|
İyulun 11-də Bakı Dövlət Universitetində növbəti tyutor
hazırlığı kurslarını başa vurmuş tyutorlara
sertifikatların təqdimetmə mərasimi keçirilib. Tədbirdə
çıxış edən rektor, akademik Abel Məhərrəmov bildirib ki,
2008-ci ildən başlayaraq Avropa Birliyinin "Cənubi
Qafqazda elektron cəmiyyətin inkişafı" layihəsi
çərçivəsində Boloniya prosesinin baza prinsiplərinin və
"Virtual universitet"in təhsil sisteminə tətbiqinin
öyrənilməsi ilə əlaqədar tyutor hazırlığı kurslarına
başlanılıb. Əvvəlki buraxılışlarda Bakı Dövlət
Universiteti və respublikanın aparıcı ali təhsil
ocaqları üçün tyutor hazırlanıb. Boloniya prosesindən
irəli gələn işlərin həyata keçirilməsinə kömək məqsədilə
universitetlər üçün tyutor hazırlığı davam edir. Rektor
onu da deyib ki, Azərbaycan Respublikası təhsil
nazirinin ali təhsil müəssisələrinin rəhbərlərinə
göndərilən müvafiq məktubu əsasında BDU-da aparıcı ali
təhsil ocaqları üçün təşkil olunmuş tyutor hazırlığı
kursları 1 noyabr 2013-cü il tarixindən 30 iyun 2014-cü
il tarixinədək öz işini davam etdirərək 6-cı
buraxılışını başa vurub. Kursun keçirildiyi müddətdə
təhsilini və yekun imtahanını müvəffəqiyyətlə başa
vurmuş namizədlərdən 32 nəfəri A sertifikatına
(qırmızı), 10 nəfəri B sertifikatına (göy), iki nəfəri
isə C sertifikatına (dinlədi) layiq görülüb. Sertifikata
layiq görülənlərin 25 nəfəri respublikanın digər ali
məktəblərini təmsil edib. Kursun BDU-dan olan 19 nəfər
iştirakçısının hər biri namizədlikləri irəli sürülmüş
fakültələrdə və müvafiq strukturlarda işlə təmin
ediləcəklər. Onu da qeyd edək ki, indiyədək tyutor
kursunun 5 buraxılışını bitirmiş hər bir tyutor
universitetdə işlə təmin olunub.
Təhsil nazirinin müşaviri İlham Pirməmmədov tədbirdə
çıxış edərək tyutor hazırlığı kursları sahəsində Bakı
Dövlət Universitetinin təcrübəsini xüsusi vurğulayıb və
müdavimlərə uğurlar arzulayıb.
BDU-nun İnformasiya Texnologiyaları Mərkəzinin müdiri
Əzbər Sadayev indiyədək keçirilmiş tyutor hazırlığı
kursu ilə bağlı təqdimat edib.
Sonra Azərbaycan Dövlət Rəssamlıq Akademiyasından Samirə
Süleymanova, Əmək və Sosial Münasibətlər Akademiyasından
Xaqani Məmmədov çıxış edərək yaradılmış şəraitə görə
Təhsil Nazirliyi və Bakı Dövlət Universitetinə
minnətdarlıq ediblər.
Mətbuat və informasiya şöbəsi |
