|
Prezident İlham Əliyev Fəxri xiyabanda ulu öndər Heydər
Əliyevin məzarını ziyarət edib
 Mayın
10-u müasir müstəqil Azərbaycanın memarı və qurucusu,
görkəmli dövlət xadimi, xalqımızın dahi oğlu və
ümummilli lideri Heydər Əliyevin anadan olmasının 91-ci
ildönümüdür. Qədirbilən Azərbaycan xalqı, bütün dünyada
Heydər Əliyevi tanıyanlar və sevənlər on birinci ildir
bu dahi şəxsiyyətin doğum gününü onsuz qeyd edirlər.
Hər il ümummilli liderimizin ad günü ərəfəsində olduğu
kimi, mayın 10-da da səhər tezdən respublika
ictimaiyyətinin nümayəndələri, ölkəmizin müxtəlif rayon
və şəhərlərindən Bakıya gəlmiş insanlar, Azərbaycan
paytaxtının qonaqları axın-axın Fəxri xiyabana üz tutur,
ulu öndər Heydər Əliyevin məzarı önünə əklillər,
təzə-tər güllər qoyur, onun əziz xatirəsini dərin
ehtiramla yad edir, ruhuna dua oxuyurlar.
Xalqımızın xilaskar oğlunun doğum günündə Azərbaycan
Respublikasının Prezidenti İlham Əliyev və xanımı
Mehriban Əliyeva, ailə üzvləri, ulu öndərin doğmaları,
yaxınları onun məzarını ziyarət etmək üçün Fəxri
xiyabana gəldilər.
Prezident İlham Əliyev ümummilli liderimiz Heydər
Əliyevin məzarı önünə əklil qoydu, ulu öndərin ruhu
qarşısında baş əydi.
Azərbaycan Respublikasının Dövlət himni səsləndi.
Prezident İlham Əliyevin xanımı Mehriban Əliyeva və ailə
üzvləri ümummilli liderin abidəsi önünə gül dəstələri
qoydular.
Sonra dövlətimizin başçısı və ailə üzvləri ulu öndərin
ömür-gün yoldaşı, oftalmoloq-alim, akademik Zərifə xanım
Əliyevanın, görkəmli dövlət xadimi Əziz Əliyevin və
tanınmış həkim, alim Tamerlan Əliyevin məzarlarını
ziyarət etdilər və gül dəstələri qoydular.
Ümummilli lider Heydər Əliyevin məzarının ziyarət
edilməsi mərasimində Baş nazir Artur Rasizadə, Milli
Məclisin sədri Oqtay Əsədov, Prezident
Administrasiyasının rəhbəri Ramiz Mehdiyev, nazirlər,
komitə və şirkət rəhbərləri, Milli Məclisin deputatları
iştirak edirdilər.
AzərTAc
Prezident İlham Əliyev ümummilli lider Heydər Əliyevin
anadan olmasının 91-ci ildönümü münasibətilə paytaxtda
təşkil edilmiş Gül bayramında iştirak edib
 Azərbaycan
xalqının ümummilli lideri, dünya şöhrətli siyasi xadim
Heydər Əliyevin anadan olmasının 91-ci ildönümü
münasibətilə Heydər Əliyev Sarayının qarşısındakı parkda
və sarayın arxasındakı Şəhər Mərkəzi Parkında Gül
bayramı keçirilmişdir.
Prezident İlham Əliyev, xanımı Mehriban Əliyeva və ailə
üzvləri Gül bayramında iştirak etmişlər.
Heydər Əliyev Sarayının qarşısındakı park və sarayın
arxasında yerləşən Şəhər Mərkəzi Parkı öz görkəmini tam
dəyişmiş, paytaxt sakinləri və qonaqların sevimli
istirahət yeri olan bu ərazi bu gün möcüzəli gül bağına
çevrilmişdi. Hər il məhz Heydər Əliyev Sarayının
qarşısındakı parkda təşkil olunan gül bayramı bu il də
ənənəvi təntənəsini yaşadı və öz ərazisini daha da
genişləndirdi.
Mayın 10-da Gül bayramına Heydər Əliyev Sarayının
arxasında yerləşən Şəhər Mərkəzi Parkı da qoşuldu, ərazi
güllərdən ibarət olan maraqlı kompozisiyalarla
bəzədildi. Paytaxt sakinlərinin, şəhərimizin
qonaqlarının sevimli bayramlarından olan Gül bayramı
ənənə üzrə ən sevimli istirahət məkanlarından birində
baş tutur. Parkda müxtəlif çiçəklərdən gül xalıları,
maraqlı kompozisiyalar yığılmışdır. Bakı Şəhər İcra
Hakimiyyətinin təşkil etdiyi bu bayramda çiçək və
bitkilərdən, yarpaqlardan hazırlanan rəngarəng
kompozisiyalar görünüşü və ifadəliyi ilə seçilir,
gözəlliyin hədsiz imkanlarını nümayiş etdirir, hər kəsdə
xoş ovqat yaradır.
Burada diqqəti parkın mərkəzində müstəqil dövlətimizin
qurucusu, xalqımızın dahi oğlu, anadan olmasının 91-ci
ildönümünü qeyd etdiyimiz ulu öndər Heydər Əliyevin
ucalan əzəmətli abidəsi cəlb edir. Abidənin postamenti
güllərlə bəzədilmişdir. Xalqımızın ümummilli liderinin
abidəsinin ucaldığı parkda Gül bayramının təşkil
olunması dahi Heydər Əliyevin xatirəsinə ehtiram əlaməti
olmaqla yanaşı, həm də paytaxt sakinlərinin xoş
istirahətinin təşkili baxımından da gözəl addımdır.
Parkda rəngbərəng güllərdən hörülən, yazın gəlişinə həsr
olunan kompozisiyalar nümayiş etdirilir. Gül bayramında
hər yan göz oxşayır, hər tərəf al-əlvan rəngə
bürünmüşdür. Rənglər o qədər əlvandır ki, istər-istəməz
insanda xoş ovqat yaradır. Fəvvarələr də güllərlə əhatə
olunmuşdur. Minlərlə çiçəyin, gülün bir arada toplandığı
bu məkanda heç nə bir-birini təkrarlamır. Elə buraya
toplaşan uşaqlar da güllər kimi saf və ətirlidir.
Onların gülləri xatırladan müxtəlif libaslarda bayrama
təşrif buyurmaları bu gözəl gündə insanların ovqatını
daha da artırır.
Əzəmətli kompozisiyalardan biri də Heydər Əliyev Sarayı
qarşısında qurulmuşdur. Bu kompozisiyanı ulu öndərin
portreti bəzəyir.
Dövlətimizin başçısı, xanımı və ailə üzvləri parka
toplaşan uşaqlarla səmimi söhbət etdilər, xatirə şəkli
çəkdirdilər.
Bu il Gül bayramının daha bir maraqlı məqamı ondan
ibarət oldu ki, yüzlərlə uşaq bu ərazidə yürüş etdilər.
Prezident İlham Əliyev Bakının müxtəlif ərazilərində
yaradılacaq müvəqqəti avtomobil duracaqlarının sxemi ilə
tanış oldu. Bildirildi ki, Dövlət Yol Polisi və Bakı
Şəhər İcra Hakimiyyətinin Xüsusi Təyinatlı Avtonəqliyyat
İdarəsinin birgə işi nəticəsində müəyyən olunmuş
küçələrin sağ və sol hissələrində avtomobillər üçün
bircərgəli dayanacaqlar yaradılacaqdır. Ödəniş etmək
üçün dayanacaqlarda xüsusi bankomatlar
quraşdırılacaqdır. Bu sistem şəhərdə tıxacların
qarşısının alınmasına xidmət edəcəkdir.
Ümummilli lider Heydər Əliyevin xatirəsinin bahar
çiçəkləri ilə anılması əlbəttə ki, ulu öndərə xalqımızın
dərin hörmət və ehtiramını nümayiş etdirir. Parkda
müxtəlif dibçək və kəsilmə güllərindən, qurudulmuş gül
və bitki kollarından, göz oxşayan eksponatlardan ibarət
sadə və eyni zamanda, orijinal üslublu kompozisiyalar
qurulmuşdur. Hər tərəf baharın xoş ovqatına bürünmüşdür.
Artıq Bakıda ənənə halı alan Gül bayramı dünyanın ən
nadir gözəlliklərini bir arada toplamaqla ulu öndər
Heydər Əliyevin xatirəsinin əbədiləşdirilməsi, ümummilli
liderin doğum gününün bu cür möhtəşəm formada qeyd
olunması ilə yadda qalır, özü də ən xoş hisslərlə.
AzərTAc |
