15
sentyabr "Bilik Günü" ölkəmizin hər yerində olduğu kimi,
Naxçıvan Muxtar Respublikasında da bayram
əhvali-ruhiyyəsi ilə qeyd olunurdu. Bu münasibətlə
Naxçıvan Dövlət Universitetində də yığıncaq keçirildi.
Tədbir ali təhsil ocağının tarixi inkişaf yolunu əks
etdirən universitet televiziyasının hazırladığı filmin
nümayişi ilə başladı. Rektor, AMEA-nın müxbir üzvü Saleh
Məhərrəmov çıxış edərək bildirdi ki, ümummilli lider
Heydər Əliyevin təhsil siyasətinin uğurlu davamı,
Azərbaycanda aparılan çoxsaylı təhsil islahatları
Naxçıvan Dövlət Universitetində də öz real inikasını
tapmaqdadır. Vurğulandı ki, universitetin 108 hektarlıq
ərazisində tikilən, əsaslı təmir olunaraq istifadəyə
verilən tədris korpusları, Tələbə Sosial Xidmət Mərkəzi,
Tələbə evi, Qonaq evi, idman meydançaları ölkədə və
Naxçıvan Muxtar Respublikasında təhsilə, kadr
hazırlığına göstərilən yüksək qayğının təzahürüdür.
Rektor Naxçıvan Dövlət Universitetinin tarixi inkişaf
yoluna nəzər salaraq bu ali məktəbin yüksək ixtisaslı
mütəxəssislər yetişdirən professor-müəllim heyətinə,
güclü maddi-texniki bazaya malik olan, beynəlxalq
əlaqələrini günbəgün genişləndirən ali təhsil ocağı
olduğunu diqqətə çatdırdı. Qeyq olundu ki, Naxçıvan
Dövlət Universiteti dünyaya inteqrasiya yolu tutmaqla
bir çox beynəlxalq layihələrdə uğurla iştirak edir.
Burada ali təhsil alan xarici ölkə vətəndaşlarının sayı
artmaqdadır. Baytarlıq ixtisası üçün nəzərdə tutulan
yeni tədris korpusu, tibb fakültəsinin kliniki
xəstəxanasının yeni binası tezliklə ən müasir
avadanlıqlarla təchiz olunmuş şəkildə istifadəyə
veriləcək ki, bu da universitetin maddi-texniki
bazasının gücləndirilməsinə göstərilən dövlət qayğısının
bariz təzahürüdür.
Boloniya sisteminin tam tətbiqinə nail olunması,
elektron universitet quruculuğu, distant təhsilin
tətbiqi istiqamətində də əhəmiyyətli uğurlar
qazanılmışdır. Bu uğurlar ali məktəbin reytinqinin
artmasına səbəb olmuşdur. Təsadüfi deyil ki, bu il 938
bakalavr, 107 magistr, o cümlədən 35 nəfər 600-dən
yuxarı bal toplayan tələbə ali təhsil almaq üçün
Naxçıvan Dövlət Universitetini seçmişdir. Rektor,
AMEA-nın müxbir üzvü Saleh Məhərrəmov ali məktəbə qəbul
olan tələbələri bir daha təbrik edərək çoxsaylı
universitet kollektivinə yeni tədris ilində uğurlar
dilədi. Yığıncaqda tibb fakültəsinin müalicə işi
ixtisası üzrə I kurs tələbəsi, Prezident təqaüdçüsü, 677
bal toplamış Amil Qasımov, 671 balla sosial idarəetmə və
hüquq fakültəsinin hüquqşünaslıq ixtisasına qəbul omuş
Aynur Cəfərova, Beynəlxalq münasibətlər və xarici dillər
fakültəsinin xarici dil müəllimliyi (ingilis dili)
ixtisası üzrə I kurs tələbəsi, 615 bal toplamış Sona
Səfərova, fizika-riyaziyyat fakültəsində fizika
müəllimliyi ixtisası üzrə ali təhsil alacaq, 606 bal
toplamış Nailə Vəliyeva, iqtisad fakültəsinin dünya
iqtisaiyyatı ixtisasına 601 balla qəbul olmuş Aytac
Yusifzadə çıxış etdilər. Çıxışlarda Azərbaycanda elmin,
təhsilin uğurlu inkişaf strategiyasından bəhs olundu,
təhsildə yaradılan yüksək şəraitə, hərtərəfli dövlət
qayğısına görə minnətdarlıq bildirildi. Sonda 600-dən
yuxarı balla universitetə qəbul olunmuş tələbələrə
tələbə bileti və qiymət kitabçası, "Naxçıvan
Ensiklopediyası" kitabı təqdim olundu.
Mehriban SULTAN,
NDU-nun Mətbuat şöbəsinin müdiri |