|
M.V.Lomonosov adına Moskva Dövlət Universitetinin (MDU)
iqtisadiyyat fakültəsinin nümayəndə heyəti bu ali təhsil
ocağının Bakı filialında olmuşdur.
AzərTAc xəbər verir ki, MDU-nun iqtisadiyyat
fakültəsinin dekanı, iqtisadiyyat elmləri doktoru
Aleksandr Auzanın rəhbərlik etdiyi nümayəndə heyəti Bakı
filialında iqtisadiyyat fakültəsinin tələbələri ilə
görüşmüşdür.
MDU-nun Bakı filialının rektoru, professor Nərgiz
Paşayeva qonaqları salamlayaraq, filialda iqtisadiyyat
fakültəsinin 2012-ci ilin sentyabrından açıldığını,
burada 47 tələbənin təhsil aldığını bildirmişdir. Rektor
diqqətə çatdırmışdır ki, fakültə iki istiqamət üzrə
fəaliyyət göstərir: iqtisadiyyat və menecment.
Tələbələrlə səmimi şəraitdə keçən görüşdə qeyd
edilmişdir ki, Bakı filialında iqtisadiyyat fakültəsinin
yaradılması bu istiqamətdə təhsilin bazar
iqtisadiyyatının tələblərinə uyğunlaşdırılması məqsədini
daşıyır. Görüşdə Bakı filialının iqtisadiyyat
fakültəsinin inkişaf perspektivləri, tədris prosesinin
və elmi tədqiqat işlərinin keyfiyyətinin daha da
yaxşılaşdırılması yolları müzakirə olunmuşdur.
Filialda tədris prosesi, tədris korpusu,
laboratoriyalar, həmçinin tələbələr və müəllimlər üçün
yataqxana ilə tanış olduqlarını deyən moskvalı qonaqlar
filialda yaradılan yüksək şəraiti qeyd etmiş, bu ali
təhsil ocağının maddi-texniki təchizatı ilə bağlı
məmnunluqlarını ifadə etmişlər.
MDU-nun iqtisadiyyat fakültəsinin dekanı, Rusiya
Prezidenti yanında İqtisadi Şuranın üzvü Aleksandr Auzan
fakültənin gələcək inkişafı ilə bağlı planlardan
danışmış, tələbələrin suallarını cavablandırmışdır. O
bildirmişdir ki, bu, tələbələrlə ilk görüşüm deyildir.
Mən bir il əvvəl də buraya gəlmişdim. Onlar hələ bir il
bundan əvvəl mənim xoşuma gəlmişdilər. Amma indi görürəm
ki, onların gələcəyə maraqları oyanmışdır. Doğma
ölkələri Azərbaycanda öz biliklərindən necə istifadə
edəcəklərini, nə ilə faydalı olacaqlarını düşünürlər.
İqtisadiyyat fakültəsində magistraturanın açılmasına
gəlincə isə bu məsələ filialın rektoru, professor Nərgiz
Paşayeva ilə danışıqların mövzularından biridir. MDU-nun
iqtisadiyyat fakültəsində 15 magistr proqramı vardır.
Onların hər biri azərbaycanlı tələbələri qəbul etməyə
hazırdır. Düşünürəm ki, əgər sıx işləsək, 2015-ci ildə
həm Bakıda, həm də Moskvada, eyni zamanda təhsil almağa
imkan yaradan magistraturanı açmaq mümkün olacaqdır.
Görüşdə Bakı filialının tələbələri təhsillərinin xaricdə
davam etdirilməsi imkanlarını müzakirə etmişlər.
MDU-nun beynəlxalq əlaqələr üzrə dekan müavini Vladimir
Eçenike Bakı filialının tələbələrinin tələbə mübadiləsi
proqramına daxil olmaq imkanlarının nəzərdən
keçirildiyini söyləmişdir. |
