|
Oktyabrın 19-da Təhsil Nazirliyi tərəfindən təsis
olunmuş "Bilik kuboku" uğrunda breyn-rinqin oktyabr ayı
üzrə növbəti-üçüncü seçim oyunu keçirilib. "Baku Grystal
Hall"da baş tutan oyun AzTV kanalı ilə yayımlanıb.
İlk görüşdə "Lənkəran" və "Nur" komandaları
qarşılaşıblar. "Nur" böyük hesabla (5:1) rəqibinə üstün
gəlib. İkinci seçim görüşü "Aypara" və "Beyləqan"
komandaları arasında olub və 5:0 hesabı ilə "Aypara"nın
xeyrinə qurtarıb.
Oktyabr ayının üçüncü finalçısını müəyyənləşdirmək üçün
"Nur" və "Aypara" görüşüblər. Hər iki görüşdə 5:1
nəticəsi qeydə alınıb. Birincidə "Aypara", ikincidə isə
"Nur" qalib gəlib. Finalçı əlavə sualdan sonra məlum
olub. Həmin suala daha tez və düzgün cavab verən
"Aypara" oktyabr ayının birinciliyində oynamaq şansı
qazanıb. Xatırladaq ki, ayın birinciliyində onun
rəqibləri olacaq 3 komandadan ikisinin adı artıq
məlumdur. Bunlar "Nar Mobile" və "Allians"
komandalarıdır.
Breyn-rinqin final oyunu dekabrın 14-də keçiriləcək.
Həmin oyunda sentyabr, oktyabr, noyabr aylarının
qalibləri mübarizə aparacaqlar. Birinci yerə çıxan
komandaya "Bilik kuboku" və digər mükafatlar təqdim
olunacaq.
Yusif ƏLİYEV,
"Azərbaycan müəllimi" |
