|
 Azərbaycanın
Milli Qəhrəmanı Eldar Tağızadə adına Bakıdakı 164
nömrəli tam orta məktəb qabaqcıl təhsil
müəssisələrindən biridir. Məktəbdə vətənpərvərlik
mövzusunda tez-tez tədbirlər keçirilir. Torpağımıza
məktəb illərində formalaşan sevgi sonralar məhəbbətə,
həyat idealına çevrilir. Bu ruhda böyüyən gənc nəslin
nümayəndələri cəmiyyətdə layiqli vətəndaş kimi mövqe
tutur. Milli birlik, dövlətçilik, azərbaycançılıq
ruhunun daşıyıcılarına çevrilir. Məktəbdə "Kiçik
akademiya" da fəaliyyət göstərir. Bu, yaradıcılıq və
elmi-tədqiqat işlərinə meyl və maraq göstərən, bu sahədə
potensial imkanları ilə fərqlənən istedadlı şagirdlərin
könüllü birliyidir.
Məktəbin direktoru Kəmalə Qədirova "Kiçik akademiya"nın
fəaliyyətinə diqqət yetirir, onların keçirdiyi
konfranslarda iştirak edir, şagirdlərə tövsiyələrini
verir və təcrübəli müəllimlərin bu işə cəlb olunmasına
şərait yaradır. Burada əsasən öz arzularına görə
elmi-tədqiqat fəaliyyətinə meyl və maraq göstərən
VII-XI sinif şagirdləri iştirak edirlər. Şagirdlər
müəllimlərin rəhbərliyi ilə müəyyən edilmiş istiqamətdə
sadə elmi araşdırmalar aparır, məruzə, referat və
hesabatlar hazırlayırlar. "Kiçik akademiya" üzvləri
tez-tez "dəyirmi masa"lar keçirir, araşdırmalar
aparırlar. Bu şagirdlərin elmi yaradıcılığına marağını
artırır, onların tədqiqatçılıq bacarıqlarını inkişaf
etdirir. Şagirdlər həm fərdi, həm də kollektiv şəkildə
tədqiqat aparır, məktəb kitabxanasına, Firudun bəy
Köçərli adına Respublika Uşaq Kitabxanasına gedirlər.
Kitabxananın biblioqrafiya şöbəsinin müdiri Sevil
Əhmədova şagirdlərə tədqiqat işlərində yaxından kömək
edir. Şagirdlərə bu işdə dəstək olan müəllimlər və
"Kiçik akademiya"ya rəhbərlik edən məktəbin Azərbaycan
dili və ədəbiyyat müəllimi Təranə Bağırova bu
birliyin elmi-tədqiqat fəaliyyətinə meyilli olan
istedadlı şagirdləri vaxtında aşkara çıxarmaqda, mövcud
yaradıcı potensialları nəzərə alınmaqla onların gələcək
peşə istiqamətlərini müəyyənləşdirməkdə mühüm rol
oynayacaqlarına ümid edirlər. Ulu öndər Heydər Əliyev
deyirdi: "Gələcək bilikli, elmli insanların çiyinlərində
qurulacaqdır".
Sifai SƏFƏROVA,
"Azərbaycan müəllimi" |
