Javascript DHTML Drop Down Menu Powered by dhtml-menu-builder.com

ARXİV

5 Sentyabr 2014 - №34

 

Təhsil işçilərinin sentyabr konfranslarında görülən işlərdən və qarşıda duran vəzifələrdən danışılıb

 

Qubadlı.  Sumqayıtda yerləşən Qubadlı Rayon İcra Hakimiyyətinin akt zalında təhsil işçilərinin ənənəvi sentyabr konfransı keçirilib. Konfransın işində Təhsil Nazirliyinin nümayəndəsi İlham Pirməmmədov iştirak edib.

Tədbirin iştirakçıları əvvəlcə ümummilli lider Heydər Əliyevin rayon icra hakimiyyətinin inzibati binasının foyesindəki büstünün önünə gül dəstələri düzüb, xatirəsini ehtiramla yad ediblər.

Konfransda rayon təhsil şöbəsinin müdiri Afət Allahverdiyeva məruzə ilə çıxış edərək hər il olduğu kimi, 2013-2014-cü tədris ilində də rayonun təhsil sahəsində yüksək nailiyyətlər qazanıldığını qeyd edib. O bu uğurları dövlət başçısının təhsil sahəsinə göstərdiyi qayğının nəticəsi kimi qiymətləndirib.

Məruzədə qeyd olunub ki, məhz bu qayğı sayəsində rayonda fəaliyyət göstərən məktəblər yeni dərs ilinə hazırdır. Məktəblərin əksəriyyətində müasir istilik sistemi quraşdırılıb, bütün təhsil müəssisələri lazımi inventarlarla təchiz olunub.

Hər il yüzlərlə məzunu tələbə adını qazanan Qubadlı rayonunda bu tədris ilində də orta məktəbi bitirən 355 məzundan 170 nəfəri ali məktəblərə qəbul olunub.

Bildirilib  ki, bu il tələbə adını qazananların 21 nəfəri 500-dən, 8 nəfəri isə 600-dən yuxarı bal toplayıb.

Konfransda çıxış edənlər ötən dərs ilinin Qubadlı rayonu üçün uğurla nəticələndiyini qürur hissi ilə vurğulayıb və bunun ölkəmizdə aparılan siyasətin məntiqi nəticəsi olduğunu minnətdarlıqla qeyd ediblər.

Rayon icra hakimiyyətinin başçısı Malik İsaqov  çıxış edərək əsası ümummilli lider Heydər Əliyev tərəfindən qoyulan dövlət  siyasətində təhsil sahəsinə diqqətin prioritet olduğunu, Prezident İlham Əliyevin rəhbərliyi ilə bu işin yeni mərhələyə qədəm qoyduğunu vurğulayıb.

Bu siyasətin uğurlu nəticələrinin Qubadlı rayonunun həyatında da parlaq əks olunduğunu vurğulayan icra hakimiyyətinin başçısı bu istiqamətdə işlərin bundan sonra da davam etdiriləcəyini deyib.

Tədbirdə yüksək balla ali məktəblərə daxil olan məzunlara və təhsil sahəsində xüsusi fərqlənən pedaqoji işçilərə fəxri fərman və qiymətli hədiyyələr təqdim edilib.

Neftçala. Sentyabrın 2-də Neftçala rayon təhsil işçilərinin sentyabr konfransı keçirilib. Konfransda Təhsil Nazirliyinin və rayon icra hakimiyyətinin nümayəndələri, 120 nəfər təhsil işçisi, habelə ali məktəblərə tələbə qəbulunda 600-dən yuxarı bal toplamış məzunlar, idarə, müəssisə, təşkilat rəhbərləri iştirak ediblər.

İlk öncə Azərbaycan Respublikasının Dövlət himni səsləndirilib. Əsası ulu öndər Heydər Əliyev tərəfindən qoyulan və Azərbaycan Prezidenti cənab İlham Əliyev tərəfindən uğurla davam etdirilən təhsil sahəsində mütərəqqi islahatlardan danışan təhsil şöbəsinin müdiri Əjdər Kərimov "Azərbaycan Respublikasında təhsilin inkişafı üzrə Dövlət Strategiyası"ndan, təhsilalanların və təhsilverənlərin hüquq və qanuni mənafelərinin təmin edilməsi, müəllim nüfuzunun artırılması, istedadlı gənclərin müəllim peşəsini seçməsi üçün həyata keçirilən tədbirlər barədə söz açıb.

Bildirilib ki, "2013-2014-cü tədris ilində Neftçala rayonu üzrə ümumtəhsil müəssisələrinin 682 məzunundan 349 nəfəri ali məktəblərə qəbul imtahanlarında iştirak edib və onlardan 204 nəfəri ali məktəblərə qəbul olub. Onlardan 41  nəfəri 500, 8 nəfəri isə 600-dən yuxarı bal toplayıb.

Konfransda qabaqcıl müəllimlər və  ali məktəbə qəbul olmuş   tələbələr də çıxış edib.

Sonra Təhsil Nazirliyinin nümayəndəsi Faiq Şahbazlı və rayon icra hakimiyyəti başçısının birinci müavini Dilavər Əliyev çıxışlarında müəllimlərin qarşısında duran vəzifələrdən və dövlət başçısının gənc müəllimlərə göstərdiyi  qayğı və diqqətdən söz açıblar. 

Konfransın qərar layihəsi oxunduqdan sonra 600-dən yuxarı bal toplamış məzunlar və qabaqcıl təhsil işçiləri mükafatlandırılıb.

Yardımlı. Rayon təhsil işçilərinin konfransında öncə iştirakçılar ümummilli lider Heydər Əliyevin abidəsi önünə gül dəstələri qoyublar. Sonra uzun illər pedaqoji sahədə çalışmış və  dünyasını dəyişmiş müəllimlərin xatirəsi bir dəqiqəlik sükutla yad edilib.

Konfransın işində Təhsil Nazirliyinin nümayəndəsi Əhliyət Adıgözəlov, Yardımlı Rayon İcra Hakimiyyətinin  başçısı Sevindik Hətəmov, məktəbəqədər, ümumtəhsil, məktəbdənkənar tərbiyə müəssisələrinin rəhbərləri iştirak ediblər.  Azərbaycan Respublikasının Dövlət himni səsləndirildikdən sonra konfrans öz işinə  başlayıb.

Konfransda "2013-2014-cü tədris ilinin yekunları və yeni dərs ilində qarşıda duran vəzifələr" mövzusunda Yardımlı Rayon Təhsil Şöbəsinin müdiri Manaf Balışov hesabat məruzəsi ilə çıxış edib. Məruzədə qeyd olunub ki, ölkəmizdə baş verən sürətli iqtisadi inkişaf bütün sosial sahələrin, o cümlədən təhsilin inkişafına da əsaslı təkan verib. Ölkə rəhbərinin apardığı sosialyönümlü siyasətin nəticəsi olaraq son illər ərzində təhsilin inkişafı istiqamətində genişmiqyaslı tədbirlər həyata keçirilib.  Təkcə onu demək kifayətdir ki, 2013-2014-cü dərs ili ərzində rayonda 360 şagird yerlik Zövün, 220 şagird yerlik Avaş, Alçabulaq və Ostayır kənd tam orta məktəblərinin yeni  binaları tikilib şagird və müəllimlərin istifadəsinə verilib. Yaxın günlərdə Zenqaran, Solqard və Fındıqlı-Qışlaq kənd məktəbləri üçün tikilən binaların istifadəyə verilməsi də gözlənilir. Hazırda rayonun Anzov, Çayüzü, Qaraqaya, Urakəran, şəhər 3  və 4 nömrəli  tam orta məktəblərinin binalarının tikintisində qızğın iş gedir.

Rayonun ümumtəhsil məktəblərinin nəticə göstəricilərinə  görə, tam orta təhsil üzrə attestat alan 692 nəfərdən 286 nəfəri ali məktəblərə qəbul olmaq üçün TQDK-ya sənəd verib. Onlardan  119 nəfəri, yəni 42 faizi qəbul imtahanlarından müvəffəq qiymət alaraq ali məktəblərə qəbul olub. Qəbul olanlardan 5 nəfər 600-dən, 11 nəfər isə 500-dən yuxarı bal toplayıb.

Bildirilib ki, təhsil şöbəsi məktəblərin İKT ilə təminatını nəzərdə saxlayaraq il ərzində kompüter avadanlıqları, eləcə də kifayət qədər elektron dərs vəsaitləri alaraq məktəblərə paylayıb. Bu il V və VII siniflərdə dərs deyəcək 422 nəfər fənn müəllimi informatika üzrə təlim kurslarından keçib.

Konfransda Hamarkənd kənd tam orta məktəbinin müəllimi Aslan Heydərov, Bərcan kənd tam orta məktəbinin müəllimi Hicran Rzayeva, Çayüzü kənd tam orta məktəbinin məzunu, 695 bal toplamış Elnur Əlizadə çıxış edərək nailiyyətlərdən söz açıblar.

Təhsil Nazirliyinin nümayəndəsi Əhliyət Adıgözəlov çıxış edərək təhsil işçilərinin qarşısında duran vəzifələr haqqında danışıb.  

Yardımlı Rayon İcra Hakimiyyətinin  başçısı Sevindik Hətəmov konfransda çıxış edərək  qarşıda duran vəzifələrdən  söz açıb, müəllimləri  yeni dərs ili münasibəti ilə təbrik edib.

Xızı. Xızı rayonunda  müəllimlərin ənənəvi sentyabr konfransında  90 nəfər müəllim iştirak edib.  Tədbiri giriş sözü ilə Xızı Rayon Təhsil Şöbəsinin müdiri Oqtay Abdullayev açaraq 2013-2014-cü tədris ilinin yekunları  və qarşıda duran vəzifələr barədə məruzə edib. Məruzə ilə yanaşı fotoslaydlar da nümayiş etdirilib. Hesabat  məruzəsində ölkə başçısı cənab İlham Əliyevin təhsilə göstərdiyi diqqət və qayğıdan geniş danışılıb.

Məruzədə buraxılış imtahanlarının məktəblər üzrə təhlili, qəbul imtahanlarının nəticələri xüsusi hazırlanmış cədvəllərdə nümayiş olunub. Bu il rayonun məzunlarından 71 nəfəri ali məktəbə qəbul olmaq üçün ərizə verib və onlardan 36 nəfəri ali, 9 nəfəri isə orta ixtisas məktəblərinə qəbul olub. 2 nəfər məzun - Giləzi qəsəbə tam orta məktəbini bitirmiş Atayeva Tünzalə Eltifat qızı 649 bal, Altıağac qəsəbə tam orta məktəbini bitirmiş Əmirov Sənan Fərhad oğlu isə 635 bal toplayıb.

Sonra Giləzi qəsəbə tam orta məktəbinin məzunu Tünzalə Atayeva, Xızı şəhər tam orta məktəbinin müəllimi Tural Fərəcov, Şuraabad qəsəbə tam orta məktəbinin direktoru Xatirə Həşimzadə, Xızı RİH başçısının təhsil, səhiyyə və mədəniyyət məsələləri üzrə müavini Jalə Süleymanova, YAP Xızı Rayon Təşkilatının sədri Fərrux Haqverdiyev və Təhsil Nazirliyinin  nümayəndəsi Əsgər Quliyev çıxış ediblər.

Ağdam.  Ağdam rayonunun Quzanlı qəsəbəsində təhsil işçilərinin ənənəvi sentyabr konfransı keçirilib. Tədbirdə Təhsil Nazirliyinin nümayəndəsi Ənvər İmanov iştirak edib.

Konfransda rayon təhsil şöbəsinin müdiri Elmira Şükürova ötən dərs ilinin yekunları və yeni tədris ilində qarşıda duran vəzifələrlə bağlı məruzə edərək, təhsilin inkişafı üçün həyata keçirilən tədbirlərdən, qazanılan uğurlardan danışıb. Bildirilib ki, ötən dərs ilində rayonda 139 ümumtəhsil məktəbi, o cümlədən 1 ibtidai, 21 ümumi orta, 117 tam orta məktəb, 5 məktəbdənkənar tərbiyə müəssisəsi fəaliyyət göstərib, 18 min 654 şagirdin təlim-tərbiyəsi ilə 3793 müəllim məşğul olub.

Ötən tədris ili ərzində Birinci Baharlı kənd orta məktəbi üçün yeni bina, İmamqulubəyli kənd məktəbi üçün əlavə 6 sinif otağı tikilib istifadəyə verilib, Əhmədağalı kənd tam orta məktəbi əsaslı təmir edilib.

Yeni salınan İmamqulubəyli qəsəbəsindəki 135 nömrəli məktəb üçün 440 şagird yerlik məktəb binası inşa olunub. Həsənxanlı və Hacıməmmədli kənd tam orta məktəblərinin hər biri üçün inşa edilən 120 yerlik binalar yeni dərs ilində istifadəyə veriləcək. Quzanlı qəsəbəsində istedadlar liseyinin və Əfətli kənd tam orta məktəbi üçün binaların tikintisi davam edir.

2014-cü ildə ümumtəhsil məktəblərini bitirən 1040 məzundan 580 nəfəri ali məktəblərə keçirilən imtahanlarda iştirak etmək üçün sənəd verib və onlardan 343-ü tələbə adını qazanıb. Gənclərdən 45 nəfəri 500-600 arası, 13-ü isə 600-dən çox bal toplayıb. Çəmənli kənd tam orta məktəbinin məzunu İlkin Məmmədzadə imtahanlarda 700 bal toplayaraq ən yüksək nəticə göstərib.

Yeni dərs ili ərəfəsində Qaçqınların və Məcburi Köçkünlərin İşləri üzrə Dövlət Komitəsi tərəfindən verilən 1896 dəst məktəbli forması və Heydər Əliyev Fondunun birinci siniflərdə oxuyacaq uşaqlara hədiyyəsi olan 2000 ədəd məktəbli çantası məktəblərə çatdırılıb. Yeni təhsil proqramlarının həyata keçirilməsi ilə bağlı avqust ayından başlayaraq təlimdən keçməyən sinif və fənn müəllimləri 10 günlük təlim kursuna cəlb ediliblər.

Konfransda digər çıxış edənlər də təhsilə göstərilən dövlət qayğısından, bu sahədə həyata keçirilən layihələrdən və aparılan islahatlardan, pedaqoji kollektivlərin qarşısında duran vəzifələrdən söhbət açıblar. 

Şakir CƏFƏROV,
"Azərbaycan müəllimi"

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov