"ADA" Universitetinin Xəzər Enerji və Ətraf Mühit
Mərkəzi Azərbaycan Respublikası Dövlət Neft Şirkəti ilə
birgə 8-ci Bakı Yay Enerji Məktəbini uğurla başa
çatdırıb.
Universitetdən AzərTAc-a verilən məlumata görə, iyulun
8-12-də baş tutmuş Yay Enerji Məktəbində bu il ABŞ,
Almaniya, Rumıniya, Oman, Yunanıstan, Bolqarıstan,
Küveyt, Meksika, Macarıstan, Belçika, Özbəkistan,
İtaliya, İran, Venesuela, İspaniya, Türkiyə, Xorvatiya,
Norveç, Qazaxıstan və Azərbaycandan 39 iştirakçı iştirak
edib. İki həftəlik sertifikat proqramı qlobal və Xəzər
enerji, ətraf mühit məsələlərini təhlil etmək və bu
sahələr üzrə daha yaxşı anlayış əldə etmək üçün dünyanın
tanınmış alimlərini, akademiklərini və siyasətçilərini
bir araya gətirib. Regional boru xətti və enerji
təhlükəsizliyinin inkişafı ilə yanaşı, iştirakçılar
enerjinin əsasları, enerji hüququ və iqtisadiyyatı,
ətraf mühitə təsir, neft və qaz sənayesində idarəçilik
və ARDNŞ-in strateji perspektivləri kimi məsələlərlə
daha geniş tanış olmaq imkanı əldə ediblər.
Bakı Yay Enerji Məktəbi dünyanın hər yerindən olan
dövlət və özəl sektor rəhbərləri ilə görüşmək və əlaqə
qurmaqda böyük imkanlar yaradır. İştirakçılar
Azərbaycanın xarici işlər, energetika, ekologiya və
təbii sərvətlər nazirləri ilə yanaşı TAP, bp, ExxonMobil,
Total, Statoil, LUKOIL neft şirkətləri rəhbərlərinin
əsas məruzəçi olduqları yay məktəbində problemli
məsələləri müzakirə ediblər. Yay məktəbində Oxford,
Sciences-Po, Prinston universitetlərindən, Rusiya Elmlər
Akademiyasından dünya elminin görkəmli mütəxəssisləri də
iştirak ediblər. Bu proqram Bakı-Tbilisi-Ceyhan boru
xətti, Səngəçal neft terminalı, palçıq vulkanları,
Azərbaycanın ilk neft maqnatı Hacı Zeynalabdin Tağıyevin
və dünya şöhrətli Nobel qardaşlarının ev-muzeyləri kimi
Azərbaycanın qədim və müasir neft sənayesi ilə bağlı
olan yerləri gəzmək üçün imkan yaradıb.
Proqram tamamlandıqdan sonra iştirakçılar "ADA"
Universitetinin sertifikatları ilə mükafatlandırılıblar.
|