|
 Təhsil
Nazirliyinin rüblük "Sənətkar" elmi-pedaqoji, metodik
jurnalının sonuncu nömrəsi çapdan çıxıb. Jurnalın
oktyabr-dekabr nömrəsinin ilk səhifələrində
"Müəllimlərin etik davranış qaydaları" yer alıb. Jurnal
daimi "Mütəxəssis sözü" rubrikası altında da bu
nömrəsində materialların dərcini davam etdirib və
oxucularına Təhsil Problemləri İnstitutunun əməkdaşları
P.Əsgərov və M.Qurbanovun "Yeni təhsil proqramları
(kurikulumlar) ilə işləyən müəllimlərin təlimi
problemi", B.Məmmədovanın "Orta ixtisas təhsilində
pedaqoji kadr hazırlığına müasir yanaşma", Bərdə Peşə
Liseyinin müəllimi Z.Əliyevin "Peşə təhsili
müəssisələrinin özünəməxsusluğu, kadr hazırlığında
təcrübə dərslərinin əhəmiyyəti", jurnalın əməkdaşı
A.Rəsulzadənin "Peşə təhsilinə dövlət qayğısı ilbəil
artmaqdadır" yazılarını təqdim edib.
Müəllimə kömək məqsədi ilə eyniadlı daimi rubrikada
xeyli məqalə verilib. Bunlara TPİ-nin böyük elmi işçisi
A.Veyisova və 14 nömrəli Bakı Peşə Liseyinin müəllimi
Z.Xəlilovanın "Geyimin bədii layihələndirilməsi,
konstruksiyası və modelləşdirilməsi fənni üzrə nümunəvi
dərsin təşkili", 9 nömrəli Bakı Peşə Liseyinin müəllimi
P.Məhərrəmovanın "Nəzəri və istehsalat təlimlərinin
vəhdəti olan binar dərslər", Sumqayıt Dövlət Texniki
Kollecinin ingilis dili müəllimi Ü.Səfərovanın "İnsan
hüquqlarının tədrisində müəllimin rolu" adlı
məqalələrini və digər yazıları misal göstərmək olar.
Jurnal "Direktorun tribunası"nda bu nömrəsində Qusar
Peçə Liseyinin direktoru İ.Zəkiyevə tribuna verib.
İmaməddin müəllim yazısında liseylərinin yaranma
zərurəti və keçdiyi yoldan söz açır.
Jurnalın oxucuları yeni nömrədə habelə gənclərin asudə
vaxtlarının səmərəli təşkili, gənclərə dövlət qayğısı,
gənc nəslin peşəyə istiqamətləndirilməsi, narkomaniyaya
qarşı mübarizə çərçivəsində keçirilən tədbirlərlə bağlı
jurnalın və ilk peşə-ixtisas təhsili müəssisələrinin
əməkdaşlarının yazıları ilə tanış ola bilərlər.
Nömrədə Ukraynanın təhsil sistemi, qədim peşələrdən
dulusçuluq haqqında yazılar və Azərbaycan Milli
Kulinariya Mərkəzində Beynəlxalq Kulinariya Gününün qeyd
olunması barədə geniş informasiya da yer alıb.
Yusif ƏLİYEV,
"Azərbaycan müəllimi" |
