|
 Lənkəran.
Təhsil şöbəsindən aldığımız məlumatda bildirilir ki,
yeni tədris ilində istedadlı uşaqların vaxtından əvvəl
I sinfə qəbulu ilə bağlı müraciət edənlərdən 229 nəfəri
I sinfə qəbul edilib.
Rayon təhsil müəssisələrində uşaqların tibbi müayinədən
keçməsi davam edir.
Şəhər 5 nömrəli və Sütəmurdov kənd məktəblərində yeni
kurikulumun tətbiqi ilə əlaqədar keçirilən treninqlərdə
473 müəllim iştirak edib.
2 nömrəli şəhər və Bürcəli kənd məktəblərində
təlim-tərbiyə işlərinin, şəhər 4 nömrəli, Haftonu
qəsəbə, Mamusta, Ləj və Rvo kənd məktəblərində
vətəndaşların müraciətlərinə baxılıb və onların qəbulu
vəziyyətinin monitorinqi keçirilib.
İmişli.
Rayon təhsil şöbəsinin müdir müavini Vahid Tağıyevin
verdiyi məlumatda qeyd olunur ki, rayonun ümumtəhsil
məktəblərində müəllimlərin məsuliyyətini, tədrisin
keyfiyyətini yüksəltmək, o cümlədən şagirdlərin təhsilə
marağını artırmaq, onlarda əsaslı bilik, bacarıq və
vərdişlərin formalaşdırılması istiqamətində vacib
məsələlərin həyata keçirilməsi ilk gündən
planlaşdırılıb.
Heydər Əliyev Mərkəzində təhsil şöbəsi Azərbaycan
Təhsil Şurası ilə birgə təcrübə mübadiləsi məqsədilə
"Təlim keyfiyyətinin yüksəldilməsi problemi" mövzusunda
elmi-təcrübi konfrans keçirib. Konfransda Azərbaycan
Təhsil Şurasının sədri, pedaqoji elmlər doktoru,
professor Əjdər Ağayev, Təhsil Şurası idarə heyətinin
üzvləri, Bakı, eləcə də Şirvan şəhərindən, Saatlı,
Sabirabad, Şamaxı, Salyan, Neftçala, Hacıqabul, İmişli
rayonlarından olan qabaqcıl müəllimlər və təhsil
işçiləri iştirak ediblər. Maraqlı təcrübə mübadiləsi
şəraitində keçən konfransda rayonun təhsil
müəssisələrində təlimin keyfiyyətinin yüksəldilməsindən
bəhs edilib.
Təhsil Nazirliyində müsabiqədən keçib rayonda pedaqoji
fəaliyyətə başlayan 53 gənc müəllimin "Müəllimlərin
etik davranış qaydaları"na uyğun təntənəli şəkildə
andiçmə mərasimi keçirilib.
Rayonun pedaqoji kollektivlərində təhsilalanların və
təhsilverənlərin hüquq və vəzifələrinə aid monitorinqlər
aparılıb.
Rayonun ümumtəhsil məktəblərində ayrı-ayrı fənlər üzrə
proqram materiallarının planlaşdırılması və fənn
metodbirləşmələri işlərinin təşkili vəziyyətinin
monitorinqi keçirilib.
Naftalan.
Şəhər təhsil şöbəsinin müdiri İlqar Əsgərovun verdiyi
məlumata görə, yeni tədris ilində şəhər ümumtəhsil
məktəblərinin Azərbaycan bölməsinə 87 adda 5400 ədəd
dərslik, 33 adda 175 ədəd müəllim üçün vəsait, rus
bölməsinə isə 41 adda 201 ədəd dərslik, 14 adda 14 ədəd
müəllim üçün vəsait müəllim və şagirdlərin istifadəsinə
verilib.
Təhsil şöbəsinin Fəaliyyət Planına uyğun olaraq dərs ili
ərzində keçiriləcək seminarların, bilik yarışlarının,
inşa və rəsm müsabiqələrinin, fənn olimpiadalarının
qrafiki hazırlanıb.
Kurikulumun tətbiqi ilə bağlı məsələlər diqqət
mərkəzində saxlanılır. Tədris ili ərzində I-VII
siniflərdə dərs deyən 33 müəllim kursdan keçib.
Müəllimlərin elmi-nəzəri, metodiki hazırlığını daha da
yüksəltmək məqsədilə kurikulum tətbiq olunan siniflərdə
"Nümunəvi dərslər"in qrafiki hazırlanıb.
Qusar.
Rayon təhsil şöbəsinin müdiri Niftəli Fərzəliyevin
redaksiyamıza verdiyi məlumatda bildirilir ki, cari dərs
ilində rayondakı 86 ümumtəhsil məktəbində, o cümlədən 48
tam orta, 20 ümumi orta, 18 ibtidai məktəbdə 924 sinif
komplektində 13901 şagird təhsilə cəlb olunub ki,
onların təlim-tərbiyəsi ilə 1687 müəllim məşğul olur.
Rayonun ümumtəhsil müəssisələrində payız-qış mövsümü
ilə əlaqədar ciddi hazırlıq işləri görülür.
RTŞ təlim-tərbiyə prosesinin keyfiyyətcə
yaxşılaşdırılması işinə valideynləri və ictimaiyyət
nümayəndələrini cəlb etmək məqsədi ilə rayonun bütün
ümumtəhsil müəssisələrinin rəhbərlərini, qabaqcıl
müəllimləri, əlaqədar təşkilatları, valideynləri cəlb
etməklə zonalar üzrə geniş şəkildə maarifləndirmə
tədbirləri həyata keçirir. Bu tədbirlərdə
valideyn-məktəb əlaqələrinin möhkəmləndirilməsi,
təhsilin keyfiyyətcə yaxşılaşdırılması, gənc nəslin
zərərli vərdişlərdən qorunması, hüquqi maarifləndirmə
məsələləri ilə yanaşı vətəndaşları maraqlandıran digər
məsələlərin müzakirəsi də aparılır.
"Açıq mikrofon" görüşlərində təhsilin inkişaf
etdirilməsi ilə bağlı məsələlər daim diqqət mərkəzində
olur.
I-VII siniflərdə fənn kurikulumlarının tətbiqi, proqram
materiallarının mənimsədilməsi metodiki şura
iclaslarında müzakirə olunub, problem və çətinliklərin
aradan qaldırılması məqsədilə məktəb rəhbərlərinə,
metodbirləşmə sədrlərinə konkret tövsiyələr verilib.
Məktəb rəhbərləri və fənn müəllimləri üçün metodiki
seminarlar keçirilir.
Hazırda təhsil sisteminin informasiyalaşdırılması üzrə
Dövlət Proqramının həyata keçirilməsi çərçivəsində
rayonun bütün tam orta və ümumi orta məktəbləri
kompüterlərlə təchiz edilib, bu müəssisələrin hamısına
noutbuk-proyektor dəstləri verilib. 27 məktəb
Azərbaycan Təhsil Şəbəkəsinin sürətli internet
şəbəkəsinə qoşulub.
Xızı.
Yeni tədris ilində rayonda 180 şagird yerlik Tıxlı
kənd ümumi orta məktəbinin yeni binası istifadəyə
verilib. Rayon təhsil şöbəsinin müdiri Oqtay
Abdullayevin verdiyi məlumata görə, ümumtəhsil
məktəbləri lazımi inventar və İKT avadanlıqları ilə
təmin olunub.
Məktəblərdə Azərbaycanın dahi şairi Hüseyn Cavidin
həyat və yaradıcılığına həsr olunmuş inşa yazı
müsabiqəsi keçirilib.
Yeni dərs ilində təhsil ocaqlarında
şagird-müəllim-valideyn interaktiv şəbəkə yaradılıb.
Təhsil müəssisələrində metodmərkəz tərəfindən yeni
proqram və dərsliklərlə işin təşkili və fənn
kurikulumlarının tətbiqi ilə bağlı "dəyirmi masa" və
məktəblər arasında "Xəmsə" bilik yarışı keçirilib.
Yardımlı.
Rayon təhsil şöbəsinin müdiri Manaf Balışovdan
aldığımız məlumatda bildirilir ki, Çayüzü, Anzov,
Urakəran, Qaraqaya tam orta məktəblərində tikinti işləri
davam edir. 180 şagird yerlik şəhər 3 nömrəli tam orta
məktəbində isə son tamamlama işləri gedir.
Rayonda 18 gənc müəllim ixtisasları üzrə ümumtəhsil
məktəblərində işlə təmin olunub.
VII siniflərdə kurikulumun tətbiqi ilə əlaqədar
ayrı-ayrı fənlər üzrə 192 müəllim kursdan keçib.
Ağcabədi.
Rayon təhsil şöbəsindən aldığımız məlumatda deyilir ki,
ümumtəhsil məktəblərinin V-VII siniflərində dərs deyən
və indiyə qədər kurslardan keçməyən müəllimlərin fənn
kurikulumlarının tətbiqi sahəsində nəzəri və praktiki
hazırlığı üçün təlim kursları təşkil edilib. Həmin
siniflərdə dərs deyən müəllimlərin bu kurslarda
iştirakı tam təmin edilib.
Məktəblərdə Azərbaycan dili, tarix, kimya, fizika,
biologiya, coğrafiya, riyaziyyat, ingilis dili fənn
müəllimləri və II - III siniflərdə dərs deyən
müəllimlər hər həftədə 10 nəfər olmaqla dərsliklər,
dərs vəsaitləri və digər vəsaitlərin monitorinqi üzrə
TQDK-nın Ağcabədi regional bölməsində təşkil edilmiş
elmi-metodiki seminarlara cəlb edilib.
Türk Əməkdaşlıq və Kordinasiya Agentliyi Təhsil
Nazirliyi və Avrasiya Beynəlxalq Tədqiqatlar İnstitutu
İctimai Birliyi ilə birgə təhsil ocaqlarında Azərbaycan
və Türkiyənin dəyərli şəxsiyyətlərini öyrənmək və təbliğ
etmək məqsədi daşıyan "Hər mövsüm bir işıq" adlı layihə
həyata keçirir. Layihə çərçivəsində görkəmli şair Əhməd
Cavadın yaradıcılığına həsr olunmuş inşa müsabiqəsi elan
olunub.
Həmçinin qışa hazırlıq məqsədilə rayonda fəaliyyət
göstərən ümumtəhsil məktəblərində ciddi hazırlıq işləri
gedir.
Abşeron.
Rayon təhsil şöbəsindən verilən məlumata görə,
Fövqəladə Hallar Nazirliyinin Sumqayıt Regional Mərkəzi
Abşeron rayonunun Məmmədli kənd tam orta məktəbində
"Fövqəladə hallar zamanı davranış və yanğın
təhlükəsizliyi qaydaları" mövzusunda maarifləndirmə
tədbiri keçirib.
Nəzərdə tutulmuş plana əsasən rayonun təhsil ocaqlarında
keçirilən tədbirin əsas məqsədi müəllim və şagirdlərin
fövqəladə hallar zamanı davranış qaydaları və mülki
müdafiə sahəsində biliklərinin artırılmasına, yaralılara
ilkin tibbi yardımın göstərilməsinə və digər profilaktik
tədbirlərin görülməsinə nail olmaqdır.
Tədbirin nəzəri hissəsində "Fövqəladə hallar zamanı
davranış qaydaları", "Yanğın təhlükəsizliyi qaydaları",
"Məişətdə qaz cihazlarının təhlükəsizliyini necə təmin
etməli", "Zərərçəkmiş insanlara ilkin tibbi yardımın
göstərilməsi" və "112 qaynar telefon xətti
təhlükəsizliyimizin qarantıdır" mövzularında çıxışlar
olub.
Sonra "Dəm qazı və ya gözəgörünməz qatil" adlı videoçarx
nümayiş etdirilib.
Tədbir iştirakçılarının sualları cavablandırılıb,
məktəblilərə maarifləndirmə xarakterli təbliğat
materialları və bukletlər paylanılıb.
Tədbirin praktiki hissəsində məktəbin həyətində FHN
Sumqayıt Regional Mərkəzin qüvvə və texnikalarına baxış
keçirilib, onların təyinatı və istifadəsi qaydaları
haqqında iştirakçılara məlumat verilib.
Masallı.
Rayon təhsil şöbəsindən redaksiyamıza daxil olan
məlumatda bildirilir ki, Gənclər Mərkəzində rayon
gənclər və idman idarəsinin və təhsil şöbəsinin birgə
təşkilatçılığı ilə "Gənclərin hərbi-vətənpərvərlik
tərbiyəsi və dövlətçiliyin təbliği" mövzusunda "dəyirmi
masa" keçirilib. Tədbirdə qeyd olunub ki, əsası
ümummilli lider Heydər Əliyev tərəfindən qoyulmuş dövlət
gənclər siyasətinin Prezident İlham Əliyev tərəfindən
uğurla davam etdirilməsi nəticəsində bu gün Azərbaycan
gəncləri ölkənin ictimai-siyasi, iqtisadi, sosial və
mədəni həyatında fəal iştirak edirlər.
Çıxış edənlər vurğulayıblar ki, yaşadığımız dövr gənc
nəsli kiçik yaşlarından hərbi ruhda böyütməyi tələb edir.
Onları psixoloji və mənəvi baxımdan hərbi həyata
hazırlamaq ümdə məsələlərdəndir. Gənclərin
hərbi-vətənpərvərlik tərbiyəsi ilə bərabər, onların
fiziki hazırlığına da diqqət artırılmalıdır.
Açıq dialoq şəklində davam edən tədbirdə gənclər
müzakirə olunan mövzu ilə bağlı təkliflərini
bildiriblər.
Tərtər.
Rayon təhsil şöbəsindən aldığımız məlumata görə,
Fövqəladə Hallar Nazirliyinin Qarabağ Regional
Mərkəzinin təşkilatçılığı ilə şəhər 6 nömrəli tam orta
məktəbdə "Təbii fəlakətlər və texnogen qəzalar zamanı
necə davranmalı?" adlı tədbir keçirilib. Maarifləndirici
tədbirdə məktəbin müəllim-şagird kollektivi ilə yanaşı
texniki işçilər, valideynlər və təhsil şöbəsinin
nümayəndələri də iştirak ediblər.
Tədbirdə Qarabağ Regional Mərkəzinin strukturu və
fəaliyyət istiqamətləri, fövqəladə hallar, onun növləri,
fövqəladə hallar zamanı davranış qaydaları, mülki
müdafiə anlayışları ilə bağlı məlumat verilib. Regional
mərkəzin əməkdaşları çıxış edərək fövqəladə hallar
zamanı başqalarına kömək etməyin yollarını, 101 və 112
xidmətlərinə hansı hallarda müraciət etməyin lazım
gəldiyini izah ediblər.
Fövqəladə Hallar Nazirliyinin hazırladığı "Dəm qazı və
ya arzuolunmaz qonaq" adlı videoçarx nümayiş etdirilib.
İştirakçılara mövzu ilə bağlı broşürlər paylanıb və
onları maraqlandıran suallar cavablandırılıb.
Tədbir diskussiya şəklində başa çatıb.
Şamaxı.
Rayon təhsil şöbəsindən verilən məlumata görə, rayonun
Mədrəsə qəsəbə tam orta məktəbində 380 və Şərədil ümumi
orta məktəbində isə 80 şagird yerlik yeni binaların
tikintisi gedir. Bu binalar dərs ilinin sonuna qədər
istifadəyə veriləcək.
Əlavə Hacıqədirli və Talışnuru kənd tam orta
məktəblərinin yeni binalarının tikintisi artıq
layihələşdirilib.
Ümumtəhsil məktəblərinin təlim-tərbiyə işləri üzrə
direktor müavinləri və praktik psixoloqların geniş
seminarı keçirilib. Seminarda məktəb rəhbərlərinə
dəyərli tövsiyyə və tapşırıqlar verilib.
Şirvan.
Şəhər təhsil şöbəsindən verilən məlumatda bildirilir ki,
təhsil şöbəsi və gənclər və idman idarəsinin
təşkilatçılığı ilə məktəblilər arasında "Xəmsə"
intellektual oyununun şəhər mərhələsi keçirilib.
Nəticədə şəhər 1 nömrəli məktəb-liseyin komandası qalib
olub.
18 nömrəli təbiət və humanitar təmayüllü məktəb-
liseydə təhsil şöbəsi hüquq-mühafizə orqanları ilə
birlikdə "Uşaq hüquqları aylığı" çərçivəsində maraqlı
tədbir keçirib. Keçirilən tədbirdə şagirdləri
maraqlandıran suallar cavablandırılıb.
Şakir CƏFƏROV,
"Azərbaycan müəllimi" |
