|
Amerikalı MeriMoniz 100 yaşında attestat alıb |
|
 Amerikalı
təqaüdçü, Massaçusets ştatının sakini Meri
Moniz 100 yaşında attestat alıb. Ştatın
təhsil departamentinin rəhbəri bu günlərdə
Meri Monizə baş çəkərək çoxdan gözlənilən
attestatı ona təqdim edib.
Həyat elə gətirib ki, Meri Moniz cəmi 2 sinif
oxuyub, onun ailəsi yaşayış yerini dəyişməli
olub.
Uzun illər keçdikdən sonra məktəb təhsilini
unudan qadın metal konstruksiyalar istehsal edən
müəssisədə işə düzəlib. Meri Moniz uşaqlıqda
tarix müəllimi olmağı arzulayıb. Qadın orta
məktəbin attestatını almağın onun üçün böyük
fəxr olduğunu bildirib.
Qeyd edək ki, bundan əvvəl 2014-cü ildə analoji
sənədi Virciniya ştatının 111 yaşlı sakini alıb.
Qadın məktəbi 1918-ci ildə 15 yaşında atıb. |
|
|
Dünya universitetlərinin veb-saytlarının növbəti
reytinqi açıqlanıb |
|
 Dünya
universitetlərinin yeni reytinq cədvəli (Webometrics
Ranking of World Universities) açıqlanıb. Cədvəl
ali məktəblərin internet-saytlarının keyfiyyət
göstəricilərinə əsaslanır. Siyahı 2004-cü ildən
ildə iki dəfə (yanvar-avqust) İspaniyanın
tədqiqat qrupu olan Cybermetrics Lab tərəfindən
tərtib olunur. Bu dəfə Cybermetrics Lab
dünyanın 22 min universitetinə məxsus internet-saytları
təhlil edib. Tərtibçilər təşkilatın saytında
səhifələrin sayı, digər resurslardan
sitatgətirilmə, faylların (cədvəl, təqdimat,
mətn) sayı və başqa kriteriyaları nəzərə alıblar.
Reytinqin ilk onluğuna aşağıdakı universitetlər
daxildir: Harvard Universiteti, Massaçusets
Texnologiya Universiteti, Stenford Universiteti,
Kornell Universiteti, Miçiqan Universiteti,
Kaliforniya Berkli Universiteti, Nyu-York
Kolumbiya Universiteti, Vaşinqton Universiteti,
Minnesotta Universiteti, Pensilvaniya
Universiteti.
İlk 20 universitet arasında Amerikadan olmayan
cəmi 3 universitet - Toronto, Kembric və Oksford
universitetləri yer alıb. |
|
|
Sinqapur Asiyanın regional təhsil mərkəzinə
çevrilir |
|
 Sinqapur
regional təhsil mərkəzi kimi öz mövqeyini
gücləndirməkdədir. Buna əyani nümunə kimi
Sinqapur Milli Universitetinin (NUS) Asiya
universitetlərinin reytinq cədvəlinin yuxarı
hissəsində yer alması göstərilir. Bundan
başqa, bu il Nanyanq Texnoloji Universitetinin
(NTU) də reytinq vəziyyəti yaxşılaşıb.
NTU reytinq cədvəlində 9-cu yerdən 7-ci yerə
yüksəlib. Bütün bunlar regionda Sinqapur
universitetlərinin nüfuzunun artmasından xəbər
verir. Analitiklər qeyd edirlər ki, son vaxtlar
Sinqapur və Koreya Honkonq və Yaponiyanı
sıxışdırmaqla regionda aparıcı təhsil mərkəzinə
çevriliblər. Bütün bunlar Sinqapurda
universitetlərdə aparılan elmi tədqiqatlara
ayrılan maliyyə vəsaitlərinin həcminin
artırılması ilə izah olunur.
Digər tərəfdən ingilis dilində tədris olunan
akademik proqramların sayı da artıb. Hazırda
Sinqapur il ərzində 70 mindən artıq əcnəbi
tələbə qəbul edir. Son vaxtlar isə hökumət
daha çox yerli tələbələrə təhsil vermək
məqsədilə əcnəbi tələbələrin sayını
məhdudlaşdırmağa başlayıb.
Bununla belə, Sinqapur təhlükəsiz, tolerant,
multikultural və texnoloji cəhətdən inkişaf
etmiş bir ölkədir və bunlar əcnəbi
tələbələrə əyani təhsil dövründə həftədə 16
saat işləməyə imkan verir. |
|
|
Əcnəbi tələbələr Almaniyada qalmağa üstünlük
verirlər |
|
 Alman
Akademik Mübadilə Proqramları xidmətinin (DAAD)
statistik məlumatlarına əsasən, ölkə
universitetlərində təhsil alan hər 10 tələbədən
biri (11,3 faiz) əcnəbidir. DAAD-ın apardığı
sorğuya müvafiq olaraq məzunların 30 faizi ali
təhsili başa vurduqdan sonra Almaniyada qalmağa
üstünlük verir. Əcnəbilərin 40 faizi ən azı 10
il müddətinə, yalnız 7 faizi qısa müddətdə bu
ölkədə qalıb işləmək istəyir. Qüvvədə olan
qanunvericiliyə görə, ölkənin ali məktəblərində
təhsil almış əcnəbilər məzuniyyətdən sonra 18 ay
müddətində ölkə ərazisində qala və aldıqları
ixtisas üzrə məhdudiyyətsiz olaraq işləyə
bilərlər.
Sorğuda iştirak etmiş 11000 tələbədən 64 faizi
işlə təmin olunub, 7 faiz qeyri-tam iş günü
işləyir, 7 faiz özəl sahibkarlıqla məşğuldur,
6,8 faiz isə iş axtarır. Almaniyanın Statistika
Agentliyinin məlumatına əsasən bu il ölkədə 300
min əcnəbi tələbə təhsil alır. |
|
|
Ukraynada ali təhsil haqqında yeni qanun qüvvəyə
minib |
|
 Bu
barədə ölkənin təhsil və elm naziri Sergey Kvit
özünün facebook səhifəsində xəbər verib. Onun
sözlərinə görə, ölkə başçısı Pyotr Poroşenkonun
imzaladığı qanun ali təhsil müəssisələrinin
müstəqil fəaliyyət göstərməsini, ali təhsil və
elm sahəsində universitet-biznes əməkdaşlığını
nəzərdə tutur.
Nazir əlavə edib ki, Ukrayna ali təhsili
postsovet qalıqlarını aradan qaldıraraq tamamilə
fərqli reallıqda özünü göstərməyə başlayıb.
Ukrayna prezidentinin mətbuat xidmətinin
məlumatına əsasən, qanun ali təhsilin
yeniləşməsinin konseptual əsaslarını - Ukrayna
ali təhsilinin Boloniya prosesi prinsipləri və
müddəaları əsasında Avropa məkanına
inteqrasiyasını, ali təhsilin keyfiyyətinin
inkişaf etdirilməsi yolu ilə elm və təhsilin
keyfiyyətinin təmin olunmasını, ali təhsil
müəssisələrinin muxtariyyətini müəyyən edir.
Xatırladaq ki, ölkə parlamenti iyulun 1-də "Ali
təhsil haqqında" qanun qəbul edib. Ali
məktəblərin nizamnaməsi bu qanunla təsisçi
tərəfindən təsdiq olunur. |
|
|
İspaniyanın ali təhsil sistemində ciddi
dəyişiklik |
|
 "ICEF
Monitor" qəzetinin məlumatına əsasən, dəyişiklik
universitetlərə qəbul qaydaları ilə əlaqədardır.
Ölkə başçısı tərəfindən imzalanmış sərəncama
uyğun olaraq əcnəbi tələbələrə bakalavr
proqramına daxil olmaq üçün Selectividad
imtahanlarının nəticələrini tətbiq etmək lazım
gəlməyəcək. Əvvəllər potensial tələbələrdən ən
azı 7000 nəfəri bu imtahanları verməli idi. İndi
isə universitetlərə qəbul zamanı orta təhsil
haqqında attestat və DELLE səviyyəsində ispan
dilini bilmək tələb olunur. İspaniyada 82
universitet fəaliyyət göstərir, bu təhsil
ocaqlarında 1,5 milyon tələbə təhsil alır.
Onlardan 800 min tələbə dövlət ali
məktəblərində oxuyur. İllik təhsil haqları isə
680-1400 avro təşkil edir. 2012-2013-cü dərs
ilində İspaniyanın ali məktəblərinə 73639 əcnəbi
tələbə daxil olub. Onların əksəriyyəti İtaliya,
Kolumbiya, Çin, Rumıniya və Mərakeş
vətəndaşlarıdır. Bir sıra universitetlərin
rəhbərləri qeyd edirlər ki, "Selectividad"ın
ləğvi əcnəbi tələbələrin sayını artıracaq. Bu
isə ingilisdilli universitet proqramlarının
sayını artıracaq. Hazırda dövlət sektorundan
fərqli olaraq özəl ali məktəblərdə daha çox
ingilisdilli proqramlar tədris olunur. Bunlar
əsasən bizneslə əlaqədar olan magistr
proqramlarıdır. |
| |
|
Oruc
MUSTAFAYEV,
"Azərbaycan müəllimi"
xarici mətbuat materialları əsasında |
|
