|
Balakən 2 nömrəli peşə məktəbinin direktoru A.Dibirovun
redaksiyamıza göndərdiyi məlumatda deyilir ki, peşə
məktəbi fəaliyyəti dövründə geniş profilli traktorçu
maşinist, təmirçi-çilingər, tikiş avadanlığının
operatoru, tikişçi, elektrik qaz qaynaqçısı, elektrik
avadanlıqlarına xidmət və təmiri üzrə elektrik montyoru,
tərəvəz ustası, bənna və digər peşələr üzrə ixtisaslı
kadrların hazırlanması ilə məşğul olur.
Hazırda kadrların hazırlanması üçün məktəbin kifayət
qədər maddi-texniki bazası var. 9 fənn kabineti, 3
emalatxana, 2 laboratoriya, kompüter otağı, kitabxana,
kənd təsərrüfatı texnikası və avadanlıqları şagirdlərin
ixtiyarındadır. Tədrisin keyfiyyətinin yaxşılaşdırılması
üçün planda nəzərdə tutulmuş "açıq dərs"lər,
dərsdinləmələri müntəzəm aparılır, gənc müəllim və
istehsalat təlimi ustalarına metodiki köməkliklər
göstərilir. İllik iş planında nəzərdə tutulmuş
məsələlər Pedaqoji Şura iclaslarında müzakirə, müvafiq
qərarlar qəbul edilir. Maddi-texniki bazanın
gücləndirilməsi məqsədilə Təhsil Nazirliyi
tərəfindən məktəbə yeni avadanlıqlar: interaktiv qurğu,
kompüter, tikiş maşını, qaynaq aparatı və kənd
təsərrüfatı avadanlıqları və aqreqatları göndərilib.
Müəllim və istehsalat təlimi ustalarının müasir
tədris texnologiyalarına uyğun peşəkarlığının və
elmi-pedaqoji səviyyəsinin artırılması, təhsilalanların
fasiləsiz texniki peşə təhsili almasını, daim yeniləşən
müasir texnologiyalara uyğun biliklərə yiyələnməsini
təmin etmək məqsədilə məktəbin istehsalat təlimi
ustaları ixtisasartırma kurslarından keçirlər. |
