|
 Müəllim
sənəti ən şərəfli peşələrdən biridir. Bu müqəddəs peşə
sahibləri hər zaman hörmətlə, izzətlə qarşılanır,
həyatdan getdikdən sonra isə ürəklərdə yaşayır, daim
xoş xatirələrlə yad edilir. Müəllim ömrü! Bu ömürdən
hamının ömrünə ziya saçılır, nur ələnir, hər bir kəsə
pay düşür.
Talıb Zülfiyev də belə bir ömür yaşayanlardandır. Çox
maraqlı bir insan, dəyərli vətən oğludur, sənətini
sevəndir, qayğıkeşdir, işinə ürəkdən yanaşandır,
insanlarla xoş münasibət qura bilir, sözübütöv və hər
şeyi olduğu kimi görəndir. Təmtərağı, boyalı söz-söhbəti,
hay-küyü sevmir. Sakit təbiətli, qaynar ruhludur. Xoş
əməlləri ilə hər zaman insanların rəğbətini qazana
bilib. Həyatın ağrı-acısına qalib gəlməyi bacarmış,
hər zaman düşmənə nifrət ruhunda köklənmişdir.
Onun haqqında çox danışmaq və çox yazmaq olar. Əgər
Bakı Humanitar Kollecinə yolunuz düşsə, Talıb
müəllimin adının tələbələrin dilindən düşmədiyinin
şahidi olar, haqqında xoş söz eşidər, əqidə sahibi
kimi tərifini eşidərsiniz.
Talıb Zülfiyev 12 iyun 1954-cü ildə Qərbi Azərbaycanın
Zəngəzur mahalının Sisyan rayonunun Ağudi kəndində
anadan olub.
Orta məktəbi doğma yurdunda bitirib. 1976-cı ildə
ADPU-nin filologiya fakültəsini bitirdikdən sonra üç
il təyinatla İmişli rayonunun Bəhrəmtəpə
qəsəbəsindəki orta məktəbdə Azərbaycan dili və
ədəbiyyat müəllimi işləyib.
1977-1978-ci illərdə həqiqi hərbi xidmət borcunu
yerinə yetirdikdən sonra o, yenidən öz doğma yurduna -
Ağudi kəndinə qayıdıb, orta təhsil aldığı məktəbdə
əvvəl müəllim, sonra tədris işləri üzrə direktor müavini
və 1983-84-cü tədris ilindən isə həmin məktəbdə direktor
vəzifəsində çalışıb.
1988-ci il Ermənistan hadisələri Talıb müəllimin də
həyatından yan keçməyib. Yurd-yuvasını tərk etmək bir
dərd, işsizlik, qaçqınlıq da bir tərəfdən... O,
Ermənistanın bu fitnə-fəsadlarını, qədim türk
torpaqlarından soydaşlarımızın qovulmasını tez-tez
xatırlayır və bu hadisələr indi də onun qəlbini
sızıldadır.
O, 1989-cu ildə Bakı Mədəni-Maarif Texnikumunda
laborant kimi fəaliyyətə başlasa da, fəaliyyətini
ədəbiyyat müəllimi kimi davam etdirir. Sonra
1994-1996-cı illərdə texnikumun tədris-təcrübə şöbəsinə
başçılıq edir və pedaqoji kollektivdə böyük hörmət,
nüfuz sahibi kimi tanınır. 1996-1997-ci tədris ilindən
çox məsul bir sahəyə - mədəni-maarif şöbəsinə müdir
təyin edilir. 2005- 2006-cı tədris ilindən isə
pedaqoji şöbənin müdiri olur. Bu günə kimi işinin
öhdəsindən layiqincə gəlmiş, eyni zamanda müqəddəs,
şərəfli müəllimlik peşəsindən də ayrılmamışdır. Heç
təsadüfi deyildir ki, Talıb müəllim Sultan Məcid
Qənizadənin aşağıdaki fikirlərini özünün həyat və
fəaliyyət devizi sayır: "Müəllimin evi-kitabxana,
sazı-sözü şagirdləri, qazancı isə millətin məhəbbət və
ehtiramıdır".
Talıb Zülfiyev yaradıcı fəaliyyətindən də geri
qalmır. Hər zaman ədəbi-pedaqoji, elmi araşdırmalarla
məşğul olur, dövri mətbuatda elmi və tərbiyəvi
mövzularda çıxış edir.
O, Nəsirəddin Tusinin 500 illik yubileyi ərəfəsində
tusisevərlərə böyük bir ərməğan bağışlayıb.
Səriştəli tədqiqatçının elmi araşdırmaları
nəticəsində "Tusi irsinə bir nəzər" adlı elmi məqaləsi
çap olunub. "Vahid" şeir məclisinin "Duyğu
yarpaqları" jurnalına yazdığı baş məqalə isə öz
dəyəri ilə xüsusilə fərqlənib.
Talıb müəllim yaxşı pedaqoq olmaqla bərabər həm də
gözəl ailə başçısıdır. 2 övladı, 4 nəvəsi var.
Ömrünün 60-cı baharını yaşayan Talıb müəllimə cansağlığı
və fəaliyyətində uğurlar arzulayırıq.
Rəşad RAMAZANOĞLU,
"Azərbaycan müəllimi" |
