|
 Sentyabrın
9-da Azərbaycan Dillər Universitetində 2014-2015-ci
tədris ilinin ilk Elmi Şurası keçirilib. İclasda Elmi
Şuranın müvafiq qərarına əsasən Macarıstanın ölkəmizdəki
fövqəladə və səlahiyyətli səfiri cənab Jolt Çutora
Azərbaycanla Macarıstan arasında dostluq və əməkdaşlığın
möhkəmləndirilməsi, elmi və mədəni əlaqələrin inkişaf
etdirilməsi, eləcə də macar dilinin Azərbaycanda
yayılması sahəsindəki fəaliyyətinə və təşəbbüslərinə
görə ADU-nun fəxri doktoru adı ilə təltif olunub.
Elmi Şurada ADU-nun rektoru, Milli Məclisin deputatı,
professor Səməd Seyidov çıxış edərək Azərbaycanla
Macarıstan arasında olan münasibətlərin əməkdaşlıq və
qardaşlıq səviyyəsində olduğunu bildirib. Rəhbərlik
etdiyi ali təhsil ocağı haqqında məlumat verən rektor
burada bir çox xarici dillərin tədrisi, o cümlədən bu
ildən regionşünaslıq və beynəlxalq münasibətlər
fakültəsinin nəzdində macar dilinin tədrisinə
başlanılması barədə də danışıb. Səməd Seyidov
Macarıstanla siyasi, iqtisadi münasibətlərlə yanaşı,
təhsil və elm sahəsində də əməkdaşlığın inkişaf etdiyini
bildirib. Macarıstanın Azərbaycan Respublikasındakı
fövqəladə və səlahiyyətli səfiri cənab Jolt Çutoranın bu
istiqamətdə əməyinin danılmaz olduğunu söyləyən rektor
səfirin 2014-cü il mayın 10-da Heydər Əliyev Fondu
tərəfindən təsis edilmiş "Qızıl Çinar" Beynəlxalq
mükafatına layiq görülməsini görülən işlərin yüksək
nəticəsi kimi qiymətləndirib. ADU-da macar dilinin
regionşünaslıq və beynəlxalq münasibətlər fakültəsi
nəzdində tədrisinə başlanılmasından sonra pedaqoji
fakültədə, həmçinin filologiya və jurnalistika
fakültələrində də tədrisinin nəzərdə tutulduğunu
vurğulayıb. Macarıstanla gələcək əməkdaşlıqlarda
qarşılıqlı mübadilə proqramlarının da inkişafı üçün səy
göstəriləcəyi qeyd edilib.
Öz növbəsində Macarıstanın Azərbaycan Respublikasındakı
fövqəladə və səlahiyyətli səfiri cənab Jolt Çutora
ADU-nun fəxri doktoru adına layiq görülməyin sevindirici
hal olduğunu bildirib. Səfir bu fəxri ada görə ADU-nun
Elmi Şurasına təşəkkürlərini bildirib. Azərbaycan və
təmsil etdiyi ölkə arasındakı işgüzar və qardaşlıq
əlaqələrinin inkişafından söz açan J.Çutora iki ölkənin
təhsil sahəsində əməkdaşlığının vacibliyini dilə
gətirib. ADU-da macar dilinin tədrisinin Azərbaycan -
Macarıstan əlaqələrinə töhfə kimi yüksək qiymətləndirən
Jolt Çutora universitetdə aparılan işlərin təqdirəlayiq
olduğunu vurğulayıb.
Sonra rektor Səməd Seyidov Fəxri doktor diplomunu və
mantiyanı səfirə təqdim edib.
İctimaiyyətlə əlaqələr departamenti |
