|
Yanvarın 20-də rəhbərlik etdiyim məktəbin müəllim və
şagird kollektivi ilə birlikdə "Metropark"da Vahid
Mustafayevin çəkdiyi "Qanlı Yanvar" filminə tamaşa
etdik. Gənclərin belə filmlərə baxmaları çox
əhəmiyyətlidir. Heç də sirr deyil ki, bəzən bədii
əsərin və yaxşı bir bədii filmin gənclərin həyatında
oynadığı rolu nə bir məktəb tədbiri, nə də hər hansı
sənədli film əvəz edə bilmir.
Tamaşa etdiyimiz "Qanlı Yanvar" filmi də bugünkü
gənclərimizin həyatında çox böyük rol oynayaraq
onlarda güclü vətənpərvərlik hissi aşılayır. Filmdə
müəllimlərin şagirdlərə verdiyi "Vətəni necə sevmək
lazımdır" sualı öz əksini yüksək səviyyədə tapıb.
Ümummilli liderimiz Heydər Əliyevin 1990 -cı il yanvarın
21-də olan tarixi çıxışı və xarici jurnalistin
dilindən ulu öndərə verilən yüksək qiymət filmdə
göstərilib.
Biz müəllimlərin ümdə vəzifəsi şagirdlərə vətəni sevməyi
öyrətmək və həqiqətləri olduğu kimi çatdırmaqdır.
Yaxşı bilirik ki, ümummilli liderimiz Heydər Əliyevin o
vaxtkı tarixi çıxışı ümidi qırılmış xalqın özündə
yenidən mübarizə gücü tapmasında çox böyük rol oynadı.
Müəllif bütün bunları "Qanlı Yanvar" filmində
Azərbaycan xalqına və bütün dünyaya çatdırır.
Bu gün işlədiyim məktəbin müəllim və şagird kollektivi
adından "Azərbaycan müəllimi" qəzeti vasitəsilə "Qanlı
Yanvar " filmini çəkdiyinə görə Vahid Mustafayevə
minnətdarlıq edir və xalqımızın rəşadət və
qəhrəmanlığını əks etdirən yeni filmlər çəkməkdə ona
uğurlar arzulayıram.
Tahirə ŞÜKÜROVA,
Bakı şəhəri 39 nömrəli tam orta məktəbin direktoru |
