Javascript DHTML Drop Down Menu Powered by dhtml-menu-builder.com

ARXİV

24 Oktyabr 2014 - №41

 

Beynəlxalq təhsil xəbərləri

 

Fransada müəllimlər elektron dərsliklərdən istifadə edir 

Fransada müəllimlərin üçdə  biri  elektron dərsliklərdən istifadə edir.  Praktik olaraq riyaziyyat, fizika, kimya, tarix və coğrafiya müəllimləri öz dərslərində elektron dərsliklərdən yararlanır.  Son 3 il ərzində  adi  dərsliklərə alternativ olaraq müasir dərsliklərə üstünlük verən müəllimlərin sayı 3 dəfə artıb. Bu, xüsusən də təhsilin  ikinci pilləsində geniş hal alıb. Elektron dərsliklərdən ən az istifadə təbiətşünaslıq və əmək təlimi müəllimlərinin payına düşür. Tədris prosesində müasir  qadjetlərdən istifadənin  səviyyəsi  hazırda 93 faizə çatıb.  Məlumata görə,  şagirdlərin yalnız 7 faizi  fərdi cihazlardakı elektron dərsliklərdən istifadə etmək imkanına malikdir.  Məktəblilərin qalan hissəsi təhsil müəssisəsində yerləşdirilmiş kompüterlərdən istifadə edirlər.


Avropada təhsil haqlarına dair hesabat açıqlanıb 

Avropa  komissiyası 33 ölkədə təhsil haqları, təhsil kreditləri və qrantlar arasında fərqlərin olduğunu qeyd edib. Bu barədə komissiyanın "Eurydice" təhsil şəbəkəsinin hazırladığı hesabatda bildirilir.  Almaniya   təhsil haqlarını tamamilə ləğv edən yeganə ölkə kimi tarixə keçib. Estoniya da 2014-cü ildə təhsil haqlarının ödənilməsi sistemində dəyişikliklər edib. Artıq tələbələrin təhsil üçün ödənişləri dərslərdən əldə etdikləri fəaliyyət göstəricilərinə görə dəyişəcək. Avropada  ən yüksək  təhsil haqları  Böyük Britaniyadadır. Daha sonra  İrlandiya, İtaliya, Latviya, Litva, Macarıstan, Niderland və Sloveniya  gəlir.  Avropa komissiyasının təhsil, mədəniyyət, multilinqvistika və gənclər üzrə ali komissarı Androulla Vassiliounun sözlərinə görə, Avropa ölkələri təhsil sistemlərində böyük dəyişikliklər etməlidirlər. "Bu dəyişikliklər təkcə tələbələrin iş tapması ilə əlaqəli olmamalıdır, onların təhsil haqları da dəyişməlidir. Aİ üzvləri təhsil haqlarını artıranda təqaüdləri də artırmalıdırlar", - deyə o bildirib. Avropa  ölkələrinin  çox  az  qismində tələbələr təhsil haqları üçün qrantlar alır. Kipr, Danimarka, Malta, Finlandiya tələbələrinin hamısı, Lüksemburq, Niderland, Şotlandiya, İsveç, Norveç tələbələrinin isə əksər hissəsi təqaüd qazanırlar. Tələbələr üçün ayrılan kreditlər isə tələbənin ailə vəziyyəti və maddi durumu əsas götürülərək ödənilir.


Dünyada tələbə mobilliyi 4.5 milyon nəfərə çatıb 

İqtisadi Əməkdaşlıq və İnkişaf  Təşkilatının ( OECD)  məlumatına əsasən,  dünyada tələbələrin beynəlxalq mobilliyi 1975-ci ildəki 800 mindən 2012-ci ildəki 4.5 milyon nəfərə qədər artıb.  Xarici tələbələrin cəlb olunması üzrə ABŞ-ın  göstəriciləri bütün dünya üzrə 16 faiz aşağı düşüb. Baxmayaraq ki, bu ölkə hələ də əcnəbi tələbələrin sayına görə dünyada liderdir. İkinci yerdə əcnəbi tələbələrin 13 faizi ilə Böyük Britaniya qərarlaşıb. Almaniya, Fransa, Avstraliyada tələbə mobilliyi   6 faiz  təşkil edir.  Əcnəbi tələbələrin 5 faizi Kanadanın payına düşür.  Bütün  dünya  üzrə  tələbələrin ümumi sayının 50 faizi adları çəkilən 6 ölkənin payına düşür.  OECD-nin hesabatında qeyd olunur ki, Rusiya, Yaponiya, İspaniya, İtaliya, Avstriya, Yeni Zelandiya, İsveçrə, Niderland  və  Cənubi  Koreya  2000-2012-ci  illər arasında dünya təhsil məkanında  öz mövqelərini  kifayət qədər yaxşılaşdıra biliblər.


Ən gənc universitetlərin siyahısına Asiya ali məktəbləri başçılıq edir 

Dünyanın ən gənc universitetləri (yaranma tarixi 50 ildən az) arasında aparılmış tədqiqatlara əsasən,  Asiya  ali məktəbləri  QS reytinq cədvəlinin ilk "5"-liyində lider mövqedədir.  Siyahıda birinci yer  Sinqapurun  Nanyanq Texnoloji  Universitetinə məxsusdur.  Daha sonra Honkonq Elm-Texnologiya Universiteti, Koreya Qabaqcıl Elm-Texnologiya İnstitutu,  Pohang  Elm-Texnologiya  Universiteti,  Honkonq  Şəhər Universiteti gəlir.  Reytinq cədvəlində 25 ölkə ən azı bir ali məktəblə, Avstraliya ən çox ali məktəblə - 10 universitetlə, İspaniya 5, Honkonq  və  Böyük Britaniya 4, Almaniya 3 universitetlə təmsil olunub.


100 milyon şagirdə proqramlaşdırmanın sirləri öyrədiləcək 

Bütün dünya üzrə 100 milyon şagirdə proqramlaşdırmanın sirlərinin öyrədilməsi məqsədilə təhsil proqramının  tətbiqi üçün internetdə vəsait toplanması kampaniyasına başlanıb.  Bu kampaniyaya dünyanın nəhəng şirkətlərindən olan Google və Microsoft  da qoşulub.  Vəsait  müxtəlif  texnoloji, təhsil, əyləncə və digər layihələrə xərclənəcək.  Microsoft-un təsisçisi Bill Geyt, Linkedin sosial şəbəkəsinin qurucusu Rid Xoffman şəxsən layihəyə dəstək veriblər.  "Hour of code" (proqramlaşdırma saatı) adlı  layihənin reallaşdırılmasına 5 milyon dollar xərclənəcək. İKT şirkətləri bu vəsaiti "dollara görə dollar" sxemi üzrə toplamağa qərar veriblər.  Bu o deməkdir ki, internetdə  adi istifadəçinin ianə etdiyi hər bir dollara qarşı dünya nəhəngləri  də öz dollarlarını  sərf edəcəklər.  Layihə müəllifləri  öz qarşılarına bütün planet üzrə 100 milyon uşağa  proqramlaşdırmanın əsaslarının öyrədilməsi  vəzifəsini  qoyublar.  Proqramlaşdırmanın materialları hələlək 30 dünya dilinə tərcümə olunub. Proqramın həyata keçməsi məqsədilə əldə olunmuş vəsait hesabına ibtidai məktəblər üçün 10 min, orta məktəblər üçün 500, yuxarı siniflər üçün 200 müəllimin hazırlanması nəzərdə tutulub.   

Oruc MUSTAFAYEV,
"Azərbaycan müəllimi"

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov