Javascript DHTML Drop Down Menu Powered by dhtml-menu-builder.com

ARXİV

14 Mart  2014 - №10

 
 

"İllər məndən uzaq düşsə də..."

 

Böyütmək üçün şəkili seçin...Bu günlərdə görüşdük, onun üçün doğma və əziz olan məktəbdə. Baxışındakı müəllim ciddiliyi, çöhrəsindəki səmimiyyət iki il əvvəl necə idisə, eləcə də qalmışdı. Köhnə tanışlar kimi hal-əhval tutduq. Şükranlığını söyləsə də illərin tez ötdüyündən gileyləndi: "İllər elə bil uçur. Dönüb ötənlərə boylananda elə bilirəm indiyə kimi yaşadıqlarım bir göz qırpımı imiş.  

Bəzən düşünürəm ki, ali təhsilli müəllim kimi sinif otağına qədəm qoyduğum o ilk gün bu qədər uzaq ola bilməz... Axı, o günün həyəcanı və sevinci hələ də əlçatacaq qədər yaxın görünür... Amma illər məndən uzaq düşsə də, ömrümdən  nələr aparsa da şərəfli müəllimlik peşəsinə olan sonsuz sevgimi ala bilməz".

65 yaşının astanasında bir qədər kövrəlmişdi Məhburə müəllim. Ancaq bilirdim ki, bu günlərdə sevimli şagirdlərinin, müəllim yoldaşlarının, məktəb rəhbərliyinin təbriklərini qəbul edəcək. Onun səmərəli pedaqoji fəaliyyətindən ürəkdolusu söz açılacaq.

Məhburə Həsənova müəllimliyə ilk olaraq təyinatla doğma məktəblərində - Yevlax  rayonundakı Varvara kənd səkkizillik məktəbində başlayıb. Bakıdakı A.Xəlilov adına 263 nömrəli məktəbdə isə 33 ildir ki, çalışır. Məhburə müəllim şagirdlərə riyaziyyat fənnini tədris edir. Baş müəllimdir. O, məktəblilərin yüksək təhsili, təlim və tərbiyəsi, cəmiyyətimiz üçün layiqli vətəndaşlar kimi yetişməsi üçün bilik və bacarığını, təcrübəsini əsirgəmir. Dərslərinə həmişə yaradıcı yanaşır, şagirdlərin fəallığını təmin etməyə çalışır. Məhburə Həsənovanın "Riyaziyyat dərslərində müstəqil işlərin təşkili" mövzusunda qabaqcıl iş təcrübəsi rayonun riyaziyyat müəllimləri arasında yayılıb.

Məhburə müəllim şəhər məktəblərində keçirilən "Riyaziyyat aylığı"nda fəal iştirak edir. Hər dəfə də özünün pedaqoji ustalığı və şagirdlərinin müstəqil işləri yüksək qiymətləndirilir.

Qəlbində bir peşənin sevgisini gəzdirən, ucalıq yaşında müəllimliyin şərəfi ilə fəxr edən, riyaziyyatın sirlərini böyük həvəslə şagirdlərə öyrədən cəfakeş müəllimi, bilik və təcrübəsini gənc həmkarlarından əsirgəməyən geniş ürək sahibini ad günü münasibətilə təbrik edirik.  

Nazim ƏLİFOV

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov