|
Azərbaycan Respublikasının İnsan Hüquqları üzrə
Müvəkkilinin (Ombudsman) uşaq hüquqları üzrə resurs
mərkəzi olan Azərbaycan Uşaq və Gənclərin Sülh Şəbəkəsi
(AUGSŞ) Azərbaycan Respublikası Dövlət Neft Şirkətinin
dəstəyi ilə Eko-parkda ətraf mühitin mühafizəsi üzrə
növbəti maarifləndirmə tədbiri keçirib.
Ombudsman Aparatından AzərTAc-a bildirilib ki, "Məktəb
bağları" adlı tədbir uşaqlarda ekoloji tərbiyə və
mədəniyyətin formalaşmasına, onların davamlı ekoloji
tədqiqat prosesinə cəlb olunmasına, sağlam ətraf mühitdə
yaşamaq hüququnun müdafiəsinə, ekoloji vəzifələr və
məsuliyyətin təbliğinə yönəlib.
Tədbirdə Azərbaycan Respublikası Təhsil Nazirliyi,
Ombudsman Aparatının əməkdaşları, Ekologiya İdarəsinin
gənc mütəxəssisləri, Bakıda fəaliyyət göstərən orta
məktəblərin nümayəndələri iştirak ediblər.
Tədbirdə vurğulanıb ki, əsas məqsəd ictimaiyyətin
diqqətini məktəblərdə həyətyanı sahələrin
abadlaşdırılması və "Məktəb bağları"nın yaradılması
zəruriliyinə cəlb etməkdir. Eyni zamanda, uşaqların
iştirakı ilə ekoloji hüquq və ətraf mühitin mühafizəsinə
dair reallaşmış layihələr haqqında təqdimatlar olub.
Ekoloji problemlərin məhz uşaqlar tərəfindən
araşdırılması və təhlil edilməsi yüksək qiymətləndirilib,
bu cür layihələrin gənc nəslin ekoloji davranışının
formalaşmasına yönəldiyi qeyd edilib.
Tədbirdə AUGSŞ-nin üzvlərinin təşkil etdikləri "Məktəb
bağları" adlı rəsm və foto sərgisi də nümayiş etdirilib.
|
