirib və Rəssamlar İttifaqının üzvüdür. Bugünkü sərgidə artıq peşəkar rəssam kimi onların da əl işləri nümayiş etdirilir. Onların çəkdiyi rəsmlər müxtəlif  xarici ölkələrdə keçirilən bir çox sərgilərdə iştirak edib, nüfuzlu mükafatlara layiq görülüblər.

 Rəssamların həyata, dünyaya öz baxışları olur. Rəssamlar hər şeydə bir məna, bir gözəllik axtarırlar. Rəssamlıq özünüifadə deməkdir. Rəsm çəkən, rəssamlığı bacaran, rəsmi sevən insan  dünyanı hamı kimi yox, öz düşüncələrindəki kimi görür.

Biz uşaqlara rəssamlığın əlifbasından - əl hərəkətlərindən tutmuş, fırça tutmağadək hər bir başlanğıc məqamları öyrədirik. Zaqafqaziyada ən yaxşı rəssamlıq məktəbi Azərbaycanda olub. Azəri uşaqlarının rənglər duyğusu bir Allah vergisidir.

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov