|
 O,
adəti üzrə işə hamıdan tez gəlir. Səhər günəşini təzə
əkilmiş güllərin və ağacların yarpaqları üzərində,
şehlərin parıltısında görmək, onların çöhrəsindəki incə
təbəssümləri sezmək ona xüsusi zövq verir. Təzə əkilmiş
ağaclara və güllərə xüsusi qayğı ilə yanaşır, onların
körpə balalar kimi nazını çəkməkdən xüsusi zövq alır. Bu
adam bütün işlərində son dərəcədə inadkardır. O, heç
zaman təbiətin şıltaqlıqları qarşısında məğlub olmağı
xoşlamır. Əgər ona gətirilən və ya verilən gül
kollarını, ağac tinglərini qəbul edibdirsə, deməli
onlara görə özünü məsuliyyətli hesab edir və buna görə
hər cür bəhanəni və bəraəti yersiz hesab edir. Çünki o
özünü öz işinin- rəhbərlik etdiyi müəssisənin bütün
sahələri üzrə səriştəli və kifayət qədər məlumatlı
hesab edir, yaşına və səriştəsinə söykənmədən daim
öyrənməyi çalışır və ona görə də hamının yanında hörmət
və nüfuz sahibidir.
Bu gün də eyni qayda ilə bağçanın həyətinə daxil oldu.
Səhər günəşinin şəfəqləri nar gülləri kimi yarpaqların
üzərində qızarırdı. Yaşıl çəmənlərin və ağacların üstünə
qırmızı tül kimi sərilmiş günəşin şəfəqləri altında bu
incə təbiət körpələrin məsum çöhrələrini xatırladırdı.
Bütün bunlardan xüsusi zövq ala-ala o, hər tərəfi
diqqət-nəzərlə seyr etdi, sonra bağbanla salamlaşdı və
kiçik sual-cavabdan sonra öz otağına tərəf getdi, əl
çantasını ora qoyub yenidən uşaqlar qəbul edilən foyeyə
gəldi.
Müdir - Aydəmirova Validə Paşa qızı zövqə, bir az dəbə
və bir az da fəsilə uyğun gözəl geyimli, orta yaşlı,
nurani, səbrli, təmkinli, ciddi və işgüzar bir qadındır.
Mən özümü təqdim etdim, bağçadan yazmaq istədiyimi
bildirdim. O, razılıqla gözləməyi xahiş etdi.
Uşaqların gəlişi başlamışdı və valideynlər - bəziləri
tələsik, bəziləri səbrlə uşaqlarını tərbiyəçilərə təhvil
verirdi, sonra onunla məxsusi olaraq salamlaşır,
hal-əhval tutur və gedirdilər. Bu gözəl görüntü on-on
beş dəqiqə davam etdi və sonra biz onun dəvəti ilə iş
otağına yollandıq.
Mən bir daha ona gəlişimin məqsədini izah etdim. Əlavə
etdim ki, Xəzər rayonunda sizin bağça haqqında hamı
yüksək fikirdədir. Buzovnadan, Mərdəkandan, Şüvəlandan,
Yeni Suraxanıdan sizin bağçaya valideynlərin uşaq
gətirmələrindən məlumatım var. Bu, əlbəttə, burada
işçilərin səriştəli və məsuliyyətli olmasından,
təlim-tərbiyənin yüksək səviyyədə qurulmasından xəbər
verir, dedim. Sağ olun, - dedi, - məlumatlılıq insanı
həmişə düzgün istiqamətə yönəldir və ağıllı qərar
verməyə kömək edir.
Mən hiss etdim ki, zamanla birgə ayaqlaşa bilən, öz
işində kifayət qədər səriştəli olan bir müəssisə rəhbəri
qarşısındayam.
Bağça işinə həvəsinin nə vaxt yaranması ilə maraqlandım.
Bəlkə də o ilk baxışda adi görünən bu sualı gözləmirdi,
bir az fikirləşdi və sanki nəyi isə yada salmaq, nəyi
başlanğıc kimi götürmək istədiyini fikirləşirdi və
nəhayət, dilləndi:
- Mənim həyat yoldaşım həkim idi. Çox ziyalı və geniş
dünyagörüşlü adam idi. Bizim ilk körpəmizin hələ bir
ayı tamam olmamışdı. Mən onun evdəki iş stolunun üstündə
Makarenkonun "Kniqa dlya roditeley" kitabını gördüm.
Hərdən boş vaxt tapan kimi o kitabı vərəqləyirdim və
vaxt keçdikcə mən o kitabla yaxşı tanış ola bilmişdim.
Artıq tərbiyədən söz düşəndə biz tez-tez o kitaba
müraciət edirdik. Mənim marağımı nəzərə alaraq sonradan
o, Makarenkonun "Pedaqoji poema"sını da alıb gətirdi və
gülə-gülə dedi ki, Aydəmirovlar ailəsi bu gün kiçik bir
bağdır, lakin o ildən-ilə böyüməli, necə deyərlər,
barlı-bəhərli olmalı və cəmiyyət üçün faydalı nəsil
yetişdirməlidir. Ailə isə onun başlanğıcıdır, dedi.
Onun adı Heydər idi. Sonra bir az fikirləşib, dedi: -
sənə bir sürpriz təklifim var, mən görürəm aldığım
kitablar artıq sənin stolüstü kitabların olub, oxuyub
öyrənməyə çox meyillisən, xüsusən də uşaqların tərbiyəsi
ilə bağlı. Hazırlaş, ali məktəblərin birinə daxil ol.
1980-ci ildə Bakı Məktəbəqədər Pedaqoji Texnikumuna
daxil oldum və 1984-cü ildə oranı məktəbəqədər
müəssisələrdə tərbiyəçi ixtisası üzrə bitirdim.
1985-ci ildə qəsəbəmizdə - Binədəki 107 nömrəli körpələr
evi-uşaq bağçasında işə başladım. Mən bir ay olardı ki
işləyirdim. Heydər işdən qayıtmışdı. İşimin necə
getdiyini, mənim üçün çətin olub-olmadığını soruşdu və
dedi ki, Validə, mən bu gün yenə hərbi komissiyada
iştirak edirdim. Neçə vaxtdır, təhlil etdikcə bu qənaətə
gəlirəm ki, bağçalarda tərbiyə alan uşaqlarda sağlamlıq
daha möhkəmdir. Deməli, bağçalar təkcə tərbiyə ocağı
deyil, həm də əsl sağlamlıq beşiyidir. Sonra yarıciddi,
yarızarafat gülə-gülə dedi: - Ona görə, sən də çalış ki,
Aydəmirovların əlindən ancaq sağlam balalar çıxsın.
1995-ci ildə məni 152 nömrəli bağçaya müdir dəvət
etilər. Sonradan Heydər Əliyev Fondunun təşəbbüsü və
dəstəyi ilə təmir olunmuş bu gözəl bağça - köhnə adı və
özü tarixdə qalmış, - 2009-cu ildə yenidən fəaliyyətini
davam etdirən bu bağça həmin bağçanın layiqli varisidir.
Özəlləşdirmədən sonra bağçamız "Binə bağçası" MMC
adlanır.
Mənim suallarım qurtarmamışdı.
Validə xanımı gözləyən valideynlər vardı. Uşaqlarını
bağçaya yazdırmaq istəyirdilər. Biz onun xahişi ilə on
beş dəqiqə fasilə etdik. Bu müddət ərzində mən məşğələ
keçən uşaqların maraqlı baxışları altında musiqi otağı,
idman zalı, yemək otağı və tibb bacısının otağı ilə
tanış oldum. Burada həyat sanki qaynayırdı. Gələcək
cəmiyyətin övladlarının mənəvi cəhətdən zəngin və fiziki
cəhətdən sağlam böyümələri üçün hər cür şərait
yaradılmışdı. Otaqlar isti və işıqlı idi. Təmir son
dərəcədə zövqlə aparılmışdı.
On beş dəqiqədən sonra biz yenidən söhbəti davam
etdirdik.
Validə xanımın otağında bütün qruplara nəzarət üçün
monitor işləyirdi. Biz beş dəqiqə monitor vasitəsi ilə
qruplarda uşaqlarla aparılan tərbiyə prosesini izlədik.
- Validə xanım, mən hiss edirəm ki. bu bağçanın
keyfiyyətlə fəaliyyət göstərməsində Aydəmirovalar
ailəsinin böyük rolu var.
- Hə, elədir, dörd qız anasıyam. Böyük qızlarım Alidə və
Sənubər tibb universitetini, kiçik qızlarım Rəna və
Gülnar ayrı-ayrı pedoqoji universitetlərin məktəbəqədər
fakültələrinin məzunudurlar. Qızlarımın üçünün bağça
yaşında uşaqları burada tərbiyə almışdır və indi də
ikisi tərbiyə almaqda davam etməkdədir. Onlar təbii
olaraq bu bağça ilə münasibətdədirlər. İkisi - Rəna
əvəzçilik üzrə, Gülnar isə tam ştatla buranın işçisidir.
Bu tərbiyəçi qızlarım mənim həm nümunəvi işçilərim, həm
pedaqoji məsləhətçilərim, həm də ümumi keyfiyyət üzrə
ictimai nəzarətçilərimdir. O biri həkim qızlarım isə
bağçanın ictimai qaydada sağlamlıq üzrə
məsləhətçiləridirlər. Ona görə bizim bağçada xəstələnmə
halları olduqca aşağıdır. Mən bilirəm ki, təmizlik,
sanitariya-gigeniya qaydalarına ciddi əməl olunması
sağlamlığın ilkin şərtidir. Bu sahədə mən güzəşti
sevmirəm və bütün işçilərdən bunu məsuliyyətlə tələb
edirəm.
Söhbət zamanı öyrəndik ki, peşəkarlıq bacarıqlarını,
ixtisas səviyyələrini daima yüksəltmək, pedaqoji
kollektiv qarşısında bir vəzifə olaraq qoyulmuşdur.
Uşaqların təlim-tərbiyə məsələləri ilə bağlı
valideynlərlə əməkdaşlığa böyük önəm verilir. Validə
xanım dedi ki, uşaqların müasir tələblər səviyyəsində
tərbiyəsi üçün bütün səylərimizi birləşdirmişik. Heydər
Əliyev Fondunun prezidenti Mehriban xanım Əliyevanın
səyi və təşəbbüsü ilə yüksək səviyyədə təmir edilib,
bütün müasir avadanlıqlarla birgə balaca nəslin
ixtiyarına verilən bu bağçada öz öhdəliyimizi biz də
böyük məsuliyyətlə yerinə yetirməyə diqqət yetiririk.
Biz beləcə söhbəti yekunlaşdırdıq. O, məşğələ otağına,
ingilis dili məşğələsində iştirak etmək üçün tələsirdi.
Mən musiqi zalındakı bir körpənin ad gününün qeyd
olunmasına həsr olunmuş səhnəyə bir qədər tamaşa
etdikdən sonra bağçanı tərk etdim...
Müslüm İSAYEV,
şair-publisist |
