|
 8-10
dekabr 2014-cü il tarixlərində Azərbaycan Respublikası
Səhiyyə Nazirliyinin İctimai Səhiyyə və İslahatlar
Mərkəzində Azərbaycan Dövlət Pedaqoji Universiteti,
Bakı Pedaqoji Kadrların İxtisasartırma və
Yenidənhazırlanma İnstitutunun və Təhsil Problemləri
İnstitutunun əməkdaşları üçün reproduktiv sağlamlıqla
bağlı təlim kursları keçirildi.
Təlim kurslarının yekununa həsr olunan tədbirdə Təhsil
Nazirliyinin baş məsləhətçisi Elnur Əlizadə bu təlimin
əhəmiyyəti barədə geniş məlumat verdi. Qeyd etdi ki, bu
təlimlərin keçirilməsində məqsəd gənc nəslin zərərli
vərdişlərdən qorunmasına, yeniyetmələr arasında sağlam
həyat tərzi və reproduktiv sağlamlıqla bağlı aparılan
maarifləndirmə işlərinə töhfə verməkdən ibarətdir. Bu
tədbirlər çərçivəsində reproduktiv sağlamlıqla bağlı
maarifləndirmə işinin davamlı aparılmasının vacib
olduğunu nəzərə alaraq, Təhsil Nazirliyi, Səhiyyə
Nazirliyinin İctimai Səhiyyə və İslahatlar Mərkəzi və
"Ümidli Gələcək" Gənclər Təşkilatı oktyabr ayından
etibarən xüsusi tədris və maarifləndirmə proqramını
həyata keçirir.
Təlimin gedişində Təhsil Nazirliyinin baş məsləhətçisi
Vəfa Yaqublu, Səhiyyə Nazirliyinin İctimai Səhiyyə və
İslahatlar Mərkəzinin məsul əməkdaşları Nabil Seyidov,
Teymur Hüseynov, Afət Məmmədova, Azərbaycan
Respublikasının Prezidenti yanında Dövlət İdarəçilik
Akademiyasının dosenti Gülarə Hüseynova və "Ümidli
Gələcək" Gənclər Təşkilatının icraçı direktoru Kəmalə
Aşumova mövzularla bağlı çıxış etdilər. Çıxışlarda
qeyd olundu ki, yeniyetməlik dövründə qazanılan müsbət
vərdişlər gələcəkdə yarana biləcək müxtəlif
xəstəliklərdən sığortalanmağa xidmət edir. Xüsusilə
vurğulandı ki, yalnız üç sahənin mütəxəssislərinin
-həkimlərin, psixoloqların və müəllimlərin birgə səyi
nəticəsində bu mühüm problemin həllinə nail olmaq
mümkündür.
Tədbirdə dinləyici kimi iştirak edən Azərbaycan Dövlət
Pedaqoji Universitetinin biologiyanın tədrisi
metodikası kafedrasının dosenti, pedaqogika üzrə fəlsəfə
doktoru Həqiqət Hacıyeva çıxışında bildirdi ki, üç
günlük təlim çox yüksək səviyyədə keçirildi. Bu gün
reproduktiv sağlamlığın qorunması cəmiyyətimizin ən
aktual problemlərindəndir.
Tədbirdə Təhsil Nazirliyinin əməkdaşı Elnur Əlizadə
təlim kursunu uğurla başa çatdırmış 55 nəfər təhsil
işçisinə sertifikatlar təqdim etdi.
Sifai SƏFƏROVA,
"Azərbaycan müəllimi" |
