|
 Sentyabrın
21-də Təhsil Nazirliyinin təsis etdiyi "Bilik kuboku"
uğrunda breyn-rinq yarışlarının növbəti oyunu olub.
"Baku Crystal Hall"da keçirilən və "AzTV" kanalı ilə
yayımlanan oyunda sentyabr ayının üçüncü finalçısı
müəyyənləşib.
Əvvəlki oyunlarda olduğu kimi, üçüncü seçim oyununda da
aparıcı DJ Fateh öncə bu intellektual yarışmanın
qaydaları və mükafat fondu haqqında məlumat verib.
Bildirib ki, breyn-rinqdə ölkənin 15 bölgəsindən 30
komanda yarışır. Hər oyun iki seçim və iki final
görüşündən ibarətdir. Hər görüş isə rəqib komandalardan
biri 5 xal toplayana qədər davam edir. Mövsüm ərzində 15
oyun keçiriləcək, sonuncu 15-ci oyunda sentyabr, oktyabr
və noyabr aylarının finalçıları qarşılaşacaqlar. Qalib
komanda "Bilik kuboku"na sahib olacaq və komandanın
üzvləri Təhsil Nazirliyi tərəfindən elektron kitab
oxuyucusu ilə mükafatlandırılacaq. Sponsorlar isə
mövsümün qalibinə planşet və hesabında 3 min AZN olan
plastik kart hədiyyə edəcəklər.
DJ Fateh Heydər Əliyev Fonduna, Təhsil Nazirliyinə,
Gənclər və İdman Nazirliyinə oyunlara göstərdikləri
dəstəyə görə minnətdarlıq edib, yarışmanın yüksək
səviyyədə keçirilməsinə hər cür şərait yaradan "Baku
Crystal Hall"un rəhbərliyi və əməkdaşlarına təşəkkürünü
bildirib.
Üçüncü seçim oyununun ilk görüşü "Şəki" və "Ağdaş"
komandaları arasında olub. Qırmızı masada yarışan
"Ağdaş" rəqibinə böyük hesabla üstün gəlib: 5:1.
İkinci görüşdə "Naxçıvan" və "Siyəzən" komandaları
yarışıblar. Oyuna uğursuz başlayan komandalar bir neçə
sualı cavablandıra bilmədiklərindən yarışdan
kənarlaşdırılıblar (diskvalifikasiya).
Final görüşlərində "Ağdaş"ın rəqibini müəyyənləşdirmək
üçün müxtəlif komandaların oyunçularının iştirak etdiyi
şans oyunu keçirilib. "Parabellum" komandası şans
oyununun qalibi olub.
İlk final görüşündə "Ağdaş" rəqibi üzərində asan (5:1),
ikinci final görüşündə isə çətin (5:4) qələbə qazanaraq
sentyabr ayının final oyununda iştirak etmək hüququ
qazanıb.
Yusif ƏLİYEV,
"Azərbaycan müəllimi" |
