ARXİV

19 Sentyabr 2014 - №36

Şagirdlərimiz gənclərin XI Beynəlxalq Meşə Müsabiqəsində uğur qazanıblar

Bu ilin 8-12  sentyabr tarixlərində Rusiyanın Sankt- Peterburq şəhərində  gənclərin XI  Beynəlxalq Meşə Müsabiqəsi keçirilib. Rusiya Federasiyası Ekologiya və Təbii Sərvətlər Nazirliyi Federal Meşə Təsərrüfatı Agentliyi tərəfindən təşkil olunan müsabiqədə Azərbaycanı Respublika Ekoloji Tərbiyə və Təcrübəçilik Mərkəzinin direktor əvəzi Lalə Dadaşovanın rəhbərliyi altında Qax şəhər 3 nömrəli tam orta məktəbinin yetirmələri Ayla Əliyeva və Vüsalə Süleymanova təmsil ediblər. Dünyanın 27 ölkəsindən 60-a yaxın iştirakçının qatıldığı beynəlxalq müsabiqədə məktəblilərimizin çıxışları maraqla qarşılanıb və münsiflər heyətinin qərarı ilə şagirdlərimiz III yerə layiq görülüblər. Bu günlərdə redaksiyamızın qonağı olan nümayəndə heyətinin üzvlərinin beynəlxalq müsabiqə ilə bağlı fikirlərini, səfər təəssüratlarını oxucularımıza təqdim edirik:

Qələbəmizlə bir daha sübut etdik ki, Azərbaycanda ekoloji təhsilə maraq böyükdür 

Lalə DADAŞOVA,
Respublika Ekoloji Tərbiyə və Təcrübəçilik Mərkəzinin direktor əvəzi  

- Məlumat üçün qeyd edim ki, son illərdə Azərbaycan Respublikası Təhsil Nazirliyi, Ekologiya və Təbii Sərvətlər Nazirliyinin birgə əməkdaşlığı və "Avropa İttifaqı  Qonşuluq və Əməkdaşlıq  Aləti  Şərq Ölkələri Meşə  Sektorunda  Hüquq Tətbiqinin və İdarəetmə Sisteminin Təkmilləşdirilməsi" (ENPİ FLEG II) proqramının dəstəyi ilə məktəb meşəçiliyinin yaradılması istiqamətində bir sıra tədbirlər həyata keçirilir.

Artıq 3-cü ildir ki, Azərbaycan məktəbliləri gənclərin Beynəlxalq Meşə Müsabiqəsinə qatılırlar.

Respublika Ekoloji Tərbiyə və Təcrübəçilik Mərkəzinin və Qax şəhər 3 nömrəli tam  orta məktəbin "Meşənin dostları"  birliyinin üzvlərinin beynəlxalq  müsabiqəyə birgə təqdim etdiyi "Rekreasiyanın artmasının meşələrə mənfi təsiri" mövzusunda ekoloji layihə məktəblilərin meşəçilik sahəsində fəaliyyətinə həsr olunmuşdu. Layihənin müəllifləri "Gənc meşəçilər" dəstəsinin üzvləri, Qax şəhər 3 nömrəli tam orta məktəbin yetirmələri Ayla Əliyeva və Vüsalə Süleymanova idi. Onların hazırladıqları təqdimat iştirakçılar və münsiflər heyəti tərəfindən maraqla qarşılandı. Dünyanın tanınmış ekoloq  alim və mütəxəssislərindən  ibarət münsiflər heyəti tərəfindən yeniyetmə qızlarımızın çıxışları diqqətlə dinlənilərək sonda ən yaxşı layihələrdən biri  kimi qiymətləndirildi və III yerə layiq görüldü. Onlar Rusiya Federasiyası Ekologiya və Təbii Sərvətlər Nazirliyi Federal Meşə Təsərrüfatı Agentliyinin təsis etdiyi medal, diplom və qiymətli hədiyyələrlə mükafatlandırıldılar. Məktəblilərimizə mükafatı Rusiya Federasiyası Ekologiya və Təbii Sərvətlər Nazirliyi Federal Meşə Təsərrüfatı Agentliyinin sədr müavini A.İ.Panfilov və Rusiya Meşəçilər Cəmiyyətinin sədri, eyni zamanda  müsabiqənin münsiflər heyətinin sədri akademik A.İ.Pisarenko təqdim etdi.

Müsabiqədəki qələbəmizlə bir daha sübut etdik ki, Azərbaycanda ekoloji təhsilə maraq böyükdür.

Biz müsabiqədə yer tutacağımıza iddialı idik 

Ayla ƏLİYEVA,  
Qax şəhər 3 nömrəli tam orta məktəbin X sinif şagirdi

- Beynəlxalq müsabiqəyə təqdim etdiyimiz "Rekreasiyanın artmasının meşələrə mənfi təsiri" mövzusunda layihənin əsas məqsədi istirahət zonalarında  meşənin ekoloji vəziyyətinin pisləşməsinə  ictimaiyyətin diqqqətini cəlb etməkdən və istirahət edənlər arasında meşələrin davamlı istifadəsinin təbliğ edilməsindən ibarət idi.

Hazırladığımız təqdimatda Qax rayonunun təbii gözəllikləri, mədəni-tarixi abidələri tərənnüm olunmaqla yanaşı, son illərdə istirahətə gələnlərin sayının artması xüsusi qeyd olundu. İstirahət mərkəzlərində turistlər üçün təşkil edilən ekskursiyalarla yanaşı,  fərdi şəkildə istirahət edənlərin meşənin ekoloji vəziyyətinə təsirinin müqayisəli şəkildə təhlilini apardıq. Sxemlər, diaqramlar və cədvəllər vasitəsilə aparılan tədqiqatların nəticələrini nümayiş etdirdik.

Təqdimatımızda turizm səfəri üçün  yaradılan meşə cığırının əhəmiyyəti və marşrutu barədə də ətraflı bəhs etdik.  Eyni zamanda tullantıların və meşə yanğınlarının qarşısını almaq  üçün  gənc meşəçilərin gördükləri  işlərdən,  bununla  əlaqədar həyata keçirdiyimiz tədbirlər, istirahət edənlər arasında apardığımız təbliğat və maarifləndirmə işləri haqqında məlumatlarımız müsabiqənin münsiflər heyəti  və  iştirakçılar tərəfindən rəğbətlə qarşılandı.

Biz onların mövzu ilə bağlı çoxsaylı suallarını da cavablandırdıq. Antropogen təsirləri azaltmaq üçün verdiyimiz təkliflərin və meşənin bərpasında əldə edilən müsbət nəticələrin digər regionlarda tətbiq olunması tövsiyə olundu.

 Onu da qeyd edim ki, mən də, Vüsalə də müsabiqədə yer tutacağımıza iddialı idik. Çünki müsabiqəyə ciddi şəkildə hazırlaşmışdıq.

Azərbaycanı gözəl bir ölkə kimi tanıyırlar 

Vüsalə SÜLEYMANOVA,
Qax şəhər 3 nömrəli tam orta məktəbin yetirməsi 

- Mən artıq 2-ci ildir ki, bu müsabiqədə iştirak edirdim. Keçən il həvəsləndirici yerə layiq görülmüşdük. Bu il III yeri tutduq. Doğma Azərbaycanımızı layiqincə təmsil etmək biz məktəblilər üçün  bir şərəfdir. Bu beynəlxalq müsabiqəyə hazırlaşmağımızda əməyi keçən hər bir kəsə, xüsusilə Qax şəhər 3 nömrəli tam orta məktəbin direktoru Qalina Şəfiyevaya öz minnətdarlığımızı bildiririk. 

Orada olduğumuz müddətdə bir sıra ölkələrdən gələn həmyaşıdlarımızla sıx dostluq əlaqələrimiz  də yarandı. Onlara  ölkəmizin təbii sərvətləri haqqında, gənc meşəçilər dəstələrinin fəaliyyəti, meşələrin qorunması sahəsində dövlət səviyyəsində görülən işlər barədə ətraflı söz açdıq. İşğal altında olan Qarabağ meşələrinin vəziyyəti barədə məlumatlarımızı  dünyanın bir sıra ölkələrinin nümayəndələrinin diqqətinə çatdırdıq.

Müsabiqənin yekun tədbirində istirakçı ölkələrin nümayəndələri qarşısında Azərbaycanla, onun mədəni irsi ilə bağli təqdim etdiyimiz musiqili kompozisiya da hamı tərəfindən alqışlarla qarşılandı.  Onu da qeyd edim ki, müsabiqədə iştirak edən yeniyetmə və gənclər Azərbaycanı gözəl bir ölkə kimi tanıyırlar və ən böyük arzuları bizim ölkəyə səfər etməkdir.

Samirə KƏRİMOVA,
"Azərbaycan müəllimi"