|
 Bütün
bilik yarışlarında olduğu kimi, olimpiadalarda da uğurlu
iştirak və qalib yerlər tutmaq üçün onlara yaxşı
hazırlaşmaq lazım gəlir. Belə hazırlıq üçünsə mütləq
müvafiq materiallar, elmi-metodik ədəbiyyat olmalıdır.
Ölkəmizdə məktəblilərin respublika olimpiadaları
keçirilən ayrı-ayrı fənlər üzrə materiallar az da olsa
mövcuddur və bu bilik yarışlarına qatılan məktəblilər
hazırlıq prosesində onlardan geniş istifadə edirlər.
İnformatika üzrə isə bu sahədə indiyədək bir boşluq
özünü göstərirdi. Belə ki, bu fənn üzrə olimpiadaların
təşkili və keçirilməsi yönündə xeyli müsbət təcrübə
toplansa da bilik yarışlarına qoşulanlara kömək üçün
Azərbaycan dilində müvafiq vəsaitlər, 2012-ci ildə çap
olunmuş "Beynəlxalq İnformatika Olimpiadaları" kitabı
istisna olmaqla, demək olar ki, yox idi.
Lakin budur, artıq bu sahədə də ilk və faydalı addım
atılıb.
Respublika informatika olimpiadalarının uzun illər
münsiflər heyətinin sədri olan nüfuzlu pedaqoq-alim
Ramin Mahmudzadə, Təhsil Nazirliyinin şöbə müdiri,
informatika sahəsində tanınmış mütəxəssis İsmayıl
Calallı və informatika olimpiadası münsiflər heyətinin
məsul katibi Akif Əliyevin bu günlərdə "1989-2014.
Məktəblilərin informatika olimpiadaları" kitabı işıq üzü
görüb.
"İnformatika və hesablama texnikasının əsasları"
kursunun ölkəmizin ümumtəhsil məktəblərində tədrisinə
başlanmasının 30, informatika üzrə respublika
olimpiadalarının keçirilməsinin 25 illiyi ərəfəsində
"Bakı nəşr" tərəfindən nəfis tərtibatla çapdan
buraxılmış kitab "Ön söz" və 7 bölümdən ibarətdir.
"Ön söz"də müəlliflər istedadlı uşaqların aşkara
çıxarılması və inkişafı, informatika fənninin
keyfiyyətli tədrisi üçün zəruri şəraitin yaradılması
istiqamətində görülən işləri, olimpiada qaliblərinə
edilən güzəştləri qısa qeyd edib, kitabın yazılma
səbəbini əsasdlandırıblar.
Kitabın ikinci bölümü məktəblilər arasında informatika
olimpiadalarının tarixinə həsr olunub. Burada
informatika fənninin tədrisinə başlanılması ilə bağlı
görülən işlərdən, respublika informatika
olimpiadalarından xronoloji qaydada söz açılır,
qazanılan nəticələr diqqətə çatdırılır.
"Respublika informatika olimpiadalarının təşkili və
keçirilmə qaydaları" adlı ikinci bölümdə olimpiadaların
keçirilmə mərhələləri, rəhbər orqanları,
iştirakçılarının tərkibi haqqında məlumatlar yer alıb.
Kitabın üçüncü bölümündə müəlliflər olimpiada
məsələlərinin məzmunu və olimpiadaya hazırlıq üçün
zəruri olan metodik tövsiyələr veriblər.
Kitabın ən mühüm məziyyəti burada olimpiadanın müxtəlif
turları üzrə hazırlıq üçün məsələlərin yer almasıdır. 4,
5 və 6-cı bölümlərdə həlləri ilə birgə verilmiş bu
məsələlər şagirdlərin olimpiadalara praktik
hazırlaşmasında olduqca mühüm əhəmiyyətə malikdir.
Kitabın ən maraqlı bölümlərindən biri də "Əlavələr"
adlandırılan 7-ci bölümdür. Burada informatika üzrə
bütün respublika olimpiadalarının qalibləri, beynəlxalq
informatika olimpiadalarının medalçıları haqqında
məlumatlar, bir sıra sənədlər, eləcə də "Məktəblilərin
fənn olimpiadalarının təşkili və keçirilməsi qaydaları"
öz əksini tapıb.
Müəlliflərin böyük zəhmətinin nəticəsi olaraq meydana
gələn "Məktəblilərin informatika olimpiadaları" kitabı
əsasən informatika müəllimləri, istedadlı uşaqlarla
işləyən pedaqoqlar üçün nəzərdə tutulsa da buradakı
materiallar informatika üzrə olimpiadalara hazırlaşmaq
istəyən şagirdlər, tələbələr, eləcə də proqramlaşdırmaya
marağı olanlar üçün də faydalıdır.
Yusif ƏLİYEV,
"Azərbaycan müəllimi" |
