|
 Bu
qız müsabiqədə ən yüksək bal toplayıb
Bugünkü qonağımız "Xüsusi istedada malik uşaqların
vaxtından əvvəl I sinfə qəbulu Qaydaları"na uyğun olaraq
Bakı Şəhəri üzrə Təhsil İdarəsinin tabeliyində olan
məktəblərdə I sinfə qəbul olunmaq istəyənlərlə keçirilən
müsahibədən uğurla keçən və maksimum bal toplayan
Əliyeva Sevinc Araz qızıdır.
2008-ci il oktyabrın 1-də anadan olan Sevinc Əliyeva 194
nömrəli məktəbin I sinif şagirdidir.
Sevinci xarakterizə edəndə ən çox "mehribandır",
"sadəlövhdür", "hazırcavabdır" ifadələri işlədilir.
Sevincin maraq dairəsi çox genişdir. İdmanla maraqlanır,
rəqslə məşğul olur, ingilis və rus dillərini öyrənməyə
çalışır.
Sevinc böyüdükcə özü kimi arzuları da böyüyür. Bizim
"Böyüyəndə kim olacaqsan", "Hansı peşəni seçəcəksən"
sualımıza cavab olaraq müəllim, həkim, polis olmaq
istədiyini bildirdi. Niyə məhz bu peşələrdən birini
seçməyi düşündüyünü soruşanda isə balaca Sevincin cavabı
bu cür oldu: "Müəllim uşaqlara bilik verir, həkim
xəstəni sağaldır, polis isə pis adamları tutur".
Onunla söhbət edərkən qarşında ilk böyük qələbəsi ilə
həyəcanlanan uşaq yox, daha böyük qələbələr arzusu və
inamı ilə yaşayan birini görürsən. Təmkinli davranışı,
suallara sakitliklə cavab verməsi onun barəsində bu
düşüncənin formalaşmasına təkan verir. Sevinc o qədər
sərbəstdir ki, müsahibəyə gedən zaman da onda qətiyyən
həyəcan olmayıb.
Babasının sözlərinə görə, Sevinc yazıb-oxumağa çox erkən
maraq salıb. Nənəsi onun dərsləri ilə məşğul olub və bu
zaman onu yormayıb, əyləncə ilə öyrədib. Hətta 4 yaşında
ikən hərfləri tanıyan Sevinc 1 il də dövlət bağçasına
gedib.
Ailəsi onun hərtərəfli yetişməsinə çalışsa da, uşaq
hüquqlarını pozmamağı da hədəfləyib. Bəlkə həm də ona
görə ki, Sevinc hansı hüquqlarının olduğunu və onları
necə qorumaq lazım gəldiyini yaxşı bilir. Məsələn, bütün
yayı dərs kitabları oxumaqla, məntiq məsələlərini həll
etməklə bərabər, cizgi filmlərinə də baxıb. Ən çox
sevdiyi cizgi filmi isə "Maşa və ayı"dır.
Sevinc bizi əmin etdi ki, məktəbdə çox yaxşı oxuyacaq.
Həm də təkcə ona görə yox ki, ailəsi, müəllimləri bunu
ondan tələb edəcək. Həm də ona görə ki, oxumağı özü
sevəcək. Bəlkə də Sevinc yaşından daha tez böyüyür,
bəlkə də böyüdükcə uşaqlıq duyğuları daha çox üzə
çıxacaq. Amma onun hələ 6 yaşlı uşaq olduğunu
gözlərindəki sevincdən duymaq olar.
Onunla söhbət xoş idi, bütün suallarımıza konkret, lakin
eyni mövzuda daha bir sual yaratmayacaq qədər dəqiq
cavab verdi. Amma bununla belə onu daha yaxından tanımaq
üçün daxili dünyasının qapılarını rahatlıqla
başqalarının üzünə açmadı. Buna nail ola bilmək üçün
bəlkə hələ gözləmək lazım gəlir. Amma arxayın olun, o,
sonunda sizə özünün sirli dünyasına daxil olmağa icazə
verəcək. O dünyaya ki, orada həyat və insanlar barədə
maraqlı çox şey olduğuna əminik.
Gün gələcək Sevinc qazandığı qələbələrin sırasına
yenilərini artıracaq. Ancaq yəqin ki, heç nə ilk
qələbənin sevincini unutdurmayacaq.
Xədicə QULİYEVA,
BŞTİ-nin İctimaiyyətlə əlaqələr sektorunun aparıcı
məsləhətçisi |
