Javascript DHTML Drop Down Menu Powered by dhtml-menu-builder.com

ARXİV

4 İyul 2014 - №25

 

Məzunlar 54 ildən sonra görüşdülər

 

Böyütmək üçün seçinBu yaxınlarda tanınmış  pedaqoq, qabaqcıl maarif xadimi Həmid Tağıyevin 1960-cı ildə direktor olduğu, bu gün isə onun adını daşıyan Cəlilabad rayonu Sabirabad  kənd 2 nömrəli tam orta məktəbdə maraqlı bir tədbir keçirildi. Tədbiri maraqlı edən onun birdən-birə 3 əlamətdar  hadisəyə həsr olunması idi. Belə ki, həmin gün həm tədris ocağına Həmid Tağıyevin adının verilməsinin 20 illiyi, həm 2014-cü ilin "son zəng"i qeyd olunur, həm də 1960-cı ilin məzunları ilə görüş keçirilirdi.

Tədbirdə 1960-cı ilin məzunlarından Nadir Eminov, Əlirza Bayramov, İsa İbrahimov, Əzizağa Əsgərov, Bəybala Həmidov, Əzizağa Novruzov, dil-ədəbiyyat müəllimimiz, direktorumuzun həyat yoldaşı Sevil Tağıyeva, onun övladları,  Tovuz rayonundan gələn kimya müəllimimiz 81 yaşlı Hümmət Həsənov,  respublikamızın müxtəlif bölgələrindən - Lənkərandan, Salyandan, Sumqayıtdan, Bakıdan gəlmiş elm, incəsənət xadimləri, rayon təhsil şöbəsinin, rayon icra hakimiyyətinin nümayəndələri, hüquq-mühafizə orqanlarının işçiləri, eyni zamanda kənd məktəbinin kollektivi, valideynlər və kənd ictimaiyyəti iştirak edirdilər.

Yığıncağı giriş sözü ilə məktəbin direktoru Azad Cəfərov açaraq tədbir iştirakçılarını salamladı.

Biz - 1960-cı ilin məzunları öncə Həmid Tağıyevin xatirəsini bir dəqiqəlik sükutla yad etdik, sonra sinif otağında partada əyləşərək 54 il bundan əvvəl olduğu kimi Sevil müəllimin, Hümbət müəllimin "dərsini" dinlədik, ötən illərin şirin xatirələrindən söz açdıq.

1960-cı ilin məzunları tədbirdə H.Tağıyev haqqında xatirələrini danışaraq bildirdilər ki, həyatda qazandığımız uğurlara, cəmiyyətdə tutduğumuz mövqeyə görə bütün həyatını xalqın balalarının maariflənməsinə sərf edən təhsil cəfakeşi Həmid müəllimə borcluyuq.

20 ildir ki, Həmid Tağıyevin övladları, xüsusilə də İbrahim Tağıyev bu məktəbin əlaçı şagirdlərinə təqaüd təsis edib, hər il "Son zəng" günü məktəbin məzunlarını və I sinif şagirdlərini hədiyyələrlə, texniki işçilərini isə pul mükafatı ilə sevindirir. Məktəbin həyətində 90 m dərinliyində şirin su quyusu qazdırmışdır.

Qonaqların bir-birindən gözəl çıxışları iştirakçıları məmnun etdi.

Həmid Tağıyevin işini davam etdirən yeganə qız övladı İradə Dadaşovanın tədbirdəki maraqlı çıxışı bizi bir daha 54 il öncəyə qaytardı. Orta məktəbi qızıl medalla, Bakı Dövlət Universitetinin kimya fakültəsini əla qiymətlərlə bitirən İ.Dadaşova hazırda Bakı şəhəri 55 nömrəli tam orta məktəbdə təlim-tərbiyə işləri üzrə direktor müavini vəzifəsində çalışır.

Ulu öndərimiz Heydər Əliyev: "Mən yer üzündə müəllimdən yüksək ad tanımıram" demişdir. Tədbir göstərdi ki, Həmid Tağıyev məhz əməlləri ilə müəllim adını yüksəklərə qaldıran bir şəxsiyyət və  pedaqoq olub.

Görüşdə 54 ilin məzunları bu ilin məzunlarını təbrik etdilər, onların sevinclərinə şərik çıxdılar. 

Nadir  EMİNOV,
Sumqayıt şəhəri

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov