|
Aprelin 10-da BDU Elmi Şurasının növbəti iclası
keçirilib. Ali təhsil müəssisələrinin rektorlarının,
BDU-nun Elmi Şurasının üzvləri, tanınmış alimlərin
iştirak etdiyi iclası giriş sözü ilə universitetin
rektoru, akademik Abel Məhərrəmov açıb. Azərbaycan
elminin, təhsilinin dinamik inkişafı, elmi kadrların
hazırlanması, elmi potensialın gücləndirilməsi,
elmi-texniki nailiyyətlərin əldə olunmasının vacib
məsələlərdən olduğunu bildirən rektor, elmin inkişafını
xalqın gələcəyini təyin edən əsas amillərdən biri hesab
edən dövlət başçısı İlham Əliyevin elm və təhsil
sahəsinə göstərdiyi diqqət və qayğıdan danışıb. Bu
uğurlu siyasətin BDU-ya da dəyərli töhfəsini verdiyi və
Azərbaycanın beynəlxalq aləmdə aparıcı dövlətlər
sırasına qoşulmasına zəmin yaratdığı vurğulanıb. Qeyd
edilib ki, dövlət tərəfindən göstərilən qayğı, elm və
təhsilin əlaqələndirilməsi, innovasiyaların tətbiqi və
aparılan islahatlar nəticəsində 2013-cü ildə BDU "QS
World University Rankings-2012" reytinqinə görə dünyanın
700 top universitetinin, Beynəlxalq Akademik
Perspektivlər İnstitutu (URAP) tərəfindən dünyanın ən
yaxşı 2000 universitetinin, həmçinin MDB-yə üzv
ölkələrin universitetləri üzrə reytinq siyahısına daxil
edilib. MDB-yə üzv ölkələr üzrə 153 universitet arasında
aparılan sorğuya əsasən BDU 40-cı pillədə qərarlaşıb.
İclasda 2013-cü ildə yerinə yetirilmiş elmi-tədqiqat
işləri haqqında elm və innovasiyalar üzrə prorektor
professor A.Kazımzadənin hesabatı dinlənilib. BDU-da
elmin müxtəlif istiqamətlərinə aid fundamental və
tətbiqi tədqiqatların aparılmasından söz açılıb. |
