BƏRDƏ.
Rayon təhsil şöbəsindən bildiriblər ki, təhsil
müəssisələrinin maddi-texniki tədris bazasının
möhkəmləndirilməsi, yeni məktəb binalarının tikintisi
diqqət mərkəzindədir.
Son illərdə rayonda 21 yeni məktəb binası tikilərək
istifadəyə verilib. Hazırda Qazaxlar kəndində 180,
Nazırlı kəndində 220, Bərdə şəhər 7 nömrəli tam orta
məktəbi üçün 380 şagird yerlik məktəb binaları tikilir.
Şəhər 2 və 6 nömrəli tam orta məktəbləri isə əsaslı
təmir olunur. Bu məktəb binalarının yeni tədris ilində
istifadəyə verilməsi nəzərdə tutulur.
KÜRDƏMİR.
Rayon təhsil şöbəsindən aldığımız məlumatda bildirilir
ki, rayonun ümumtəhsil məktəblərinin maddi-texniki
bazasının möhkəmləndirilməsi istiqamətində işlər davam
edir. Hazırda Xınıslı və Mürtülü kənd tam orta
məktəbləri üçün 180 şagird yerlik təzə binalar dövlət
vəsaiti hesabına tikilir.
Hər iki binada tədrisin yüksək səviyyədə təşkili üçün
bütün lazımi şərait yaradılacaq.
Tədris ocaqları müasir istilik sistemi ilə də təchiz
ediləcək. Hər iki məktəb yeni dərs ilində istifadəyə
veriləcək.
YEVLAX.
Rayon təhsil şöbəsindən aldığımız məlumata görə, yeni
dərs ilində 1176 şagird yerlik şəhər 3 nömrəli tam orta
məktəbdə əsaslı təmir işləri başa çatmaq üzrədir. Bundan
başqa, rayonun Əcəmi və Yuxarıbucaq kəndlərində də 180
şagird yerlik ümumi orta məktəb binaları yeni dərs
ilində qapılarını şagirdlərin üzünə açacaq.
Müasir standartlara cavab verəcək bu binaların
maddi-texniki bazası tədrisin yüksək səviyyədə təşkilinə
imkan verəcək.
GÖYGÖL.
Rayon təhsil şöbəsindən redaksiyamıza daxil olan
məlumata görə, rayonun Şəhriyar kəndində 180 şagird
yerlik tam orta məktəb, Bəhrəmbağ və Üçbulaq
kəndlərinin hər birində isə 80 şagird yerlik ümumi
orta məktəb binaları dövlət vəsaiti hesabına inşa
olunur.
Məktəb binaları yeni, müasir istilik sistemi, geniş və
rahat sinif otaqları, fənn kabinetləri, laboratoriyalar,
idman, iclas zalları və s. təmin olunacaq.
Şakir CƏFƏROV,
"Azərbaycan müəllimi" |