|
 Şərəfli
peşə sahiblərindən söz düşəndə ilk növbədə,
müəllimlərimiz yada düşür. Bu peşə qaranlıqları nura
boyayan, gələcəyin alimlərini, həkimlərini,
müəllimlərini yetişdirən, ağla, düşüncəyə aydınlıq bəxş
edən bir peşədir. Müəllimlər hər bir çətinliyə sinə
gərib, bütün güclərini şagirdlərin yaxşı oxumasına,
tərbiyəsinə sərf edirlər. Ömrünü müqəddəs peşəyə həsr
edən fədakar müəllimlərimizdən biri də 32 nömrəli Ağdam
tam orta məktəbinin Azərbaycan dili və ədəbiyyat
müəllimi Firəngiz Abdullayevadır.
O, 1955-ci ildə Ağdamda müəllim ailəsində anadan olub.
Orta təhsilini 1972-ci ildə 2 nömrəli beynəlmiləl
məktəbdə başa vuran Firəngiz xanım arzusunda olduğu
müəllim peşəsinə yiyələnmək üçün sənədlərini Azərbaycan
Pedaqoji İnstitutuna verir, elə həmin il də qəbul olur.
1976-cı ildə ali təhsilini "Azərbaycan dili və ədəbiyyat
müəllimi" ixtisası üzrə başa vurduqdan sonra təhsil
aldığı məktəbdə müəllimləri ilə birlikdə çiyin-çiyinə
çalışır.
1991-ci ildən F.Abdullayeva Qarabağ hadisələri ilə
əlaqədar 6 il Masallı rayonunda məskunlaşaraq ixtisası
üzrə müəllim işləyib. İş təcrübəsi Bakı Şəhər Pedaqoji
Kadrların İxtisasartırma və Yenidənhazırlanma
İnstitutunda, Ağdam Rayon Təhsil Şöbəsində geniş
yayılıb. Təşkil etdiyi Azərbaycan dili və ədəbiyyat
kabineti rayon baxışında birinci yer tutub. Dərs dediyi
şagirdlər rayon səviyyəli tədbirlərdə, məktəblərarası və
rayonlararası bilik yarışlarında, müsabiqələrdə
birincilik qazanıb. İşlədiyi müddət ərzində zəngin
ədəbiyyat kabineti və "Folklor" klubu yaratmış, müxtəlif
tədbirlər, müzakirələr, disputlar keçirmişdir. "Folklor"
klubunda şagirdlərin topladıqları bayatılar, atalar
sözləri və məsəllər, folklor nümunələri onlarda müsbət
keyfiyyətlər formalaşdırır.
F.Abdullayeva ilk növbədə fənnini şagirdlərinə
sevdirməyə çalışır. Şagirdlərin mənəviyyatını
saflaşdırıb onlarda gözəl insani keyfiyyətlər aşılayır.
Sözün məna və gözəlliyinə, onun ən incə çalarlarına
qarşı həssaslıq yaradır, ana dilimizi sevməyi, onu yad
ünsürlərdən qorumağı tövsiyə edir.
Firəngiz müəllim gənc nəslin dünyagörüşünün,
bədii-estetik zövqünün, mədəni səviyyəsinin, mənəvi
aləminin zənginləşməsində mütaliənin mühüm rol
oynadığını bilərək şagirdlərində mütaliəyə həvəs oyadır.
Şagirdlərin müstəqil fəaliyyətlərini, onlarda düşünmək,
sərbəst rəy söyləmək, şəxsiyyəti qiymətləndirmək,
əməkdaşlıq etmək, başqalarını dinləmək bacarığını,
natiqlik qabiliyyətlərini, tənqidi təfəkkürlərini
inkişaf etdirməyə çalışır. Bir müəllim kimi o hər zaman
şagirdlərinə düzgün tərbiyə, dərin bilik verməyə
çalışır. Bunun da nəticəsidir ki, vaxtilə dərs dediyi
şagirdləri bu günün həkimləri, hüquqşünasları,
mühəndisləri, müəllimləri və digər peşə sahibləridir.
F.Abdullayeva onların hər birinin uğuruna ürəkdən
sevinir, fəxr edir. Axı, onların uğurunda müəllimlərinin
zəhməti az olmayıb.
Şagirdlərin sevimlisi olan Firəngiz müəllim biliklərini
hər zaman artıraraq öz üzərində çalışmaqdan yorulmur,
işinin öhdəsindən layiqincə gəlir. Təhsil sahəsində
gedən islahatları izləyir, bu sahədə keçirilən
treninqlərdə fəal iştirak edir. Bu günə kimi altmışa
yaxın pedaqoji məqaləsi respublika və yerli qəzetlərdə
dərc olunub. F.Abdullayeva dəfələrlə respublika
müəllimlərinin qurultayına nümayəndə seçilmişdir.
O, bu gün də öz işini, ürəkdən bağlandığı, sevdiyi
müəllimlik peşəsini davam etdirməkdədir. Pedaqoji
fəaliyyəti dövlətimiz tərəfindən yüksək
qiymətləndirilmiş, 2013-cü ildə "Ən yaxşı müəllim"
müsabiqəsinin qalibi olmuş, həm də "Əməkdar müəllim"
fəxri adına layiq görülmüşdür.
Dincliyini ancaq öz işində, gücündə tapan, şagirdlərini
bircə balası qədər sevən Firəngiz müəllimə cansağlığı,
pedaqoji fəaliyyətində yeni-yeni uğurlar diləyirik.
Kəmalə RƏHİMLİ,
"Təhsil" jurnalının əməkdaşı |
