Azərbaycan Dillər Universitetində "Sönməz məşəl" Mədəni
Əlaqələr İctimai Birliyinin həyata keçirdiyi "Rənglər
çələngi: Azərbaycanın Dağlıq Qarabağ rəngləri Melburnda"
adlı layihənin yekunlarına həsr edilmiş təqdimat
mərasimi olub. Mərasimdə çıxış edən "Sönməz məşəl"
Mədəni Əlaqələr İctimai Birliyinin sədri, ADU-nun xarici
ölkələr ədəbiyyatı kafedrasının professoru Şəhla
Nağıyeva Melburnda fəaliyyət göstərən Dikin
Universitetində layihə çərçivəsində bu il iyunun 15-dən
22-dək ölkəmizin gənc qadın rəssamları Nərminə Vəliyeva,
Şəhla Qəhrəmanlı və Günay Həsənovanın əsərlərindən
ibarət sərgi keçirildiyini söyləyib. O, universitetin
tələbə və müəllimlərinin sərgidə rəssamların "Qarabağ
atları", "Şuşa məscidi", "Torpaq həsrəti", "Xudafərin
körpüsü", "Xarı bülbül", "Gözlərdə Qarabağ həsrəti" və
s. rəsmləri ilə tanış olduqlarını xatırladıb.
Layihə çərçivəsində Dikin Universitetində Azərbaycan
guşəsi yaradıldığını, burada ölkəmizin tarixi və
mədəniyyəti, xüsusən Ermənistan-Azərbaycan, Dağlıq
Qarabağ münaqişəsi, Xocalı faciəsi barədə geniş
informasiyalar, kitab və broşürlər təqdim olunduğunu
deyən Ş.Nağıyeva həmin guşənin uzun müddət təhsil
müəssisəsində saxlanılacağını diqqətə çatdırıb.
Ş.Nağıyeva, həmçinin tədbir iştirakçılarına "Xocalıya
ədalət!" kampaniyası çərçivəsində hazırlanmış bukletlər,
eləcə də erməni işğalını göstərən xəritələr
paylanıldığını söyləyib. Bildirilib ki, erməni terroru,
Xocalı faciəsi, eləcə də Azərbaycan tarixi və
mədəniyyəti, mətbəxi və s. ilə bağlı kitablar Dikin
Universitetinin kitabxanasına hədiyyə edilib.
Əsərləri Melburnda nümayiş olunan rəssam Nərminə
Vəliyeva layihənin gerçəkləşməsində xidməti olanlara
təşəkkürünü bildirib.
Amerikalı şair və tədqiqatçı Əlison Məndəvil "Sönməz
məşəl" Mədəni Əlaqələr İctimai Birliyinin həyata
keçirdiyi layihələrin əhəmiyyətindən bəhs edib.
Tədbirdə Melburnda keçirilən sərgi barədə fotoşəkillər,
İctimai Televiziyada hazırlanan verilişdən fraqment
nümayiş etdirilib.
Azərbaycan Respublikasının Prezidenti yanında
Qeyri-Hökumət Təşkilatlarına Dövlət Dəstəyi Şurasının
maliyyə yardımı ilə həyata keçirilən layihənin məqsədi
respublikamızın uzaq Avstraliyada təbliği, zəngin
mədəniyyətimizin bu ölkədə tanınmasına xidmət göstərmək,
Azərbaycan həqiqətləri barədə məlumatlar verməkdir.
Şakir CƏFƏROV,
"Azərbaycan müəllimi" |