|
Xəbər verildiyi kimi, Tələbə Qəbulu üzrə Dövlət
Komissiyası tərəfindən ali təhsil müəssisələrinə və tam
orta təhsil bazasında (11 illik) orta ixtisas təhsili
müəssisələrinə cari ilin məzunları üçün II və III
ixtisas qrupları üzrə iyulun 20-də keçirilmiş qəbul
imtahanlarının nəticələri açıqlanıb. İmtahanlarda qəbul
üçün sənəd vermiş 31326 (15562 nəfər II ixtisas qrupu
üzrə, 15764 nəfər III ixtisas qrupu üzrə) abituriyentdən
813-ü iştirak etməyib. II ixtisas qrupu üzrə 11079, III
ixtisas qrupu üzrə isə 10569 nəfər müsabiqə şərtini
ödəyərək ixtisas seçiminə buraxılıb. İmtahanlarda II
ixtisas qrupu üzrə 2 nəfər ən yüksək nəticə - 700 bal
toplayıb. Aşağıda onları təqdim edirik.
 Qoşqar
QƏDİMBƏYLİ
1997-ci ildə Bakıda anadan olub. 2003-cü ildə 245
nömrəli tam orta məktəbdə birinci sinfə gedib. Burada
ibtidai təhsil pilləsini başa vurduqdan sonra təhsilini
287 nömrəli "Zəkalar" liseyində davam etdirib və 2014-cü
ildə buradan məzun olub.
"Zəkalar" liseyinin direktoru, əməkdar müəllim Aygün
Əhmədlinin dediyinə görə, Qoşqar liseydə çox yaxşı
oxuyub. Bütün fənlərdən yüksək qiymətlər alıb,
nizam-intizamı ilə seçilib. Ümumiyyətlə, onların sinfi
eksperimental sinif kimi nəzərdə tutulub və çox fəal
olub. Ən yaxşı müəllimlər bu sinifdə dərs deyiblər.
Qoşqar digər şagird yoldaşları ilə birlikdə bilik
yarışlarında, fənn olimpiadalarında iştirak edib,
olimpiadanın şəhər turunun qalibi olub. Bu il isə
Gənclər və İdman Nazirliyinin reallaşdırdığı
"İstedadların hazırlığı laboratoriyası" layihəsi
çərçivəsində keçirilən respublika olimpiadasının
finalında gümüş medala layiq görülüb.
Qoşqar yaxşı oxumaqla kifayətlənməyib, qəbul
imtahanlarında 700 bal toplamaq üçün də mübarizə aparıb.
O, həm də yaxşı şahmatçı kimi liseydə tanınıb. Şahmat
üzrə Avropa çempionatında uğurla iştirak edib. Onun
kiçik qardaşı Abdulla Qədimbəyli isə şahmat üzrə ikiqat
dünya və Avropa çempionudur.
Bütün bu uğurlarına, eləcə də ictimai işlərdə fəallığına
görə Qoşqar liseyin rəhbərliyi tərəfindən qızıl medala
təqdim olunub.
Qoşqar özü isə deyir ki, mən 700 bal nəticəsini
gözləyirdim. Çünki sınaq imtahanlarında 646-674 arasında
bal toplamışdım. Qəbul imtahanlarında da bütün testləri
düzgün cavablandırmağıma əmin idim. Elə testlərin düzgün
cavabları elan olunanda 700 bal topladığımı yəqin etdim.
Lakin bu, tam yəqinlik üçün kifayət deyildi. TQDK-nın
imtahanın nəticələri barədəki rəsmi açıqlamasını
gözləmək lazım gəlirdi. Bu açıqlama olanda isə mən
həqiqətən 700 bal topladığımı bildim və çox sevindim.
 Samir
RZAYEV
1997-ci il iyun ayının 18-də Bakı şəhərində anadan olub.
İbtidai məktəbə yaşadığı Binəqədi rayonundakı 246
nömrəli məktəbin 1 "b" sinfində başlayıb. 2007-ci ildə
4-cü sinfi bitirdikdən sonra Türkiyə Diyanət Vəqfi Bakı
Türk Liseyinə daxil olub. Oxuduğu müddət ərzində
müəllimlərin və müdiriyyətin hörmətini qazanıb,
dərslərdə fəallığı və hazırcavablığı ilə seçilib.
Təlim-tərbiyəsi ilə yoldaşlarına nümunə olub, məktəbdə
və məktəbdənkənar bilik yarışlarında fərqlənib. IX
sinifdən 2 -ci ixtisas qrupunu seçərək dərsləri ilə daha
müntəzəm məşğul olmağa başlayıb. Müəllimləri ilə sıx
münasibət qurub, bir çox fəxri fərman və təqdirnamələrlə
təltif edilib.
Digər şagirdlərdən fərqli olaraq əlavə müəllim yanına
getməyərək, liseyin təşkil etdiyi kurslarda davamlı
olaraq iştirak edib. Tələbə Qəbulu üzrə Dövlət
Komissiyasının təşkil etdiyi sınaq imtahanlarında
600-dən yuxarı bal toplayaraq yüksək nəticələr
göstərib. Bütün bunlar isə onda özünə olan inamını
artırıb.
Arzusu imtahanlarda maksimum nəticə göstərərək 700 bal
toplamaq olub.
Bizimlə söhbətində Samir "700 bal toplayacağını
gözləyirdinmi" sualına belə cavab verdi:
- İmtahan testlərinin cavablarını yaxşı yazmışdım.
Yüksək bal toplayacağıma əmin idim. Lakin, doğrusu, 700
balı gözləmirdim. O həm mənim üçün, həm də
müəllimlərimə, valideynlərimə, bir növ, sürpriz oldu.
Xəbəri eşidəndə çox sevindim.
2-ci ixtisas qrupunu seçməkdə ona biznesə,
iqtisadiyyata, maliyyəyə olan marağı kömək olub. Bu
işdə valideynlərinin və müəllimlərinin dəstəyini də
alıb.
Hazırda "ADA" Universitetində "Biznesin idarə edilməsi"
ixtisası üzrə təhsil almağı düşünsə də gələcəkdə
dünyanın daha prestijli təhsil ocaqlarında öz təhsilini
davam etdirmək arzusundadır.
Biz inanırıq ki, o, bu arzusunu da gerçəkləşdirərək,
vətəninə, ölkəsinə, millətinə layiqli vətəndaş olacaq.
Hazırladı:
Yusif ƏLİYEV,
"Azərbaycan müəllimi" |
