|
 Mayın
3-də Bakıdakı Heydər Əliyev adına liseydə ümummilli
lider Heydər Əliyevin anadan olmasının 91-ci ildönümünə
həsr olunmuş tədbir keçirildi. Tədbirdə liseyin
müəllim-şagird kollektivi ilə yanaşı, Milli Məclisin
deputatı Hüseynbala Mirələmov, Xətai Rayon İcra
Hakimiyyəti başçısının müavini Jalə Abdıyeva,
valideynlər və digər şəxslər iştirak edirdilər. Öncə
iştirakçılar liseyin qarşısında ulu öndər Heydər
Əliyevin xatirəsinə ucaldılmış abidəni ziyarət edərək
önünə gül dəstələri qoydular.
Tədbiri giriş sözü ilə açan liseyin direktoru, əməkdar
müəllim Fikrət Xəlilov dahi şəxsiyyət, ümummilli lider
Heydər Əliyevin xalqımızın, o cümlədən ölkəmizin
iqtisadi, siyasi, mənəvi həyatında misilsiz xidmətlər
göstərdiyini bildirdi. Heydər Əliyevin Azərbaycan
təhsilinin inkişafındakı xidmətlərini xüsusi vurğulayan
direktor ulu öndərin hər iki hakimiyyəti dövründə
Azərbaycanda aparılan təhsil quruculuğundan, regionda
təhsilin inkişafına göstərilən qayğıdan ətraflı danışdı.
Heydər Əliyevin milli təhsilin tərəqqisi və dünyaya
inteqrasiyası istiqamətindəki məqsədyönlü fəaliyyətinin
bu gün ölkə başçısı İlham Əliyev tərəfindən uğurla davam
etdirildiyi bildirildi. Ötən il ölkə Prezidenti
tərəfindən imzalanan "Azərbaycan Respublikasında
təhsilin inkişafı üzrə Dövlət Strategiyası" sənədinin
əhəmiyyətindən söz açıldı.
Liseyin tarix müəllimi Əlipənah Həsənov tədbirdə çıxış
edərək qeyd etdi ki, dünyada insan üçün ən böyük nemət
azadlıqdırsa, bir dövlət üçün isə müstəqillikdir. Bu
baxımdan, bu gün Azərbaycan müstəqil dövlət,
vətəndaşları isə azaddır. Müasir Azərbaycanımızın
müstəqilliyini dönməz, daimi və əbədi edən,
vətəndaşlarına azad və firavan həyat bəxş edən şəxs isə
məhz ulu öndər Heydər Əliyevdir. Ümummilli liderin həyat
və fəaliyyəti haqqında geniş söhbət açan Ə.Həsənov dünya
şöhrətli tarixi şəxsiyyətin unudulmaz xatirəsinin
xalqımızın qəlbində daim yaşayacağını diqqətə çatdırdı.
Tədbirdə çıxış edən Milli Məclisin deputatı Hüseynbala
Mirələmov, Xətai Rayon İcra Hakimiyyəti başçısının
müavini Jalə Abdıyeva, YAP Respublika Qadınlar Şurasının
sədr müavini Məhəbbət İbrahimova, Azərbaycan Tibb
Universitetinin professoru Məhbubə Vəliyeva və başqaları
ümummilli liderin zəngin həyat və fəaliyyətindən söz
açdılar.
Tədbirdə liseyin şagirdləri tərəfindən şeirlər
söylənildi, mahnılar səsləndirildi. Liseyin "Zərifə"
rəqs qrupunun çıxışı iştirakçılarda xoş ovqat yaratdı.
Ulu öndər Heydər Əliyev haqqında cəkilmiş klip nümayiş
etdirildi.
Niyazi RƏHİMOV,
"Azərbaycan müəllimi |
