Xəbər
verildiyi kimi, Azərbaycan Respublikası Gənclər və İdman
Nazirliyinin təşəbbüsü və təşkilatçılığı, Təhsil,
Rabitə və Yüksək Texnologiyalar nazirliklərinin,
Azərbaycan Milli Elmlər Akademiyasının və Azərbaycan
Respublikasının Prezidenti yanında Elmin İnkişafı
Fondunun dəstəyi ilə "Azərbaycan gəncliyi 2011-2015-ci
illərdə" Dövlət Proqramı çərçivəsində "İstedadların
hazırlığı laboratoriyası" layihəsi həyata keçirilir.
Ölkənin gənc intellektual qüvvəsini aşkar edən, onlar
arasında sağlam rəqabət və elmi ünsiyyət mühiti yaradan,
təhsil və elm sahəsində nailiyyətlər əldə etmək
imkanlarını artıran layihə yeniyetmə və gənclər arasında
dəqiq və təbiət elmlərini təbliğ edir, onlara marağı
artırır, bu sahələrdə biliklərin əldə edilməsi üçün
motivasiya, stimul və şərait yaradır. Bu məqsədlə İKT
vasitəsilə yeniyetmələrin ən geniş kütləsi bilik
yarışmasına cəlb edilir, yüksək nəticələr
qiymətləndirilir. Layihə çərçivəsində fizika,
riyaziyyat və kimya fənləri üzrə üç mərhələdə onlayn
formada keçirilən respublika olimpiadasında bu il 900
nəfərdən çox gənc iştirak edib. Onlardan146 nəfəri
yarımfinala vəsiqə qazanıb. İyunun 23-dən-25-dək Bakıda
keçirilən final turunda 81 nəfər mübarizə aparıb və
onlardan 30-u qalib olub. 5 şagird I yerə, 10 şagird II,
15 nəfər isə III yerə layiq görülüb. Bakı məktəbliləri
Rasim Həsənzadə və Könül Qurbanlı, Göygöl rayonunu
təmsil edən Etibar Abbasov, Qəbələdən Təranə Şirinbəyli,
Sumqayıt məktəblisi Mərdan Səfərov olimpiadanın qızıl
medallarını alıblar. Qaliblərə medallar və qiymətli
hədiyyələr təqdim olunub.
Yarışmada Sumqayıtdakı Nizami Gəncəvi adına Texniki və
təbiət elmləri liseyinin şagirdləri xüsusilə
fərqləniblər. Belə ki, liseyin 4 şagirdi qaliblər
sırasında olub. Mərdan Səfərov qızıl, Günay Zamanlı
gümüş, Şəhla Qurbanova və Ləman Səfərli bürünc medala
layiq görülüb.
Daha bir Sumqayıt məktəblisi - şəhər 24 nömrəli tam orta
məktəbin şagirdi Seymur Rəhimov da olimpiadada qalib
gələrək gümüş medala sahib olub.
Qalibləri təbrik edir və daha böyük uğurlar
arzulayırıq.
Yusif ƏLİYEV,
"Azərbaycan müəllimi" |