Artıq 18 ildir ki, Azərbaycanda uşaq muğam festivalları
təşkil edilir. Bu festivallar "Kainat" Gənclik Mərkəzi,
Gənclər və İdman Nazirliyinin dəstəyi ilə həyata
keçirilir. 2009-cu ildən bu festival artıq beynəlxalq
status alıb. Bu il keçiriləcək 6-cı beynəlxalq tədbirə
ölkəmizlə yanaşı, Türkiyə, Özbəkistan, Türkmənistan,
Qazaxıstan, Hindistan, İran, Tacikistan, İraq və Misirin
uşaq muğam ifaçılarının qatılacağı da gözlənilir.
Festivalın münsiflər heyətinə tanınmış tarzən, xalq
artisti, professor Ağasəlim Abdullayev rəhbərlik edəcək.
Ölkəmizi bu festivalda təmsil edəcək istedadlar da
artıq bəlli olub. Onlar Qax rayonundan olan Mövlud
Muxtarzadə və Qəbələdən Rəsul Mahmudovdur. Yeri
gəlmişkən qeyd edək ki, gələcəkdə Daşkənddə keçiriləcək
"Ana yurdun rəngləri" beynəlxalq instrumental ifaçılar
festivalına azərbaycanlı gənclər də dəvət olunub.
Gənclər və İdman Nazirliyinin dəstəyi, Mədəniyyət və
Turizm Nazirliyinin iştirakı və "Kainat" Gənclik
Mərkəzinin təşkilatçılığı ilə keçirilən ənənəvi
beynəlxalq uşaq muğam festivalı xarici ölkələrdə artıq
örnək halına çevrilməkdədir. |