|
 Naxçıvan
Dövlət Universitetində görkəmli pedaqoq, maarifçi, şair
Məhəmməd Tağı Sidqinin anadan olmasının 160 illiyinə
həsr edilmiş elmi konfrans keçirilib. Konfransı giriş
sözü ilə açan universitetin rektoru, AMEA-nın müxbir
üzvü Saleh Məhərrəmov ümummilli lider Heydər Əliyevin
maarifpərvər Azərbaycan ziyalılarının, görkəmli ictimai
xadimlərinin, şair və yazıçılarının, pedaqoqlarının
adlarının əbədiləşdirilməsi, elmi-ədəbi irslərinin
öyrənilməsi və təbliği istiqamətindəki xidmətlərindən
bəhs edib. Rektor Naxçıvan Muxtar Respublikası Ali
Məclisinin Sədri Vasif Talıbovun imzaladığı, "Görkəmli
pedaqoq, maarifçi və şair Məhəmməd Tağı Sidqinin 160
illik yubileyinin keçirilməsi haqqında" 20 avqust
2014-cü il tarixli sərəncamı Azərbaycan realist
ədəbiyyatının inkişafında, məktəb, mətbuat, teatr
sahəsində müstəsna xidmətləri olan Sidqinin həyat və
yaradıcılığına verilən yüksək qiymət kimi dəyərləndirib.
Tərbiyə işləri üzrə prorektor, professor, Azərbaycan
Respublikasının əməkdar müəllimi Məmməd Rzayev "Məhəmməd
Tağı Sidqi kamil şəxsiyyət tərbiyəsi haqqında" məruzə
edərək "Elminə əməl etməyən alim əlində bir işıqlı çıraq
saxlayan kora bənzər" söyləyən Sidqinin əxlaqla zəkanın,
biliyin və elmin vəhdəti, kamil insan formalaşdırılmaqla
bağlı mütərəqqi baxışlarından, "Tənviri-əfkar",
"Nəsihətnamə" "Heykəli-insana bir nəzər", "Qızlar
məktəbi" əsərlərindəki pedaqoji görüşlərindən danışıb.
Pedaqogika və psixologiya kafedrasının dosenti, YAP
universitet şəhərciyi ərazi ilk təşkilatının sədri,
Azərbaycan Respublikasının əməkdar müəllimi Kamal
Camalov "Məhəmməd Tağı Sidqinin pedaqoji fəaliyyəti"
adlı məruzəsində qeyd edib ki, Sidqi 1894-cü ildə
Ordubadda yeni tipli "Əxtər" məktəbini, Naxçıvanda
"Tərbiyə" məktəbini yaratmaqla Azərbaycan maarifçilik
hərəkatında, ictimai fikir tarixində mühüm yeri olan
tanınmış ziyalıların və ədəbi simaların yetişməsinə
xidmət göstərmişdir. C.Məmmədquluzadə, H.Cavid,
Ə.Qəmküsar, M.S.Ordubadi kimi görkəmli şəxsiyyətlər
Sidqinin maarifçilik ideyalarının layiqli davamçıları
olmuşlar.
Fənlərin tədrisi metodikası və texnologiya müəllimliyi
kafedrasının müdiri, professor Elbəyi Maqsudov "Məhəmməd
Tağı Sidqinin hekayələrində tərbiyə metodları",
texnologiya müəllimliyi ixtisası üzrə III kurs tələbəsi,
M.T.Sidqi adına fəxri təqaüdçü İnci Adilzadə "Məhəmməd
Tağı Sidqinin əsərlərində təlim məsələləri" mövzularında
məruzə edərək Sidqinin Naxçıvanda pedaqogikanın
təşəkkülündəki rolundan, özünəməxsus təlim-tərbiyə
üsullarından bəhs ediblər. Məruzələrdə görkəmli maarif
xadiminin Azərbaycanda ilk pedaqogika və coğrafiya
dərsliklərinin və uşaq nəsrinin ilk mükəmməl
nümunələrinin müəllifi olduğu vurğulanıb,
əxlaqi-didaktik əsərləri, lirikası təhlil olunub.
Konfransda görkəmli pedaqoq, maarifçi və şair Məhəmməd
Tağı Sidqinin əsərlərindən, onun barəsindəki
elmi-tədqiqatlardan ibarət sərgi nümayiş olunub.
Mehriban SULTAN |
