|
Serbiyanın Vryaçka Banya şəhərində yeniyetmə və gənclər
arasında sayca 57-ci dəfə keçirilən "Golden Glove"
beynəlxalq boks turnirinə yekun vurulub. Azərbaycan Boks
Federasiyasının məlumatına görə, milli komandamız
yarışda 9 boksçu ilə təmsil olunub.
Turnirdə 10 ölkənin 54 idmançısı mübarizə aparıb.
Yığmamız Serbiyada 3 qızıl, 3 gümüş və 2 bürünc medala
sahib olub. Avropa çempionu, Olimpiya oyunlarının bürünc
mükafatçısı Teymur Məmmədov (91 kq) finalda Ukrayna
nümayəndəsi İvan İyuxta üzərində qələbə qazanaraq 1-ci
yerə layiq görülüb. Superağır çəki dərəcəsində çıxış
edən Kamran Mehdiyev serbiyalı Milutin Stankoviçi məğlub
edib. Valeh Ramazanov isə (64 kq) finalda rusiyalı
Eduard Xusainovdan üstün olub - 2:1. Rüfət Hüseynov (49
kq) həlledici görüşdə rusiyalı Bator Saqaluyevə, Elnur
Şəfiyev (52 kq) rusiyalı Vyaçeslav Taşkarakova, Elvin
Qəmbərov (81 kq) isə Rusiyanın digər təmsilçisi Pavel
Salıginə uduzub. Fərid Ağamoğlanov (56 kq) və Roman
Zakirov (69 kq) 3-cü yerlə kifayətləniblər. Qaliblərə
diplom və medallar təqdim olunub. |
