Sınaq qiymətləndirilməsində iştirak etmiş müəllimlərin
imtahanla bağlı təəssüratları
İyunun
10-da Bakı şəhərində yerləşən dövlət ümumtəhsil
müəssisələrində fəaliyyət göstərən müəllimlərin bilik və
səriştəsinin sınaq qiymətləndirilməsinə başlanıldı.
Sınaq qiymətləndirilməsində iştirak edən müəllimlərin
rahatlığının təmin edilməsi üçün seçilmiş mərkəzlərdə
hər cür şərait yaradılıb.
Qeyd edək ki, sınaq qiymətləndirilməsi Bakı şəhərinin
ümumtəhsil məktəblərinin müəllimlərini əhatə etməklə
10-13 iyun 2014-cü il tarixlərində keçirilir. İyunun
10-da rus dili və ədəbiyyat (rus bölməsində), ibtidai
sinif, təsviri incəsənət və rəsmxətt müəllimlərinin
sınaq qiymətləndirilməsi aparıldı. İyunun 11-də
riyaziyyat, Azərbaycan dili və ədəbiyyat (rus bölməsində
Azərbaycan dili daxil olmaqla), iyunun 12-də ingilis
dili, informatika, tarix, gənclərin çağırışaqədərki
hazırlığı, biologiya fənlərini tədris edən müəllimlərin
sinaq qiymətləndirməsi başa çatdı. İyunun 13-də isə
fizika, coğrafiya, kimya, musiqi, fransız dili, fiziki
tərbiyə, əmək hazırlığı, alman dili, rus dili (Azərbaycan
bölməsində) müəllimlərinin bilik və bacarıqları
yoxlanılacaq.
İmtahanlar Bakı şəhərində 4 zona üzrə məktəblərdə, 2
növbədə (10:00 - 12:00, 15:00 - 17:00) keçirilir. Bu
məqsədlə 30 mərkəz müəyyən edilib.
Sınaq qiymətləndirilməsində Bakı şəhəri üzrə ümumilikdə
357 məktəbin 30070 müəlliminin iştirakı gözlənilir.
"Tam obyektiv bir imtahan keçirildi"
Sürəyya Bağırova, Səbail
rayonu, 239 nömrəli tam orta məktəbin müəllimi:
"Mənə "A" variantı düşmüşdü. Sualların hamısını
cavablandırdım. Amma nə dərəcədə düzgün olduğunu
imtahanın nəticələri məlum olanda biləcəyəm.
İxtisasdan ümumiyyətlə, çətinliyim olmadı.
Düzdür, bəzi suallarda çətinliklərlə qarşılaşdım.
İmtahanın keçirilməsi üçün hər bir şərait
yaradılmışdır. Tam obyektiv bir imtahan
keçirildiyini, heç bir qanun pozuntusuna yol
verilmədiyini düşünürəm. Yuxarı siniflərdə dərs
dediyim üçün kurikulum təlimindən hələ
keçməmişəm. Lakin buna baxmayaraq kurikulum
haqqında özüm oxumuşam və demək olar ki, 80-90
faiz mənimsəmişəm".
|
|
"Sual
kitabçaları paylanmamışdan qabaq
həyəcanlanmışdım"
Səbinə
Səmədova, Səbail rayonu, 162 nömrəli tam orta
məktəbin müəllimi:
"Sual kitabçaları paylanmamışdan qabaq
həyəcanlanmışdım. Lakin suallara baxandan sonra
bu həyəcanım keçdi. Çünki sualların demək olar
ki, əksəriyyətini əminliklə yazdım. Ümumilikdə
təxminən 5-7 sual arasında şübhələrim oldu.
İmtahanın normal şəraitdə keçirildiyini
düşünürəm. Metodiki suallar da bir o qədər çətin
deyildi. Əgər müəllim öz üzərində işləyərsə,
bilik və bacarığını artırmağa cəhd göstərərsə
asanlıqla hər bir maneəni dəf edə bilər. Bu
bizim özümüzü yoxlamaq üçün yaxşı fürsət oldu".
|
|
"Suallar
bir o qədər də çətin deyildi"
Nigar Abbasova, Binəqədi rayonu, 115 nömrəli tam
orta məktəbin müəllimi:
"Sualların demək olar ki 95%-nə cavab verdim.
Bir az yeni dövr ədəbiyyatından olan suallardakı
şeirlərlə bağlı tərəddüd etdiklərim oldu.
Ümumiyyətlə, suallar bir o qədər də çətin
deyildi. Azərbaycan dilindən olan sualları çox
sərbəst və rahat şəkildə yazdım. Kurikulum
təlimindən keçməməyimə baxmayaraq bununla bağlı
da yaxşı hazırlaşmışdım. Düşünürəm ki suallara
düzgün cavablar yazmışam. Sınaq
qiymətləndirilməsinin keçirilməsi müəllimlərin
həm də özlərinə hesabat verdiyi bir
qiymətləndirmədir". |
|
"Sınaq
qiymətləndirilməsinin hər 3 ildən bir
keçirilməsinin tərəfdarıyam"
Asif Salmanov, Binəqədi rayonu, 314 nömrəli tam
orta məktəbin müəllimi:
"İmtahan çox normal keçdi. Suallar da asan idi.
Təbii ki, bilənlər üçün. Fənn tədris edən
müəllimlər üçün sualları cavablandırmaq adi
haldır. Mənə "D" variantı düşmüşdü. Sualların
hər birini cavablandırdım. Düzdür, bir az
ədəbiyyatdan çətinliyim oldu, amma düşünürəm ki,
öhdəsindən gələ bildim. Sınaq
qiymətləndirilməsinin hər 3 ildən bir
keçirilməsinin tərəfdarıyam. Məncə bu,
müəllimlərdə məsuliyyəti daha da artırar". |
Niyazi
RƏHİMOV |