Dekabrın
24-də Bakı Humanitar Kollecində mədəni-maarif və musiqi
şöbəsinin yarımillik hesabatına və 31 dekabr Dünya
Azərbaycanlılarının Həmrəylik Gününə həsr olunmuş
tədbir keçirilib.
Dövlət himninin səsləndirilməsi ilə başlanan tədbirdə
kollecin direktoru İlqar Mahmudov çıxış edərək ilk
növbədə ulu öndər Heydər Əliyevin dünya
azərbaycanlılarının birliyinin zəruriliyini nəzərə
alaraq elan etdiyi və dövlət bayramı kimi qeyd edilən
Dünya Azərbaycanlılarının Həmrəylik Günü və yeni -
2015-ci ilin gəlişi münasibətilə tədbir iştirakçılarını
təbrik edib. Bildirib ki, azərbaycanlılar hər zaman öz
milli mənsubiyyətini, adət-ənənələrini, mənəvi-əxlaqi
dəyərlərini qoruyub saxlamış, tarixi Vətənlə əlaqələrini
itirməmişlər. Məhz ümummilli liderin Azərbaycan
rəhbərliyinə 1993-cü ildə ikinci dəfə qayıtmasından
sonra ölkəmizin diasporla bağlı vahid dövlət
strategiyası müəyyənləşib, diaspor quruculuğu Azərbaycan
Respublikasının dövlət siyasətinin prioritet
istiqamətlərindən birinə çevrilib. Dünyanın müxtəlif
ölkələrində fəaliyyət göstərən Azərbaycan diasporu
Prezident cənab İlham Əliyevin böyük diqqət və qayğısı
nəticəsində müasir dövrün tələblərinə uyğun olaraq
yaşadıqları ölkələrin ictimai-siyasi həyatında daha fəal
iştirak edir, başqa xalqların diaspor təşkilatları ilə
əlaqələrini daha da gücləndirirlər.
Tədbirdə söz alan mədəni-maarif və musiqi şöbəsinin
müdiri Rasim Mehdiyev vurğulayıb ki, 31 dekabr
Azərbaycan xalqının müstəqillik əldə etdiyi vaxtdan
bütün dünyada yaşayan soydaşlarımıza bəxş etdiyi və
ümummilli əhəmiyyət kəsb edən bir gündür.
Kollecin tələbələri böyük dövlət xadimi Heydər Əliyevin
müəllifi olduğu Azərbaycançılıq ideologiyasının bu gün
dünyanın müxtəlif nöqtələrində yaşayan həmvətənlərimiz
üçün milli birliyimizin və həmrəyliyimizin formulu kimi
qəbul olunmasından danışıblar. Qeyd olunub ki, bu formul
müstəqil Azərbaycan dövlətinin çiçəklənməsinə və
möhkəmlənməsinə, bütün dünya azərbaycanlılarının milli
özünüdərkinə stimul verən mühüm faktorlardan biridir.
Heydər Əliyevin qurduğu müstəqil Azərbaycanın sabahı
böyük zəhmət hesabına əldə olunmuş bu böyük tarixi
nailiyyətin qorunub saxlanılmasından asılıdır.
Mədəni-maarif və musiqi şöbəsinin tələbələri ixtisasları
üzrə xalq və bəstəkar mahnılarını ifa ediblər.
Rəşad RAMAZANOĞLU,
"Azərbaycan müəllimi" |