|
SOS Uşaq kəndində kimsəsiz və valideyn himayəsindən
məhrum olmuş uşaqlara göstərilən diqqət və qayğı
onların bu müəssisəyə qəbul olunduğu gündən müstəqil
həyata yiyələndikləri günədək davam edir. Bu qayğının
əsas məqsədi uşaqların ailə şəraitində böyüməsi,
onların hərtərəfli inkişaf etməsi, gələcəkdə müstəqil
yaşamaq üçün lazımi şərait yaratmaqdan ibarətdir.
Müəyyən yaş həddinə çatdıqda isə uşaqlar Gənclər Evinə
köçürülürlər.
Gənclər evi SOS uşağa qayğı modelinin ikinci
mərhələsidir. Bu model ailə əsaslı qayğı olmaqla ölkədə
yeganə uzunmüddətli alternativ qayğı modelidir. Belə ki,
ilk öncə SOS Uşaq kəndində himayə olunan uşaqlar
ikinci mərhələdə Gənclər Evinə köçür, sonra onların
yarımmüstəqil həyatı başlayır, dördüncü mərhələdə isə
uşaqlar müstəqil həyata tam hazır şəxslər kimi
cəmiyyətə inteqrasiya olunurlar.
Hazırda SOS Uşaq Kəndləri - Azərbaycan Assosiasiyasının
himayəsində iki Gənclər Evi fəaliyyət göstərir. Hər iki
Gənclər Evi 20-21 gənc üçün nəzərdə tutulub. Bu
layihələr Azərbaycan dövlətinin və SOS və Kinderdorf
İnternational Fondunun birbaşa maliyyə dəstəyi sayəsində
reallaşır. Gənclər Evinin avadanlıq, mebel, məişət
əşyaları ilə təmin edilməsində yerli Mobitel Nokia
Şirkəti, Mc Donalds və digər şirkətlərin dəstəyi
böyükdür. Bu şirkətlərə səyahətə aparılan gənclər orada
onların fəaliyəti haqqında informasiya alır, mobil
telefonların hazırlığı prosesini görürlər.
Gənclər Evinə SOS Uşaq kəndlərində tərbiyə almış 15
yaşdan yuxarı, sosial yetkin və orta təhsilini başa
vurmuş yeniyetmələr qəbul olunur. Burada yaşadıqları
müddətdə onların sənətə, peşəyə və ya hər hansı bir
ixtisasa yiyələnməsi, əmək fəaliyyətinə başlaması və
ilkin gəlir əldə etməsi üçün şərait yaradılır. Peşəkar
mütəxəssislərdən ibarət heyət hər bir gənclə birgə fərdi
inkişaf planı hazırlayır və planın həyata keçirilməsini
izləyir.
Gənclər Evində yaşayan gənclər hazırda müxtəlif ali və
orta ixtisas təhsili müəssisələrində təhsil alır, yaxud
növbəti mərhələdə təhsillərini davam etdirmək üçün
müxtəlif kurslarda hazırlaşdırılırlar. Gənclərin
maraqlarına uyğun olaraq həmçinin əmək bazarında
rəqabətə davamlı olmaları üçün onlar ixtisasartırma
kurslarına da yönəldilirlər. Gənclər davamlı olaraq
müxtəlif səpgili təlim və seminarlarda iştirak edir,
dövlət səviyyəli müsabiqələrə və forumlara qatılırlar.
Təhsillə yanaşı, gənclərə mənəvi, psixoloji, hüquqi,
tibbi dəstək də göstərilir, onlara asudə vaxtlarının
səmərəli təşkili və ilkin həyat səriştələrinin əldə
olunması bacarıqları da aşılanır.
Gənclər Evinin lideri Könül Məmmədova bildirdi ki,
gənclərin asudə vaxtlarının səmərəli təşkili,
istedadlarının üzə çıxarılması və sosial-mədəni
inkişaflarının təmin edilməsi məqsədilə vaxtaşırı
olaraq müxtəlif tədbirlər - "Dostlarımızla bir gün", 8
mart Beynəlxalq Qadınlar Günü, Novruz bayramı, BMT-nin
xətti ilə Ümumdünya əhali günü, Beynəlxalq ailə günü,
bir gəncin Xına şənliyi və sair tədbirlər həyata
keçirilmişdir. Bu tədbirlərdə fəallıq göstərən
gənclərimiz diplom və fəxri fərmanlarla
mükafatlandırılıb. Xorvatiyada keçirilən Beynəlxalq
Gənclər şurasının bağlanış görüşündə evin sakini
Kaminina Ramina sertifikat, "Mobitel" şirkəti tərəfindən
əmək fəaliyyətinə görə Elza Ağayeva, Röya Məmmədova
diplomla təltif olunub.
Könül Məmmədova qeyd etdi ki, qızlarımız "Asiman" rəqs
qrupuna qatılaraq rəngarəng çıxışları ilə milli və
dünya xalqlarının rəqslərini ifa edirlər. "Beynəlxalq
ailə günü" münasibətilə "Park bulvarda" təşkil olunan
tədbirdə isə gənclərin əl işlərindən ibarət rəsm
sərgisi və satış yarmarkası olub. Əldə olunan gəlir
onların gəzintisinə sərf edilib.
Gənclər Evindən çıxdıqdan sonra da onlar unudulmur.
Yaşayış yeri olmayan, maddi vəziyyəti çətin olan evsiz
gənclərin kirayə pulu, yemək və təhsil xərcləri ödənilir
ki, bu da onların yarımmüstəqil həyatları adlanır, həmin
məbləğ onların adına açılan hesaba köçürülür.
Sifai SƏFƏROVA,
"Azərbaycan müəllimi" |
