|
Azərbaycan Respublikasının təhsil sahəsində islahat
proqramı, bu sahədə aparılan tədqiqatların nəticəsi
göstərir ki, hazırda inkişaf etmiş Avropa ölkələrinə
inteqrasiya olunmaq, Avropada yaşayan xalqlarla ünsiyyət
yaratmaq, həmçinin müasir tələblər baxımından
qabiliyyətli kadrlar hazırlamaq üçün milli təhsil
sistemində əsaslı dəyişikliklər etmək aktuallaşmışdır.
Ulu öndər Heydər Əliyevin xarici siyasətinin parlaq
nümunəsi olaraq Azərbaycan və Fransa dövlətləri arasında
ikitərəfli diplomatik münasibətlər mövcuddur. İki ölkə
arasında əlaqələrin inkişaf etdiyi bir dövrdə Gəncə
Dövlət Universiteti də beynəlxalq əlaqələrin
genişlənməsinə böyük önəm verir.
Bu məqsədlə bu günlərdə Fransanın Miluz şəhərində, Miluz
Yuxarı Elzas Universitetində Məhsəti Gəncəvinin adını
daşıyan mərkəzin açılışı olub. Açılışda Azərbaycan
nümayəndə heyətinin tərkibində Gəncə Dövlət
Universitetinin rektoru, professor Yusif Yusibov,
filologiya fakültəsinin dekanı, professor Mübariz
Yusifov və fransız dili kafedrasının müdiri Məhərrəm
Orucov da iştirak edib.
Səfər çərçivəsində Gəncə Dövlət Universiteti ilə Miluz
Yuxarı Elzas Universiteti arasında yeni müqavilə
imzalanıb. İmzalanma mərasimində Azərbaycan tərəfindən
Azərbaycanın Fransadakı səfiri Elçin Əmirbəyov, GDU-nun
rektoru Yusif Yusibov, Fransa tərəfindən Miluz şəhərinin
meri Jam Rother, senator Jan Mari Bokel və həmin
universitetin rektoru xanım Kristina Qanqlov-Zeyqler,
digər rəsmi şəxslər iştirak ediblər.
Tədbirdə Yuxarı Elzas Universitetinin rektoru xanım
Kristina Qanqlov-Zeyqler çıxış edərək Məhsəti Gəncəvinin
adını daşıyacaq mərkəzin rəhbərlik etdiyi ali təhsil
ocağı ilə Gəncə Dövlət Universiteti arasında
əməkdaşlığın yeni səmərəsi kimi qiymətləndirib. Rektor
Məhsəti Gəncəvinin həyat və yaradıcılığı ilə bağlı
dinlənilən məruzələr sayəsində Azərbaycan ədəbiyyatına
daha yaxından bələd ola biləcəklərini və iki universitet
- Gəncə Dövlət Universiteti ilə Yuxarı Elzas
Universiteti arasında mühüm sənədlərin imzalanacağını
konfrans iştirakçılarının diqqətinə çatdırıb.
Azərbaycana dəfələrlə səfər etdiyini xatırladan rektor
2013-cü ildə Bakı Dövlət Universiteti və Gəncə Dövlət
Universitetində olduğunu vurğulayıb. Məhsəti Gəncəvi
zalının yenidən qurulmasına yaxından köməklik göstərən
Heydər Əliyev Fonduna təşəkkürünü bildirib.
Konfransda Azərbaycan Milli Elmlər Akademiyasının Füzuli
adına Əlyazmalar İnstitutunun direktoru, akademiyanın
müxbir üzvü Teymur Kərimli "Məhsəti Gəncəvi - Azərbaycan
poeziya məktəbinin nümayəndəsi kimi", AYB-nın Gəncə
Bölməsinin sədri Məmməd Alim "Məhsəti Gəncəvi - dünyanın
solmayan sənət çiçəyi", Fransa Dövlət və Mədəniyyətləri
İnstitutunun Azərbaycan dili müəllimi Aygün Eyyubova
"XI-XII əsr Azərbaycan şairəsi Məhsəti Gəncəvi bəşəri
ideyaların və qadın hüquqlarının təşviqatçısı kimi",
Fransanın Beynəlxalq Diplomatiya Akademiyasının
əməkdaşı, şərqşünas alim Şirin Məlikova "Orta əsr lirik
poeziyanın ulduzları-Məhsəti Gəncəvi və Mari de Frans"
mövzusunda çıxışlar ediblər.
Daim inkişafda və yeniliklər axtarışında olan Gəncə
Dövlət Universitetində xarici ölkələrin təhsil və elmi
müəssisələri ilə əməkdaşlığa geniş imkanlar
yaradılmışdır. Universitetdə gənc nəslin təhsilinin,
elmi fəaliyyət dairəsinin müasir tələblər baxımından
yeniləşməsi üçün fəaliyyət proqramı hazırlanmış və bu
proqramın həyata keçirilməsi üçün müvafiq işlər
görülməsi nəzərdə tutulmuşdur.
Gələcəyin layiqli qurucuları olan gənclərin hərtərəfli
inkişafı yolunda bu gün mühüm addımlar atan Gəncə Dövlət
Universiteti Qərb regionunda özünün flaqman olduğunu
sözdə deyil, əməli işlə nümayiş etdirir.
Ümbülbanu HACIYEVA,
GDU-nun əməkdaşı |
