|
 Qafilə
ƏLİYEVA,
"İdrak" liseyinin ibtidai sinif müəllimi, "Ən yaxşı
müəllim" müsabiqəsinin qalibi
Bu gün təhsilimizin qarşısında duran ən mühüm vəzifə
vətənpərvər şəxsiyyət yetişdirməkdir. Yeni fənn
kurikulumları əsasında tədris uşaq təfəkkürünün,
təxəyyülünün inkişafında mühüm rol oynayır. Bu günün
uşaqları tədqiqatçılığa, yaradıcılığa və axtarıcılığa
meyil göstərirlər. Bu meyli də onlarda təbii ki, müəllim
yaradır. Müəllimlərə isə bu işdə müasir dərsliklər, dərs
vəsaitləri, müxtəlif resurslar yardımçı olur.
Dərslərin İKT vasitəsi ilə təşkili müasir dövrün əsas
tələblərindən biridir. Müasir təhsil sistemini İKT
olmadan təsəvvür etmək qeyri-mümkündür. İKT-nin həm
daşıyıcı, həm ötürücü, həm də yaradıcı olması
təlim-tərbiyə prosesi üçün olduqca əhəmiyyətlidir.
Çalışdığım liseydə bütün siniflər müasir
texnologiyalarla təchiz olunmuşdur. Tədrisin
yüksəldilməsində əyani və texniki vasitələrin, xüsusilə
də kompüter texnologiyalarının tətbiqi böyük əhəmiyyət
kəsb edir. Dərs dediyim şagirdlərdə yeni biliyi müstəqil
mənimsəmələri və onlarda yaradıcılıq fəaliyyətini,
təfəkkürlərini formalaşdırmaq məqsədi ilə müxtəlif
resurslardan istifadə edirəm.
Dərslərimdə istifadə etdiyim multimedia tədris
resursları öz rəngarəngliyi, animasiyaları,
tapşırıqları, sxemləri, krossvordları ilə çox zəngindir.
Bu resurslardan istifadə şagirdləri fəallaşdırır,
təhsilə marağını daha da gücləndirir. Ümumiyyətlə,
multimedia resursları şagirdlərdə müstəqil düşüncə,
təfəkkür tərzinin, eləcə də Azərbaycançılıq, milli
mənəvi dəyərlərə, adət-ənənələrə hörmət, ehtiram ruhunun
formalaşdırılması və tərbiyə edilməsi məqsədi daşıyır.
Fənlərin tədrisi zamanı "oxuyuruq.biz" portalında
yerləşdirilmiş multimedia tədris resursları şagirdlərin
mövzuları daha asan mənimsəmələrinə böyük köməklik
göstərir.
|
