Azərbaycan Dövlət İqtisad Universitetində (ADİU) orta
ixtisas təhsili müəssisələrinin rəhbərləri üçün "Kredit
sistemi ilə tədrisin təşkili qaydaları"na dair təlim
proqramını müvəffəqiyyətlə bitirənlərə sertifikatlar
təqdim olunub.
Azərbaycan Dövlət İqtisad Universitetindən AzərTAc-a
bildiriblər ki, bu münasibətlə təşkil olunan mərasimdə
ADİU-nun rektoru, professor Ədalət Muradov təhsil
müəssisəsində kredit sistemi ilə tədrisin
müvəffəqiyyətlə tətbiq edildiyini xatırladıb.
Eyni zamanda qeyd olunub ki, təlimlərdə dinləyicilər
kredit sistemində Təhsil Nazirliyi tərəfindən müəyyən
olunmuş formalar, tədris prosesinə nəzarətin təşkili,
tələbə və müəllim mobilliyi, təcrübə, yay semestri,
yekun dövlət attestasiyasının təşkili və s. barədə
məlumatlar əldə ediblər.
Təhsil nazirinin müşaviri İlham Pirməmmədov bildirib ki,
Təhsil Nazirliyinin xətti ilə həyata keçirilən "Orta
ixtisas təhsili müəssisələri üçün tyutor hazırlığı"
proqramının davamı kimi təşkil olunan təlimlərdə 54
kollecdən 62 nəfər iştirak edib. |