Javascript DHTML Drop Down Menu Powered by dhtml-menu-builder.com

ARXİV

13 İyun 2014 - №22

 

Şagirdimiz Yeniyetmələrin II Olimpiya Oyunlarına lisenziya qazanıb

 

Babayev Nazim Tahir oğlu 8 oktyabr 1997-ci ildə Bakı şəhərində anadan olub.  Bakıdakı 80 nömrəli tam orta məktəbin XI sinif şagirdidir. Dərslərini yaxşı oxuyur. Fizika, riyaziyyat, kimya fənlərini çox sevir. Amma həyatını idmana bağlamaqda qərarlıdır. Nazim özü hələ gənc olsa da, respubikamızın idman salnaməsində artıq  onun öz səhifəsi var. Gəlin, Nazimin özünü dinləyək:

- Mənim altı yaşım olana  kimi Moskvada yaşamışıq. Sonra Bakıya köçmüşük. Birinci sinifdən başlayaraq dərslərimlə bərabər həvəskar kimi idmanla da  məşğul olurdum. İdman karyeram  altıncı sinifdə oxuyanda başladı. Belə ki, məni uşaqlıqdan məktəbə babam aparıb gətirirdi. İdmana da məni elə  babam həvəsləndirdi.

Hazırda  Bakı Şəhəri üzrə  Təhsil İdarəsinin nəzdində fəaliyyət göstərən  5 nömrəli İxtisaslaşdırılmış Olimpiya Ehtiyatları Atletika məktəbinin yetirməsiyəm. İdmanın yüngül atletika üzrə  üç təkanla tullanma  növü ilə məşğul oluram.  İlk müəllimim Olesiya Xaspoladovadır. 2013-cü ildə  Avropa Gənclər Olimpiya festivalında  iştirak etmişəm. Hollandiyanın Utrext şəhərində keçirilən bu festivalda  birinci yeri qazandım. 2014-cü ilin 30 may-1 iyun tarixlərində respublikamızda keçirilən Yeniyetmələrin II Olimpiya Oyunlarına lisenziya xarakteri daşıyan yüngül atletika üzrə Afropa təsnifat turnirinin qalibi olaraq həmin olimpiadaya lisenziya qazanmışam.

Hər dəfə qələbə qazananda düşünürəm ki, əgər  ölkəmin bayrağı mənim qazandığım qələbəyə görə qaldırılırsa,  bu, çox mühüm hadisədir. Təsəvvür edirsiniz, bayrağımız ucalır,  himnimiz səslənir, hamı ayağa qalxır...

Növbəti yarış -  yeniyetmələrin II Olimpiya Oyunları  2014-cü ilin avqust tarixlərində Çin Xalq Respublikasının Nanjinq şəhərində keçiriləcək. Respublikamızdan üç atletimiz həmin oyunlarda iştirak etmək üçün lisenziya qazanıb.Mən bu oyunlarda  qalib gəlməyim üçün var qüvvəmlə çalışır, məşqlərimi davam etdirirəm.

Mənim idman sahəsindəki uğurlarımın təməli məşqçi Olesiya xanımın zəhməti sayəsində qoyulub. Odur ki, hər yeni qələbəyə imza atanda ilk  növbədə ürəyimdən Olesiya xanıma minnətdarlıq keçir. Hazırda ən əlçatan arzum Olimpiya Oyunlarında qələbə qazanıb çempion olmaq,  Azərbaycan bayrağını yüksəklərə qaldırmaqdır. İrəlidə dünya çempionu olmağa da iddialıyam.

Mənim fikrimcə, həvəskar səviyyədə idmanla məşğul olmaq insanın özü üçün, sağlamlığı üçün gərəklidir. Elə ki, idmançı peşəkar səviyyədə məşğul olmağa başlayır, o artıq özünü deyil, təmsil etdiyi respublikanı, ölkəni düşünür, öz qələbələri ilə xalqını sevindirməyi  fikirləşir.

İlk  vaxtlar  idmanla məşğul olanda  valideynlərim başqa sənətin ardınca getməyimi istəyirdilər. Sonra idmandakı nailiyyətlərimi görəndə artıq onlar da mənim arzumu qəbul etdilər. Dördüncü sinfə qədər rəqslə də məşğul olmuşam. Amma bir şeyi özümə yəqin etmişəm ki, mən idmansız yaşaya bilmərəm.

Çoxlu dostlarım var. Ən yaxın dostum isə uşaq vaxtımızdan eyni məhəllədə böyüdüyümüz, eyni sinifdə oxuduğumuz Qüdrət Əlipənahovdur. Əslində məşqlərimin çoxluğundan  dostlarıma ayırmağa bir elə də boş vaxtım  olmur. 

Müxtəlif idman yarışları ilə bağlı Türkiyədə, Hollandiyada, Gürcüstanda, Rusiyada olmuşam. Ən çox diqqətimi çəkən ölkə həm insanlarına, həm də mədəni səviyyəsinə görə Türkiyə olub. Amma həmişə düşünmüşəm ki, Azərbaycandan başqa heç bir ölkədə daimi yaşaya bilmərəm.

Bakı Şəhəri üzrə Təhsil İdarəsinin nəzdində 5 nömrəli İxtisaslaşdırılmış Olimpiya Ehtiyatları Atletika məktəbinin baş məşqçisi Elmin Əliyev:

- Bu ilin avqust ayında Çində keçiriləcək Yeniyetmələrin II Olimpiya Oyunlarına üç nəfər atletimiz lisenziya qazanıb. Onların biri Nazimdir. Üç təkanla tullanmada Nazim Babayev lisenziya turnirində Azərbaycanda birinci yer qazandı. Nazimin qələbəsinə görə, Azərbaycanın Dövlət himni səsləndi, bayrağımız qaldırıldı. Nazim Babayevin məşğul olduğu idman növündə respublikamızda  33 il idi ki, rekord nəticə 16.03  olaraq qalırdı. Nazim həmin rekordu qırdı və yarış rekordunu 16.14 göstərici ilə təzələdi.

Biz  avqust ayında keçiriləcək yarışlarda da Nazimin qələbə qazanacağına böyük ümidlər bəsləyirik.  Çox arzulayıram ki, 2015-ci ildə Bakıda keçiriləcək Avropa Olimpiya Oyunlarında  Nazim  Babayev qələbələrlə xalqımızı sevindirsin. 

"Ellada UMUDLU,
"Azərbaycan müəllimi"

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov