|
Azərbaycan Dillər Universitetində (ADU) universitetin
Yapon mərkəzinin təşkilatçılığı ilə GUAM ölkələri II
Beynəlxalq yapon dili natiqlik müsabiqəsi keçirildi.
Bakı Dövlət Universiteti, Yapon Fondu, "Panasonic LTD",
Toyotanın Qafqaz üzrə rəsmi distribütorunun Azərbaycan
nümayəndəliyi, "İtochu Neft İstismarı" Səhmdar
Cəmiyyəti, "TEC İnternational", Tokyo Elektrik Enerjisi
Xidmətləri Şirkəti və Bakı Yapon Cəmiyyətinin dəstəyi
ilə keçirilən müsabiqənin açılış mərasimində çıxış edən
Yaponiyanın Azərbaycandakı səfirinin müşaviri Ashida
Kenji müsabiqənin iştirakçılarını təbrik etdi. Xarici
dil öyrənməyin müsbət cəhətlərindən danışan Ashida Kenji
tələbələrin həmin ölkənin dilini, mədəniyyətini,
tarixini mükəmməl öyrəndiyi zaman onlar kimi düşünə
bildiklərini vurğuladı və istənilən vaxt həmin ölkənin
nümayəndələri ilə fikir mübadiləsi apara bildiklərini
sözlərinə əlavə etdi.
O, tələbələrə yapon dilini bundan sonra da öyrənməyə
davam etmələrini tövsiyə etdi və onların iki ölkə
arasında körpü rolunu oynayacağına ümid etdiyini
bildirdi. A.Kenji tədbirin keçirilməsinə şərait
yaratdığı üçün Azərbaycan Dillər Universitetinin
rəhbərliyinə, müsabiqəyə dəstək göstərən hər kəsə
minnətdarlığını bildirdi.
ADU rektorunun müşaviri Vazeh Əsgərov çıxış edərək
qonaqları universitetin rektoru, professor Səməd
Seyidovun adından salamladı. Tədbirə dəstək verən Bakı
Dövlət Universitetinə və Yaponiyanın Azərbaycandakı
dünyaca məşhur şirkətlərinə öz təşəkkürünü bildirdi.
ADU-da 20 il bundan əvvəl 3 əsas dilin tədris edildiyi,
ancaq bu gün universitetdə tədris olunan dillərin 20-dən
çox olduğu qonaqların diqqətinə çatdırıldı.
Universitetdə Yapon mərkəzinin fəaliyyətindən danışan
müşavir ADU-da yaponşünaslıq ixtisasının da olduğunu
bildirdi.
Sonra münsiflər heyətinin üzvləri - Yaponiyanın
Azərbaycandakı səfirliyinin müşaviri Ashida
Kenji, Kiyev Milli Linqvistik Universitetinin
nümayəndəsi Oyama Daiki, Gürcüstan Azad Universitetinin
nümayəndəsi Konstantin Tsereteli, Moldova-Yaponiya
əlaqələr fondunun nümayəndəsi Konako Ukai, Belarus
Dövlət Universitetinin nümayəndəsi Yamaquçi Satoru
iştirakçılara təqdim olundu, müsabiqənin şərtləri izah
edildi.
Müsabiqənin şərtlərinə əsasən Azərbaycan, Ukrayna,
Gürcüstan, Belarus və Moldovadan olan 15 nəfər tələbə
yapon dilində nitq söyləməli idilər. İnşalar "Mənim
ölkəm və Yaponiya" mövzusunda oldu. Nitqlərin inşa
mətninin orijinallığı, məzmunun dərinliyi, ifadə gücü,
inşa dilinin aydınlığına görə münsiflər heyəti
tərəfindən qiymətləndiriləcəyi bildirildi.
Sonra müsabiqədə iştirak edən 15 nəfər tələbənin bir
dəqiqəlik videoçarxı yayımlandı.
Daha sonra iştirakçı tələbələr "Unudulmaq üzrə olan
dəyərli ənənələr", "Ukrayna və yaponların ürəyi",
"Yaponlar və ukraynalıların firavanlığına aparan yol",
"Mən və Yaponiya", "Moldovanın Yaponiyası", "Mən və
yaponları birləşdirən nöqtə", "Məni dəyişdirən
Yaponiya", "Xoş gəlmişsiniz", "Uşaqların sevinci",
"Yaponlardan öyrəndiklərim" və s. mövzularda çıxışlar
etdilər.
Çıxışlardan sonra konsert proqramı oldu.
Konsert proqramından sonra tələbələrin natiqlik
bacarıqları münsiflər heyəti tərəfindən
qiymətləndirilərək qaliblər elan olundu. Qalib gələn
müsabiqə iştirakçılarına- I yer Azərbaycan Dillər
Universitetinin tələbəsi Zərifə Aydayeva, II yer
Azərbaycan Dillər Universitetinin tələbəsi Asəf
Kərimli, III yer Kiyev Milli Linqvstik Universitetinin
tələbəsi Yuliya Boyarçuk, IV yer Kiyev Milli Linqvstik
Universitetinin tələbəsi Alla Smoliyarova, V yer Bakı
Dövlət Universitetinin tələbəsi Vəfa Axundova, VI yer
Gürcüstan Azad Universitetinin tələbəsi Nino Malania və
xüsusi mükafat Belarus Dövlət Universitetinin tələbəsi
Anastasiya Piatroviçə təqdim olundu.
İştirakçılara tərifnamə və hədiyyələr verildi.
İctimaiyyətlə əlaqələr departamenti |
