|
Təhsil Nazirliyinin musiqi məktəbləri yeni uğura imza atıb
 Bülbül
adına Orta İxtisas Musiqi Məktəbinin X sinif şagirdi
Qran-Pri mükafatına layiq görülüb
İSESCO-nun, Azərbaycan Respublikası Gənclər və İdman
Nazirliyinin dəstəyi, Bakı Musiqi Akademiyasının
iştirakı və Kainat Gənclər Mərkəzinin təşkilatçılığı ilə
Bakıda keçirilən "İslam Dünyasının Gənc klassik musiqi
ifaçılarının 3-cü Beynəlxalq müsabiqəsi"ndə Bülbül adına
Orta İxtisas Musiqi Məktəbinin X sinif şagirdi Zərifə
Alxazova violin ixtisası üzrə Qran-Pri mükafatına layiq
görülüb. Məktəbin VIII sinif şagirdi Elarə Əliyeva
fortepiano üzrə II yerə, hər ikisi violin ixtisası
olmaqla IX sinif şagirdi Cəmilə Əsgərzadə II yerə, VII
sinif şagirdi Əsədova Ləman III yerə layiq görülərək
laureat adını qazanıblar.
Azərbaycan Milli Konservatoriyası nəzdində Musiqi
Kollecinin tələbələri də müsabiqənin qalibləri
sırasındadır. Kollecin bu festivala qatılmış 5 nəfərdən
ikisi fortepiano ixtisası üzrə - II kurs tələbəsi Günel
Rizvanova diplomant və II kurs tələbəsi Eldəniz
Ələkbərzadə III yerə layiq görülərək laureat adını
qazanıblar.
Musiqi festivalında Türkiyə, Mərakeş, Küveyt, Rusiya,
Qazaxıstan, Özbəkistan, İran, Qırğızıstan, İndoneziya və
Azərbaycan nümayəndələri iştirak edib. İfaçılar 2 yaş
qrupu - 15 yaşadək və 15-20 yaş arası qruplar üzrə
yarışıblar.
www.edu.gov.az
Qafqaz Universitetinin komandası İKT üzrə beynəlxalq
yarışmanın qalibi olub
 Azərbaycanlı
tələbələrin hazırladığı robot bütün rəqiblərini məğlub
edərək qızıl medala layiq görülüb
Qafqaz Universitetinin İnformasiya-Kommunikasiya
Texnologiyaları Elmi Tədqiqat Mərkəzinin robototexnika
qrupunun "QUsumo" komandası 8-12 may 2014-cü il
tarixlərində Rumıniyada keçirilən "İnfomatrix"
beynəlxalq yarışında iştirak edib. Müxtəlif ölkələrdən
çoxlu sayda komandanın qatıldığı yarışda "QUsumo"
komandasının hazırladığı LEGOSUMO yapon güləşi robotu
bütün "rəqib"lərini (digər komandaların anoloji
robotlarını) məğlub edərək qızıl medala layiq görülüb.
Universitetdə kompüter mühəndisliyi ixtisası üzrə təhsil
alan Əsəd Məmmədov və Tərlan Bakirlinin iştirak
etdikləri bu olimpiada robot sahəsində dünyada ən
səviyyəli yarışmalardan hesab olunur. Olimpiada dünyada
zonalar üzrə 5 ölkədə təşkil olunur və müvafiq dərəcəyə
daxil olan komandalar finala vəsiqə qazanırlar.
Y.ƏLİYEV,
"Azərbaycan müəllimi"
31 yaşlı gənc "Microsoft" şirkətinin ən yüksək
mükafatını alıb
 Azərbaycan
Dövlət İqtisad Universitetinin məzunu Aydın Əliyev
üçüncü dəfə "Ən dəyərli mütəxəssis" mükafatına sahib
olub
31 yaşlı istedadlı gənc Aydın Əliyev son 3 ildə ardıcıl
olaraq "Microsoft" şirkəti tərəfindən Excel proqramı
üzrə "MVP Award" ("Most Valuable Profisional Award" -
"Ən dəyərli mütəxəssis" mükafatı) sertifikatına layiq
görülüb.
Aydın Əliyev bu sertifikatı ilk dəfə 2012-ci il yanvarın
1-də, ikinci dəfə 2013-cü il yanvarın 1-də, üçüncü dəfə
isə bu il alıb. A.Əliyev 3 MVP sertifikatı alan yeganə
azərbaycanlıdır. İstedadlı gəncin bu uğuru son illər elm
və texnologiya sahəsində bir sıra uğurlara imza atan
ölkəmizə dəyərli töhfədir.
Aydın Camadin oğlu Əliyev 1983-cü il avqustun 23-də
Qərbi Azərbaycanda, Masis rayonunda anadan olub. 2004-cü
ildə Azərbaycan Dövlət İqtisad Universitetinin maliyyə
və kredit fakültəsini bitirib. 2006-cı ildə isə
magistraturanı fərqlənmə diplomu ilə başa vurub. Aydın
Əliyev hələ tələbə ikən intellektual yarışmalarda
iştirak edib və qalib olub. Həmçinin elmi konfranslarda
fəal iştirak edib.
Qeyd edək ki, "Microsoft" şirkəti "Ən dəyərli
mütəxəssis" ("Most Valuable Profisional") mükafatını
1990-cı ildən MVP adına layiq gördüyü şəxslərə təqdim
edir.
MVP-lər heç bir təmənna olmadan sahib olduqları dərin
biliklərini, real dünya təcrübələrini və tərəfsiz,
obyektiv əks-əlaqəni paylaşaraq insanların istifadə
etdiyi texnologiyanın inkişafı yolunda onlara kömək
edirlər.
MVP-lər "Microsoft"dakı adamlarla sıx əlaqələr qurmaq
təklifləri alan müstəqil ekspertlərdir. "Microsoft"
onlara öz məhsullarına erkən girişi təmin edir və
həmçinin onların məhsulların dizaynı və inkişafı barədə
öz tövsiyələrini verə bilmələri üçün imkanlar
qazandırır.
MVP-lər aktiv surətdə onlayn və oflayn fəaliyyətləri ilə
ictimaiyyətə yardımçı olurlar. MVP-lər "Microsoft"un
istehlakçı bazasına və texnologiyasının genişlənməsinə
təsir edirlər. 20 il bundan əvvəl "Microsoft"un
MVP-lərinin sayı 34 nəfər idi. Dünyada 100 milyon
istifadəçi texnoloji qruplarda iştirak edir və onlardan
yalnız 4 min nəfərə yaxını "Microsoft"un MVP-ləri adına
layiq görülüb. MS Excel proqramı üzrə "MVP Award"
mükafatına layiq görülənlərin sayı isə 100-ə yaxındır.
Bu statistik rəqəmlər "Microsoft" un təqdim etdiyi "MVP
Award" mükafatının nə qədər dəyərli və nadir bir mükafat
olmasından xəbər verir.
Məlumat üçün onu da bildirək ki, MVP-lər dünyanın 90-dan
çox ölkəsində yaşayır, təqribən 40 dildə danışırlar.
Onlar tərəfindən hər il 10 milyondan artıq sual
cavablandırılır. MVP-lər təcrübələrini "Microsoft"un
90-a yaxın texnologiyası üzrə bölüşürlər.
Bu mükafat bir il ərzində davam edir. Bu müddət ərzində
"MVP Award" mükafatına layiq görülən hər bir kəs
"Microsoft"un MVP-ləri adlandırılır.
Y.ƏLİYEV,
"Azərbaycan müəllimi" |
